¿Keyej uelis se kineltokas uejueyi tachiualismej tein ika tajtoua Biblia?
KOMO aksa mitsontapouia se taman tein tikonmoujkakaki, amo sayoj mitsonpaleuis xikonneltoka kemej mitsontapouis, ta no keniuj moixmati nejon taltikpaknenkej. Komo nochipa mitsoniluiani tein melauak uan amo keman kitemouani mitsonkajkayauas, tejuatsin uelis tikonneltokas tein mitsontapouis.
No ijkon panoua ika uejueyi tachiualismej tein ika tajtoua Biblia. Nion semej tinemiaj keman mochiuak nejon. Sayoj ke kemaj ueli tikmatij ox uelis tikneltokaskej oso amo. ¿Keniuj? Maj tikitakan makuil taman tein kichiua maj okachi tikneltokakan tein kijtoua Biblia:
Miak uejueyi tachiualismej mochiujkej senteixtenoj. Kemansa, miles oso millones taltikpakneminij kiitakej (Éxodo 14:21-31; 19:16-19). Amo mochiujkej ichtaka, ta ininixtenoj taltikpakneminij.
Amo motemouaya maj kimoujkaitakan. Amo tayekchijchiuayaj nion taxojxotaltiayaj kampa mochiuayaj. Miakpa, uejueyi tachiualismej oso mouiskatekimej mochiujkej keman mosenajsiaj oso aksa tajtania nepaleuil (Marcos 5:25-29; Lucas 7:1-16). Nejon uejueyi tachiualismej amo moixtaliayaj keniuj mochiuaskej.
Amo kitemouayaj ika moteixmatiltiskej, moueyichiuaskej, nion motomintiskej. Akin kichiuayaj kitemouayaj ika kiueyichiuaskej Dios (Juan 11:1-4, 15, 40). Akin kinekia motomintis ika nejon uejueyi tachiualismej kitatsakuiltiayaj (2 Reyes 5:15, 16, 20, 25-27; Hechos 8:18-23).
Kemej tel tataman mochiuayaj, kinextia ke amo kichiuaya se taltikpaknenkej. Kemej neskayot, motamatilij ueyiat uan ejekat, at mokepak vino, mochiuak maj kioui uan maj takisa, akin mokokouayaj pajtikej, uan ixpopoyomej tachiakej. Nochi nejin uejueyi tachiualismej uan oksekiok, kinextiaj ke se taltikpaknenkej amo kipia nejon chikaualis tein ika kioliniskia itachijchiualis Dios, uan ijkon mochiuaskiaj nejon uejueyi tachiualismej oso mouiskatekimej (1 Reyes 17:1-7; 18:41-45; Mateo 8:24-27; Lucas 17:11-19; Juan 2:1-11; 9:1-7).
Akin kiitakej amo kijtojkej ke amo mochiujkej, nion akin taixnamikiaj. Akin kiixnamikiaj Jesús amo kijtojkej ke Lázaro amo miket katka keman kiajokuik. Amo ueliskiaj, porin naui tonal pachiujtoya (Juan 11:45-48; 12:9-11). Seki siglo satepan ijkuak Jesús momikilij, akin kijkuilojkej Talmud kisentokakej kinextijkej ke Jesús uelia kichiuaya uejueyi tachiualismej oso mouiskatekimej. Nejin judíos sayoj taomeyolotijkej kani ualeuaya ichikaualis. No ijkon, keman kintatajtanijkej itatojtokakauan Jesús, amo kintajtanijkej ox kichiujkaj se ueyi tachiualis oso mouiskatekit, ta kiniluijkej: “¿Tonika tanauatil oso akoni itenkopaka nankichiutinemij nochi nijin chiualisme?” (Hechos 4:1-13).
Axkan, ¿uelis tikneltokaskej uejueyi tachiualismej tein ika tajtoua Biblia? Ika makuil taman tein tikitakej, moyeknextia ke uelis senkis tikneltokaskej. Uan moajsi okseki taman keyej uelis tikneltokaskej. Kemej neskayot, keman iTajtol Dios ika tajtoua se tachiualis, kijtoua tonal, kani, uan inintokay taltikpakneminij akin ompa moajsiaj. Hasta motelmachtianij kimoujkaitaj, porin nochi tein Biblia kijtoua ajsitok. Uan tel miak tein achtook moijtojka itech Biblia mochiuakya, senkis ijkon kemej ijkuiliujtoya. Uan no, Biblia tayolmajxitia keniuj kuali timouikaskej iniuan oksekin, uan nejin kinpaleuiani taltikpakneminij akin tataman xiujmej uan tataman nemilis kipiaj. Amo moajsij okseki tayolmajxitilismej kemej nejin tein Biblia kitemaka.
Komo ayamo senkis tikonneltoka tein kijtoua Biblia, timitsonyoleuaj okachi xikonita ika nejmachkayot. Ijkon kemej okachi tionmomachtis okachi tikonneltokas tein kijtoua (Juan 17:17). Keman tikonneltokas tein kijtoua Biblia ika uejueyi tachiualismej tein mochiujkej ne uejkauj, uelis tikonneltokas ke tein Biblia kijtoua ika tein panos amo uejkaua, mochiuas.
[Taixkopin itech página 5]
Akin kiixnamikiaj Jesús amo kijtojkej ke Lázaro amo miket katka keman kiajokuik