Jiova kipaleuia Jehosafat

Jehosafat tekiuajtik Judá uan kinixpoloj altares kampa kiueyichiuayaj tiotsin Baal uan no kinixpoloj okseki tiotsitsin itech ialtepeuj. Yejua kinekia maj taltikpakneminij kiixmatinij itanauatiluan Jiova. Yejua ika, kintitanik uejueyi chiuanimej uan levitas noyampa itech altepet Judá maj kinmachtitij taltikpakneminij itanauatiluan Jiova.

Akin nemiaj itech altepemej tein ompakauin moajsiaj mouiaj kinteuiskej akin nemiaj Judá porin kimatiaj ke Jiova kinpaleuiaya. Hasta kiuikiliayaj netetayokolilmej tekiuaj Jehosafat. Sayoj ke akin kayomej Ammón, Moab uan itech okseki xolalmej tein pouiaj Seír moixeuijkej kinteuitiuij akin nemiaj Judá. Jehosafat kimatia ke monekia maj Jiova kinpaleui. Yejua ika kinsentilij Jerusalén nochin takamej, siuamej uan konemej. Ininixpan kichiuak se netataujtil: “Jiova, amo uelis titataniskej komo amo titechpaleuia. Ika kualtakayot, xitechilui toni moneki tikchiuaskej”.

Jiova kinankilij Jehosafat: “Amo ximouikan, nejua namechpaleuis. Xiyakan kampa moneki nanyetoskej, amo teyi xikchiuakan uan xikitakan keniuj namechmakixtiti”. ¿Keniuj kinmakixtiskia Jiova?

Mostika kualkan, Jehosafat kinixpejpenak mokuikatianij uan kiniluij maj yanij ininixpan tateuianij. Yejuan kiskej Jerusalén uan yajkej kampa mochiuaskia neteuilis, kampa motatokaytiaya Tecoa.

Keman mokuikatianij ika yolpakilis kiueyichiujtoyaj Jiova ika nekuikatilmej, Jiova kimakixtijtoya ixolal. Kichiuak maj ammonitas uan moabitas mopojpolokan, uan peujkej yejuan moteuiaj. Nochin mikkej. Sayoj ke Jiova kinmatampauij akin nemiaj Judá, tateuianij uan tiopixkamej. Itech nochi altepemej tein ompakauin moajsiaj kimatkej tein Jiova kichiujka uan kiajsikamatkej ke yejuatsin kisentokaya kinmatampauiaya israelitas. ¿Keniuj Jiova kimakixtia ixolal? Ika miak taman. Yejuatsin amo moneki maj taltikpakneminij kipaleuikan.