Jesús kiixpejpena Saulo

Saulo yolik itech xolal Tarso uan poujtoya kemej romano. Katka se fariseo akin tel kuali kiixmatia inintanauatiluan judíos uan kintauelitaya itatojtokakauan Cristo. Kinkixtiaya ininchan, takamej uan siuamej, kintitilatsaya uan kintsakuaya. Hasta kiitstoya keman miakej akin tel kualantoyaj kitetenkej hasta kimiktijkej Esteban, se imomachtijkauj Jesús.

Saulo amo sayoj kitemouaya kinkitskis itatojtokakauan Cristo akin nemiaj Jerusalén. Yejua ika kitajtanij akin kinixyekanaya tiopixkamej maj kititanini xolal Damasco kampa no kintemoskia itatojtokakauan Cristo. Keman Saulo ajsitiyaya Damasco, se chikauak tanex kiixmiktij, uan uetsito talpan. Ompa kikakik se tajtol: “Saulo, ¿keyej tinechtajyouiltia?”. Saulo kitajtanij: “¿Tiakoni?”. Tajtol kinankilij: “NiJesús. Xiyouj Damasco, uan ompa mitsiluiskej tein moneki tikchiuas”. Ijkuak, Saulo amo tachiakok, uan monekik kimajchanaskej hasta Damasco.

Ompa nemia Ananías, se itatojtokakauj Cristo. Jesús kiluij: “Xiyouj ichan Judas, itech ojti tein motokaytia Melauak, uan xiktemo Saulo”. Ananías kinankilij: “NoTekotsin, miak taman niktekakiliani ke kichiua nejin takat. Yejua kintsakua motatojtokakauan”. Sayoj ke Jesús kiluij: “Xiyouj xikitati, porin nikixpejpenak Saulo maj kiteixmatilti kuali tanauatilmej itech miak xolalmej”.

Yejua ika Ananías kiitato Saulo uan kiluij: “Saulo, nokniuj, Jesús nechualtitanik maj nimitspaleuiki oksepa xitachia”. Saulo niman oksepa uelik tachiak. Kimatik miak taman tein kichiuak Jesús uan mochiuak itatojtokakauj. Moauij uan peuak tanojnotsa itech inintiopan judíos iniuan okseki itatojtokakauan Cristo. ¿Tiknemilia keniuj judíos semi kimoujkaitakej? Axkan kiitayaj Saulo kinmachtijtoya taltikpakneminij tein Jesús tamachtij. Judíos motajtaniayaj: “¿Amo yejua nejin takat akin kintajyouiltiaya imomachtijkauan Jesús?”.

Saulo eyi xiuit tanojnotsak Damasco. Judíos kitauelitayaj uan kiixtalijkej kimiktiskej. Sayoj ke tokniuan kimatkej uan kipaleuijkej maj cholo. Kitemoltijkej itech se chikiuit kampa ika takoyontoya itech tepamit tein kiyoualouaya xolal.

Keman Saulo yajki Jerusalén, kinekia iniuan mosentilis tokniuan. Sayoj ke yejuan kimouiliayaj. Yejua ika, Bernabé, se imomachtijkauj Jesús akin tel yolkuali katka, kiuikak Saulo ininixpan tatitanilmej uan kinmatiltij ke Saulo yekmelauj mopataka. Saulo peuak mosentilia iniuan tokniuan akin nemiaj Jerusalén uan peuak kiteixmatiltia ika yolpakilis kuali tanauatilmej. Satepan, moixmatik kemej Pablo.