Juan kiitaltiaj seki taman

Keman tatitanil Juan tsaktoya Patmos, se tal tein moajsi tatajko ueyiat, Jesús kiitaltij 16 taman tein panos satepan. Juan kiitak keniuj moueyitalis itokay Jiova, keniuj peuas taixyekanas iTekiuajyo uan keniuj mochiuas tein kiixtalijtok maj mochiua itech taltikpak ijkon kemej mochiua itech iluikak.

Itech se taman tein kiitaltijkej, Juan kiitak Jiova tokotsyetok itech itrono ompa iluikak. Kiyoualojtokej 24 ueuentsitsin akin takentokej ika istak tilmaj uan kipiaj se corona tein chijchiujtok ika oro. Itech trono kemej yeskia tapepetani uan tatitikuini. Nejin 24 ueuentsitsin moixpilouaj iixpan Jiova uan kiueyichiuaj. Itech okse taman tein kiitaltijkej, Juan kiita ke kiueyichiuaj Jiova tel miakej taltikpakneminij akin ualeuaj itech nochi tataman altepemej, xolalmej uan tajtouaj tataman tajtolmej. Ichkatsin, Jesús, kinyekpia uan kinuika itech at tein kitemaka nemilis. Satepan, Juan no kiitaltiaj ke Jesús peua tekiuajti ompa iluikak iniuan nejon 24 ueuentsitsin. Itech okse taman tein kiitaltijkej, Juan kiita Jesús moteuijtok iuan amokuali tekuani, Satanás, uan iamokuali ejekauan. Jesús kinkixtia ompa iluikak uan kinpantamota itech taltikpak.

Satepan, Juan kiita se taman tein tel kualtsin, kiita Ichkatsin uan 144,000 taixpejpenalmej ijkatokej itech tepet Sion. No kiita se ángel akin patantinemi itech nochi taltikpak uan kijtojtinemi: “Xikueyichiuakan Dios uan xikueyitalikan”.

Juan no kiita neteuilis tein motokaytia Armagedón. Itech nejon neteuilis, Jesús uan itateuijkauan kiixpolouaj nochi tein amo kuali tein kiixyekana Satanás. Ika tami, Juan kiita ke itech iluikak uan taltikpak nochin tel kuali mouikaj. No kiita keniuj kiixpolouaj Satanás uan akin kitojtokaj. Itech iluikak uan taltikpak, nochin kipoujkaitaj itokay Jiova uan kiueyichiuaj sayoj yejuatsin.