Jiova iuan tajtoua Samuel

Elí, akin kinixyekanaya tiopixkamej, kinpiaya ome ikoneuan: Hofní uan Finehás. Yejuan katkaj tiopixkamej uan tekitiaj itech tabernáculo. Sayoj ke amo kitakamatiaj itanauatiluan Jiova, uan no, ininka mauiltiayaj taltikpakneminij. Keman israelitas kiuikiliayaj Jiova nemaktilmej, Hofní uan Finehás mokuiliayaj okachi kuali nakat. Elí kimatia ke ikoneuan amo kuali monejnemiltiayaj, sayoj ke amo kintakaualtiaya. ¿Tiknemilia ke Jiova kichiuaskia teisa?

Maski Samuel katka okachi nojnel ke Hofní uan Finehás, amo kichiuaya tein amo kuali kemej yejuan. Yejua ika, Jiova kiyolpaktiaya tein kichiuaya Samuel. Se youak, Samuel kochtoya uan kikakik se tajtol tein kinotsaya. Meujtikisak, tsikuinteuak kampa yetoya Elí uan kiluij: “Nikan niyetok”. Sayoj ke Elí kinankilij: “Nejua amo nimitsnotsak. Oksepa xikochiti”. Samuel motekato. Ompa, oksepa kinotskej. Keman Samuel ika expa kikakik tajtol, Elí kiajsikamatik ke Jiova kinotstoya Samuel. Elí kiluij ke komo oksepa kikakia tajtol, monekia tanankilis: “Xinechilui, Jiova. Motekitikauj mitskaktok”.

Samuel oksepa motekato uan kikakik tajtol: “Samuel, Samuel”. Yejua tanankilij: “Xinechilui, Jiova. Motekitikauj mitskaktok”. Jiova kiluij: “Xikilui Elí ke niktatsakuiltiti yejua uan ichankauan. Yejua kimattok ke ikoneuan kichiujtokej tein amo kuali itech notabernáculo, sayoj ke amo kintakaualtia”. Mostika kualkan, Samuel tatapoj itech tabernáculo, kemej ipa kichiuaya. Mouia kimatiltis Elí tein Jiova kiluijka. Sayoj ke Elí kinotsak uan kitajtanij: “Samuel, ¿toni mitsiluij Jiova?”. Yejua ika Samuel kitapouij nochi.

Samuel moskaltij, uan Jiova kisentokak iuan kuali mouikak. Israelitas akin noyampa nemiaj kimatiaj ke Jiova kiixpejpenka Samuel maj yeskia tanauatijkej uan tamelaujkej.