TAMACHTILIS 17

¿Keniuj tamati Jesús?

Tein moamakixtia

Keman timomachtiaj tein Jesús kijtoj uan tein kichiuak keman yetoya nikan taltikpak, techpaleuia maj tikixmatikan uan maj timotokikan iuan uan iuan iPopaj, Jiova. ¿Keniuj tamati Jesús? ¿Uan keniuj uelis tikchiuaskej kemej yejua?

1. ¿Keyej Jesús tamati kemej iPopaj?

Jesús yetoni semi miak xiujmejya ompa iluikak iuan iPopaj akin semi tetasojta uan kiitani tein kichiua uan kemej tamati. Yejua ika tein kimachilia, tein kinemilia uan tein kichiua tamati kemej iTajtsin (xikonita Juan 5:19). Jesús semi kuali kinextia kemej tamati iTajtsin, yejua ika kijtoj: “Keme Nejuatsin tinechitstinemi, no ijkon Totajtsin Dios tikitstinemi” (Juan 14:9). Yejua ika, komo kuali tikonixmati Jesús okachi kuali tikonixmatis Jiova. Keman tikitaj keniuj Jesús kinikneliaya oksekin, kinextia keniuj Jiova semi mitsontasojta.

2. ¿Keniuj kinextij Jesús ke kitasojta iPopaj?

Jesús kijtoj: “Keme Notajtsin Dios nechnauatilij ya ma nikchiua, no ijkon nikchiutinemis para [...] ma kimatikan [...] ke [...] niktasojta Notajtsin” (Juan 14:31). Keman Jesús yetoya nikan taltikpak, kinextij ke semi kitasojtaya iPopaj keman nochipa kitakamatia maski monekia tajyouis. Uan no, Jesús kiuelitaya kinixmatiltis oksekin akoni iPopaj uan kinpaleuiaya maj kuali mouikakan iuan (Juan 14:23).

3. ¿Keniuj kinextiani Jesús ke tetasojta?

Biblia kinextia ke Jesús semi ‘kintasojta’ akin nemij nikan taltikpak (Proverbios 8:31). Kinextij ke tetasojta keman kinyolchikauak uan kinpaleuij oksekin, uan amo kichiak maj yejuan no ijkon kichiuakan iuan. Kichiuak uejueyi tachiualismej tein amo sayoj kinextijkej ichikaualis, ta no ke teiknelia (Marcos 1:40-42). Katka kualtakat iniuan nochin uan amo akin kichikoitaya. Ika tein kiniluiaya, Jesús kinyolchikauaya uan kinpaleuiaya maj kichiakan tein kuali akin kikakiaj uan kipiayaj kuali ininyolo. Hasta motemakak maj kitajyouiltikan uan maj kimiktikan porin techtasojta tinochin. Sayoj ke okachi kintasojta akin kitakamatij tein tamachtij (xikonita Juan 15:13, 14).

MAJ OKACHI TIMOMACHTIKAN

Maj okachi tikixmatikan Jesús uan maj tikitakan keniuj uelis titetasojtaskej uan tiktemakaskej tein tikpiaj kemej yejua kichiuak.

4. Jesús kitasojta iPopaj

Ika tein Jesús kichiuak techmachtij keniuj uelis tiktasojtaskej Jiova. Xikitakan Lucas 6:12; Juan 15:10 uan 17:26. Keman nankiitaskej sejse texto ika xitajtokan nejin:

Keman tikitaj tein kichiuak Jesús, ¿keniuj no uelis tiknextiliskej Jiova ke tiktasojtaj?

Jesús kichiua netataujtil. — Jesús semi kitasojtaya iPopaj uan nochipa kichiuaya netataujtil.

5. Jesús kiita tein kinpoloua oksekin

Jesús amo sayoj itech tanemiliaya, ta okachi ininka motekipachouaya oksekin. Uan maski sioujtoya kikuia itiempo uan ichikaualis para kinpaleuis oksekin. Xikitakan Marcos 6:30-44 uan ika xitajtokan nejin:

Kemej nikan kinextia, ¿keniuj Jesús kitemoj kinpaleuis oksekin? (Xikitakan versículos 31, 34, 41 uan 42).
¿Keyej kinpaleuij Jesús akin kinajsito? (Xikitakan versículo 34).
Kemej Jesús senkis kichiuani kemej iPopaj, ¿toni mitsonmachtia kemej tamati Jiova?
¿Keniuj no uelis timotekipachoskej ininka oksekin kemej Jesús kichiuak?

Jesús kintamaka miakej takamej, siuamej uan konemej keman ika se ueyi tachiualis kimiakiltia makuil pantsitsin uan ome amichimej. Imomachtijkauan kinxejxelouiliaj oksekin.

6. Jesús kiuelitaya kitemakas tein kipiaya

Maski Jesús amo kipiaya miak taman, kiuelitaya kitemakas tein kipiaya uan techiluia maj no ijkon tikchiuakan. Xikitakan Hechos 20:35 uan ika xitajtokan nejin:

¿Toni kijtoj Jesús ke techpaleuia maj tiyolpakikan?

Xikitakan VIDEO uan ika xitajtokan nejin:

VIDEO: “Kachi yolpaktok [...] ten tapaleuijtinemi [...] ke ne [...] ten sayo kiselia” (taxelol) (4:00)

¿Toni uelis tiktemakaskej maski amo tikpiaskej miak taman?

¿Tikonmatia?

Biblia kijtoua ke moneki tikchiuiliskej netataujtil Jiova itokaykopa Jesús (xikitakan Juan 16:23, 24). Ijkon tiknextiaj ke tikpatiuitaj tein Jesús kichiuak para techpaleuis maj kuali timouikakan iuan Jiova.

TEIN SEKIN KIJTOUAJ: “Dios kichiua maj titajyouikan”.