Arca tein kichijchiuak Noé

Ijkon kemej panokej tonalmej, miakiakej taltikpakneminij. Tel miakej tel amo yolkualmej katkaj. Hasta seki ángeles mochiujkej amo yolkualmej. Takaujteujkej iluikak, kampa nemiaj, uan temokej nikan taltikpak. ¿Tikmati keyej? Porin kinekiaj yeskij kemej takamej uan monamiktiskej iniuan siuamej.

Ángeles kinpiakej konemej iniuan nejon siuamej. Keman ininkoneuan moskaltijkej, mochiujkej tel chikaujkej uan tel tateuianij, uan kintajyouiltiayaj oksekin. Jiova amo uelia kikauaya maj kisentokani nejon. Yejua ika kiixtalij kinixpolos akin amo yolkualmej ika se tetsaujkakiouit.

Sayoj ke moajsia se takat akin amo katka kemej yejuan porin kitasojtaya Jiova. Motokaytiaya Noé. Kipiaya inamik uan eyi ikoneuan: Sem, Cam uan Jafet. Sejse ikoneuj no kipiaya inamik. Jiova kinauatij Noé maj kichijchiua se arca, se ueyi koujkaxon tein uelia yetoya aixko. Ijkon, Noé uan ichankauan ueliskiaj makisaskej itech Tetsaujkakiouit. Uan no, Jiova kinauatij maj kinkalakiani miak tapialmej itech arca, uan ijkon no makisaskiaj.

Noé niman peuak kichijchiua arca. Yejua uan ichankauan kinuikilij kemej 50 xiujmej kitamichijchiuaskej uan kichijchiujkej ijkon kemej Jiova kinnauatij. Itech nochi nejon xiujmej, Noé kiniluij taltikpakneminij ke yaya mochiuati Tetsaujkakiouit, sayoj ke amo akin kineltokilij.

Ompa, ejkok tonal keman kalakiskiajya itech arca. ¿Tikneki tikmatis toni panok satepan?