Josué uan gabaonitas

Itech okseki altepemej tein pouiaj Canaán kimatkej tein panoka Jericó. Akin tekiuajtiaj itech nejon altepemej kinemilijkej mosenkuiskej uan kinteuiskej israelitas. Sayoj ke akin nemiaj Gabaón kinemilijkej kichiuaskej se taman. Motalilijkej soltik tilmaj, kiitatoj Josué uan kiluijkej: “Uejka tiualeujkej. Tiktekakilianij ke semi ika motajtoua Jiova uan nochi tein namoka kichiuak ompa Egipto uan Moab. Komo nanmotenkauaj ke amo nantechteuiskej, tiyeskij nanmotekitikauan”.

Josué kinneltokilij uan motenkauak ke amo kinteuiskiaj. Sayoj ke eyi tonal satepan, Josué kimatik ke gabaonitas amo melauj uejka ualeuayaj, ta katkaj kayomej Canaán. Yejua ika, Josué kintajtanij: “¿Keyej nantechkajkayaujkej?”. Yejuan kinankilijkej: “Porin timouiaj. Tikmatij ke Jiova nanmoDios namechpaleuia. Ika kualtakayot, amo xitechmiktikan”. Josué kichiuak tein motenkaujka uan amo teyi kinchiuilij.

Tepitsin satepan, makuil tekiuanij cananeos iniuan inintateuijkauan yayaj kinteuitij gabaonitas. Josué uan itateuijkauan nochi youal ojtokakej kinpaleuitoj gabaonitas. Neteuilis peuak mostika, tel kualkan. Cananeos peuak noyampa cholouaj, sayoj ke Jiova kichiuak maj ininpan uetsini uejueyi tejsiuit. Satepan Josué kitajtanij Jiova maj Tonaltsin motsakuiliani. Tonaltsin amo keman achto motsakuilijtoya. ¿Keyej Josué tajtanik nejon? Porin senkis takuaujtamatia iuan Jiova. Yejua ika Tonaltsin amo pankalakik. Nejon tonal amo tatayouayantiak hasta keman israelitas kintankej tekiuanij cananeos uan inintateuijkauan.