Tein ika tajtoua taxelol 10
Jiova yejua Tekiuaj itech nochi tein onkak. Nochipa kiixyekanani nochi uan nochipa ijkon kichiuas. Kemej neskayot, kimakixtij Jeremías keman yaya momikiliti itech se uejkatan atekoch. Kinmakixtij Sadrac, Mesac uan Abednego keman kinpantamotkej tikoijtik, uan kimakixtij Daniel maj amo kikuanij tekuanimej. Jiova no kiyekpiak Ester uan ijkon yejua ueliskia kimakixtis ixolal. Yejuatsin amo kikauas maj nochipa mochiua tein amo kuali. Tein moijtojka ke panoskia ika ueyi takat tamachijchiuj uan ueyi kouit techyekmatiltia ke iTekiuajyo Jiova amo uejkaua kiixpolos nochi tein amo kuali uan taixyekanas itech taltikpak.