TAMACHTILIS 46
¿Keyej moneki timotemaktiskej iuan Jiova uan timoauiskej?
Keman aksa motemaktia iuan Jiova, kiluia itech se netataujtil ke sayoj yejuatsin kiueyichiuas uan ke kiitas ke okachi moneki kichiuas tein Dios kineki (Salmo 40:8). Uan keman moauia kinnextilia oksekin ke motemaktijya iuan Jiova. Timotemaktiskej iuan Jiova yejua tein okachi moneki tein uelis tikixpejpenaskej. Nejin semi moneki porin kipata tonemilis. ¿Toni kichiuas xionmotemakti?
1. ¿Toni kichiua maj timotemaktikan iuan Jiova?
Netasojtalis kichiua maj tiknekikan timotemaktiskej iuan Jiova (1 Juan 4:10, 19). Biblia techiluia: “Xiktasojtakan in Toueyitekotsin to Dios ika nochi namoyolo uan ika nochi namotanejnekilis, uan ika nochi namotanemililis uan ika nochi namochikaualis” (Marcos 12:30). Tiknextiaj ke tiktasojtaj Jiova ika tein tikijtouaj uan tikchiuaj. Ijkon kemej se takat uan se siuatsin akin yekmelauj motasojtaj kiixtaliaj monamiktiskej, keman yekmelauj tiktasojtaj Jiova tikixtaliaj timotemaktiskej iuan uan timoauiskej.
2. ¿Keniuj kintatiochiuia Jiova itaixpantijkauan akin moauijkejya?
Keman tejuatsin tionmoauis no tionpouis iniuan ichankauan Jiova akin semi yolpakij. Ika miak taman tikonitas keniuj Dios mitsontasojta uan okachi iuan tionmotokis (xikonita Malaquías 3:16-18). Jiova amo sayoj yeski moTajtsin, ta no noyampa taltikpak tikonpias mochankauan akin kitasojtaj Jiova uan no tejuatsin (xikonita Marcos 10:29, 30). Sayoj ke, achto ke tionmoauis moneki tikonchiuas seki taman. Moneki tikonixmatis Jiova, tikontasojtas uan tikonnextis ke tiontakuaujtamati iuan iKonetsin. Uan no, moneki tikoniluis Jiova ke tikonmaktilis monemilis. Komo tikonchiua nochi nejin uan tionmoauia, uelis tionyolpakis nochipaya. ITajtol Dios kijtoua: “Neauilis [...] namechmakixtijtok” (1 Pedro 3:21, TNM).
MAJ OKACHI TIMOMACHTIKAN
Maj tikitakan keyej semi moneki xionmotemakti iuan Jiova uan xionmoaui.
3. Tinochin moneki tikixtaliskej akoni tikueyichiuaskej
Ne uejkauj itech xolal Israel, sekin kinemiliayaj ke ueliskia kiueyichiuaskej Jiova uan no dios Baal, sayoj ke mopolojtoyaj. Yejua ika Jiova kititanik Elías, se takat akin kitematiltiaya tein Dios kijtouaya, maj kiniluiani maj mopatakan. Xikitakan 1 Reyes 18:21 uan ika xitajtokan nejin:
¿Toni monekik kiixtaliskej israelitas?
Ijkon kemej israelitas, tejuan no moneki tikixtaliskej akoni tiktekitiliskej. Xikitakan Lucas 16:13 uan ika xitajtokan nejin:
¿Keyej amo uelis tikueyichiuaskej Jiova uan no aksa oso teisa?
¿Toni uelis tikchiuaskej para maj Jiova kiita ke tikixtalijkej yejuatsin tikueyichiuaskej?
4. Xikonnemili keniuj mitsontasojta Jiova
Jiova techtayokoliani miak taman tein kipia ipatiuj. Uan tejuan, ¿toni uelis tikmakaskej? Xikitakan VIDEO.
