Tateuijkej uan siuapiltsin

Itech altepet Siria, nemia se siuapiltsin israelita akin ichankauan tel uejka yetoyaj. Tateuianij akin kayomej Siria kiuikakaj, uan axkan kitekitiliaya inamik Naamán, se takat akin kinixyekanaya tateuianij. Siuapiltsin kiueyichiuaya Jiova maski taltikpakneminij akin iniuan nemia amo kiueyichiuayaj.

Naamán kipiaya se pitsotik kokolis itech inakayo tein kitelkokouaya. Siuapiltsin kinekia kipaleuis, yejua ika kiluij inamik Naamán: “Itech xolal Israel nemi se itanauatijkauj Jiova akin motokaytia Eliseo. Yejua uelis kipajtis monamik”.

Siuat kitapouij Naamán tein siuapiltsin kiluij. Naamán kinekia kichiuas tein yeski taman tein kipaleuiskia maj pajti, yejua ika yajki Israel kitemoto Eliseo. Naamán kinemiliaya ke Eliseo kiseliskia kemej se ueyichiujkej. Sayoj ke Eliseo amo iuan tajtoto, ta kititanik itekitikauj maj kiseliti uan maj kiluiti: “Xiyouj uan ximokalaki chikojpa itech ueyiat Jordán. Ijkon tipajtis”.

Naamán amo kiuelitak nejon uan kijtoj: “Niknemiliaya ke nejin tanauatijkej nechpajtiskia keman kinotsaskia iDios uan notech kitaliskia imauan. Sayoj ke sayoj nechiluij maj niyouj itech nejon ueyiat tein yetok Israel. Tikpiaj okachi kualtsitsin ueyiamej ompa Siria. ¿Amo uelis niyas itech nejon ueyiamej?”. Naamán tel kualanik uan yajki.

Itekitikauan Naamán kipaleuijkej maj okachi kuali tanemili. Kiluijkej: “¿Melauj ke tikchiuaskia tein yeski tein mitspaleuis xipajti? Tein mitstajtania nejin tanauatijkej amo ouij. Kuali yeskia xikchiua”. Naamán kinkakik, yejua ika yajki itech ueyiat Jordán uan mokalakij itech at chikojpa. Keman ika chikojpa mokalakij, Naamán senkis pajtikaya keman kisak. Tel yolpakia uan kitasojkamatilito Eliseo. Kiluij: “Axkan nikmati ke Jiova yejua Dios akin melauak”. Keman Naamán mokepak ichan pajtikaya. ¿Keniuj tiknemilia ke momachilij siuapiltsin israelita keman kiitak?