Amo kichiuaj tein motenkaujkej

Jiova kiluij Moisés: “Xipankisa kampa niyetok, itech tepet. Nikijkuiloti notanauatiluan itech patauak temej uan nimitsmakati”. Moisés pankisak uan mokauak itech tepet 40 tonalmej uan 40 youalmej. Keman ompa yetoya, Jiova kijkuiloj Majtakti Tanauatilmej itech ome patauak tet uan kimakak Moisés.

Seki tonalmej satepan, israelitas peuak kinemiliaj ke Moisés kinkaujteujka. Yejua ika, kiluijkej Aarón: “¡Tiknekij se taixyekankej. Xitechchijchiuili se tiotsin!”. Aarón kinnankilij: “Xinechualkuilikan oro tein nankipiaskej”. Ompa, Aarón kiyemanij oro uan ika kichijchiuak se kuakuejkonet. Taltikpakneminij kijtojkej: “¡Nejin kuakuejkonet yejua totiotsin tein techkixtij Egipto!”. Kichiujkej se iluit uan peuak kiueyichiuaj. ¿Kuali yetoya nejon? Amo, porin yejuan motenkaujkaj ke sayoj kiueyichiuaskiaj Jiova. Sayoj ke axkan amo kichiujtoyaj tein motenkaujkaj.

Jiova kiitak tein mochiujtoya uan kiluij Moisés: “Xitemo kampa yetok xolal, porin amo nechtakamattokej. Kiueyichiujtokej se tiotsin”. Moisés temok uan imako kiualkuia ome patauak tet.

Keman Moisés ajsitiyaya kampa yetoya xolal, kinkakik ke mokuikatijtoyaj. Keman ajsik, kinitak mijtotijtoyaj uan kiueyichiujtoyaj kuakuejkonet. Moisés tel kualanik, kintamotak talpan ome patauak tet, uan tatapakakej. Ompa niman kiixpoloto kuakuejkonet uan satepan kitajtanij Aarón: “¿Keyej mitschiualtijkej nejin tein tel amo kuali?”. Aarón kinankilij: “Amo xikualani, tejua tikinixmati. Kinekiaj se tiotsin, yejua ika niktamotak oro itech tit, uan kisak nejin kuakuejkonet”. Aarón monekia amo kichiuas nejon. Moisés oksepa pankisak itech tepet uan kitataujtij Jiova maj kintapojpoluiani israelitas.

Jiova kintapojpoluij israelitas akin kinekiaj kitakamatiskej. Motelnekia maj kikakinij Jiova, uan no Moisés, ¿melauj?