TAMACHTILIS 55
Xiontapaleui itech monechikol
Itech nochi taltikpak, millones kiueyichiuaj Jiova ika yolpakilis itech miak nechikolmej. Yejuan semi kipatiuitaj tamachtilis uan tanauatilmej tein kiseliaj uan tapaleuiaj ika nochi ininyolo uan ika miak taman itech nechikol. ¿Ijkon tionmomachilia itech monechikol?
1. ¿Keniuj uelis tiontapaleuis ika motiempo uan ika mochikaualis itech nechikol?
Tinochin uelis titapaleuiskej itech nechikol. ¿Yetokej akin xiuejkejya oso mokokouaj kampa tejuatsin tionyoui? ¿Uelis tiontapaleuis maj yakan nechikolmej? ¿Oso ueliskia tikonchiuas okseki taman, kemej tionyas tikonkouatiuj tein moneki oso tiontachipauas ininchan? (Xikonita Santiago 1:27). No uelis tiontapaleuis keman motachipaua itech Kali kampa tiMosentiliaj oso keman kiyektaliaj seki taman. Amo akin techchikaujkauia maj tikchiuakan nejin, tikixtaliaj timotemakaskej tikchiuaskej porin tiktasojtaj Dios uan tokniuan (Salmo 110:3).
Itaixpantijkauan Jiova akin moauijkejya uelis tapaleuiskej itech nechikol ika okseki tekimej. Tokniuan takamej akin kichiuaj tein Biblia kijtoua uelis mochiuaskej tapaleuianij itech nechikol uan tayekananij. Uan nochin tokniuan takamej uan siuamej uelis okachi tanojnotsaskej komo mochiuaj precursores. Uan no, seki tokniuan tapaleuiaj keman mochijchiuaj kalmej kampa titaueyichiuaj oso youij tapaleuitij itech okse nechikol.
2. ¿Keniuj uelis titapaleuiskej itech nechikol ika totomin uan okseki taman tein tikpiaskej?
Biblia kijtoua: “Xikueyitali Jiova ika tein tikpia tein kipia ipatiuj” (Proverbios 3:9). Tejuan tikitaj se tatiochiualis tiktemakaskej totomin uan okseki taman tein tikpiaj para titapaleuiskej itech tonechikol uan maj motanojnotsa itech nochi taltikpak (xikonita 2 Corintios 9:7). Uan ika tomin tein tiktemakaj no titapaleuiaj kampa mochiua se tetsauit. Miakej kixelouaj inintomin para kitemakaskej (xikonita 1 Corintios 16:2). Uelis titemakaskej itech kaxontsitsin tein yetokej itech kalmej kampa titaueyichiuaj oso itech Internet xikontemo donate.jw.org. Jiova techkaua maj tikuikan tein tikpiaj para tiknextiliskej ke tiktasojtaj.
MAJ OKACHI TIMOMACHTIKAN
Maj tikitakan seki taman kemej uelis tiontapaleuis itech nechikol.
3. Uelis tikonkuis tein tikonpia
Jiova uan Jesús kintasojtaj akin kitemakaj ika yolpakilis. Jesús kiitak tein monekik kichiuas se siuatsin akin amo semi teyi kipiaya uan amo nemiaok itakauj para uelis kitemakas tein kipiaya. Xikitakan Lucas 21:1-4 uan ika xitajtokan nejin:
¿Moneki titemakaskej miak tomin para tikyolpaktiskej Jiova?
¿Keniuj momachiliaj Jiova uan Jesús keman tiktemakaj ika nochi toyolo?
Para tikonmatis keniuj motekitiltia tomin tein tiktemakaj, xikitakan VIDEO uan ika xitajtokan nejin:
¿Keniuj tomin tein tiktemakaj kinpaleuia nechikolmej itech nochi taltikpak?
4. Uelis tikonixtalis tiontapaleuis
Itekitikauan Jiova ne uejkauj, tapaleuiayaj ika yolpakilis keman kiyekchijchiuayaj kampa taueyichiuayaj uan amo sayoj kitemakayaj tomin. Xikitakan 2 Crónicas 34:9-11 uan ika xitajtokan nejin:
¿Toni kichiujkej israelitas para kiyekpiaskej “ichan Jiova”, oso kampa kiueyichiuayaj?
Para tikonitas keniuj itaixpantijkauan Jiova no ijkon kichiuaj, xikitakan VIDEO uan ika xitajtokan nejin:
¿Keyej moneki maj chipauak uan maj nochi kuali yeto itech Kali kampa tiMosentiliaj?
¿Keniuj uelis tiontapaleuis tejuatsin?
5. Tokniuan takamej uelis mochikauaskej kiseliskej okachi tekimej
Biblia kinyolchikaua tokniuan takamej maj kitemokan okachi kitekitiliskej Jiova, para okachi tapaleuiskej itech nechikol. Para tikonixmatis se tokniuj akin uelik kichiuak, xikitakan VIDEO uan ika xitajtokan nejin:
¿Toni kichiuak Ryan para okachi kitekitilis Jiova uan tapaleuis itech nechikol?
Biblia kijtoua tein moneki kichiuaskej tokniuan takamej para mochiuaskej tapaleuianij itech nechikol uan tayekananij. Xikitakan 1 Timoteo 3:1-13 uan ika xitajtokan nejin:
¿Toni moneki kichiuaskej tokniuan takamej akin kinekij mochiuaskej tapaleuianij uan tayekananij?
¿Toni moneki kichiuaskej ininchankauan? (Xikitakan versículos 4 uan 11).
Komo tokniuan takamej mochikauaj kichiuaskej nejin tein Biblia kijtoua, ¿keniuj tapaleuia itech nechikol?
TEIN SEKIN UELIS MITSONTAJTANISKEJ: “¿Kani kikuij tomin itaixpantijkauan Jiova para nochi tein kichiuaj?”.
¿Toni tiontanankiliskia?
TEIN TIKITAKEJ
Jiova kipatiuita nochi tein tikchiuaj para titapaleuiskej itech nechikol, ika totiempo, tochikaualis uan tein tikpiaj.
Maj tikelnamikikan
¿Keniuj ika totiempo uan tochikaualis uelis titapaleuiskej itech nechikol?
¿Keniuj uelis titapaleuiskej itech nechikol ika tein tikpiaj?
¿Keniuj tikonuelitaskia tiontapaleuis itech nechikol?
NO XIKONITA NEJIN
Xikonita keyej Dios amo kichia maj itekitikauan kitemakakan diezmo.
Xikonita toni kijtosneki maj aksa “kineki mochiuas keme tayekanke”.
“¿Tionmochikaujtok tikonajsis kuali tekit?” (Tanejmachtijkej, 15 metsti septiembre xiuit 2014)
Xikonixmati seki itaixpantijkauan Jiova akin yolchikaujkej uan motemakaj tajyouiskej para maj tokniuan kipiakan amaixmej.
Momoyaua amaixmej tein mokixtiaj itech Biblia ompa Congo (4:25)
Xikonita keniuj tekit tein tikchiuaj taman kemej moixtaua uan amo kemej okseki taneltokalismej.
“¿Keniuj moixtaua tekit tein kichiuaj itaixpantijkauan Jiova?” (Tamachtilis itech jw.org/ncj)