Jiova kiyolchikaua Elías

Jezabel kimatik tein kinpanok itanauatijkauan Baal uan tel kualanik. Yejua ika kititanik se takat maj kiluiti Elías: “Mosta timikis, ijkon kemej itanauatijkauan Baal”. Elías tel mouik uan choloj taluakyan. Ompa kiluij Dios: “Jiova, amo nitaxikouaok. Nikneki nimikis”. Kemej tel sioujtoya, kochtiyajki koujtampa.

Sayoj ke se ángel kijxitij Elías uan kiyemankailuij: “Ximeua uan xitakua”. Elías kiitak se pantsin youaltik itech seki totonik tet uan se tapalkat ika at. Takuaj uan tatayik, uan oksepa kochik. Ángel oksepa kijxitij uan kiluij: “Xitakua. Moneki tikpias chikaualis porin uejka tiojtokati”. Yejua ika Elías takuaj se tepitsinok. Ompa, ojtokak omepoual tonal uan omepoual youal uan ajsito itech tepet Horeb. Ompa kalakik itech se ostok kampa yaya kochiti. Sayoj ke Jiova kinotsak: “¿Toni tikchiujtok nikan, Elías?”. Elías kinankilij: “Israelitas amo kichiujtokej tein motenkaujkej mouan. Kinxitinijkej moaltares uan kinmiktijkej motanauatijkauan. Uan axkan no kinekij nechmiktiskej”.

Jiova kiluij Elías: “Xikisa uan ximoketsa itech tepet”. Ompa, chikauak taejekak, satepan talolinik, uan ompa nesik se ueyi tit. Satepan, Elías kikakik se tajtol yemanik. Yejua ika moixtsakuak ika itilmaj uan mokauak ikalakyan ostok. Jiova kitajtanij keyej cholojtoya. Uan Elías kinankilij: “Sayoj nejua nimokaua kemej tanauatijkej”. Sayoj ke Jiova kiluij: “Amo moselti tiyetok. Moajsijok 7,000 ompa Israel akin nejua nechueyichiuaj. Xiyouj uan xikilui Eliseo ke yejua nikixpejpenak maj mitsixpata kemej tanauatijkej”. Elías niman kichiuato tein Jiova kinauatij. ¿Tiknemilia ke Jiova no mitspaleuis komo tiktakamati? Kemaj. Axkan maj tikitakan se taman tein panok keman tauaktoya.