¿Keniuj Jiova mitsonnextiliani ke mitsontasojta? Xikitakan Salmo 104:14, 15 uan 1 Juan 4:9, 10, uan ika xitajtokan nejin:
¿Toni tein Jiova techtayokoliani okachi tikontasojkamati?
Keman tikonnemilia tein Jiova mitsontayokoliani, ¿toni tikonmachilia?
Keman aksa techtayokolia teisa tein semi tikuelitaj, tiknekij maj kimati ke semi timotasojkamatij. Xikitakan Deuteronomio 16:17 uan ika xitajtokan nejin:
Keman tikonnemilia nochi tein Jiova mitsonmakani, ¿tikonneki tikonmakas teisa? ¿Toni tikonmakaskia?
5. Komo timotemaktiaj iuan Jiova uelis tikseliskej miak tatiochiualismej
Miakej kinemiliaj ke komo semi kinixmatij, kipiaj se kuali nemachtil oso tomin, uelis kichiuas maj yolpakikan. Sayoj ke, ¿yekmelauj nejon? Xikitakan VIDEO uan ika xitajtokan nejin:
Maski akin moita itech video semi kiuelitaya mauiltis fútbol, ¿keyej kikauak?
Yejua kiixtalij motemaktis iuan Jiova uan amo mauiltisok, ¿tikonnemilia ke kuali tein kiixtalij? ¿Keyej?
Achto ke mochiuaskia imomachtijkauj Cristo, tatitanil Pablo ueliskia kipias miak taman porin kiselij se kuali nemachtil. Akin kimachtij semi kiixmatiaj uan tamachtiaya ika inintanauatil judíos. Sayoj ke kikauak nochi para mochiuas imomachtijkauj Cristo, ¿kinemilij ke amo kuali tein kichiuak? Xikitakan Filipenses 3:8 uan ika xitajtokan nejin:
¿Keyej Pablo kijtoj ke tein kichiujka achto ke mochiuaskia imomachtijkauj Cristo katka kemej yeskia “tajsol san”?
¿Toni kiselij keman kikauak nochi?
¿Tikonnemilia ke okachi kuali komo tikonixtalia tikontekitilis Jiova? ¿Keyej ijkon tikonijtoua?
Keman Pablo mochiuak imomachtijkauj Cristo, kiselij okachi ke tein kikauak.
TEIN SEKIN KIJTOUAJ: “Nenkaj maj se motemakti iuan Dios”.
¿Tikonnemilia ke nenkaj maj se motemakti iuan Jiova? ¿Keyej?
TEIN TIKITAKEJ
Netasojtalis tein tikpialiaj Jiova kichiuas maj tiknekikan timotemaktiskej iuan uan maj timoauikan.
Maj tikelnamikikan
¿Keyej kinamiki Jiova maj tiktasojtakan ika nochi toyolo uan maj tikueyichiuakan?
¿Toni kinmaka Jiova itaixpantijkauan akin moauijkejya?
¿Tikonuelitaskia tionmotemaktis iuan Jiova?
NO XIKONITA NEJIN
Xikonita keyej kiixtalijkej motemaktiskej iuan Jiova se akin kantarouaya uan se akin mauiltiaya.
Telpochmej uan ichpochmej tajtanij… ¿Toni nikchiuas ika nonemilis? Keman nikita tein nikauak (6:54)
Xikonita okseki taman tein mitsonpaleuis xionmotemakti iuan Jiova.
“¿Por qué hay que dedicarse a Jehová?” (La Atalaya, 15 de enero de 2010)
Xikonita itech nejin video ika tatsotson keniuj yolpakij akin motemaktiaj iuan Jiova.
Xikonita toni kipaleuij se siuatsin maj kiyekita toni okachi kitayekanaltiaya, kampa techtapouiaj ininnemilis “Durante años me pregunté para qué estamos aquí”.
“La Biblia les cambió la vida” (La Atalaya, 1 de noviembre de 2012)