Uejueyi tachiualismej tein amo uejkaua mochiuaskej
XIKONNEMILI ke se tapajtijkej mitsontekiti, sayoj ke amo tikonmatia ke amo keman kitekini aksa ijkon kemej tejuatsin moneki mitsontekis. ¿Keniuj tionmomachiliskia? Semi tionmotekipachoskia, ¿melauj? Sayoj ke, ¿melauj ke amo ijkon panoskia komo nejin tapajtijkej kintekini miakej uan tel kuali kichiuani kemej tejuatsin mitsontekiti? Tikonmatis nejon, mitsonpaleuis amo xionmotekipacho.
Nejin taltikpak kemej yeskia no mokokoua uan moneki se ueyi tapajtilis. Jiova motenkauani itech iTajtol, Biblia, ke kichiuas taltikpak se xochital (2 Pedro 3:13). Sayoj ke, achto moneki senkis kijkuanis nochi tein amo kuali (Salmo 37:9-11; Proverbios 2:21, 22). Nejin taltikpak amo uelis mochiuas se xochital komo amo moijkuania nochi uejueyi kuejmolmej tein kipiaj taltikpakneminij. ¡Yekmelauj moneki se mouiskatekit oso se ueyi tachiualis! (Apocalipsis [Revelación] 21:4, 5.)
Itaixpantijkauan Jiova takuaujtamatij ke amo uejkaua mopatas nochi nejin. ¿Keyej? Porin uejueyi tachiualismej tein Dios kichiuani kinextia ke kipia chikaualis uan ijkon kichiuas nochi tein motenkaujtok. Maj tikitakan keniuj mouikaj chikuasen uejueyi tachiualismej tein moajsij itech Biblia iuan tein Dios motenkaujtok kichiuas satepan.
Timitsonyoleuaj xikonixmati okachi tein Biblia kijtoua ke mochiuas. Ijkon kemej moskaltijtiyas motakuaujtamatilis, okachi tikonchias maj mitsonpaleui uejueyi tachiualismej tein Jiova amo uejkaua kichiuas.
[Recuadro/Taixkopin itech página 7]
UEYI TACHIUALIS:
JESÚS KINTAMAKAK TEL MIAKEJ TALTIKPAKNEMINIJ IKA SAYOJ SEKI PANTSIN UAN SEKI AMICHIMEJ. (MATEO 14:13-21; MARCOS 8:1-9; JUAN 6:1-14)
TEIN DIOS MOTENKAUA:
“Nikan taltikpak yekmelauj moteltachiuas; Dios, toDios, techtatiochiuis.” (SALMO 67:6)
KENIUJ TECHPALEUIS:
AMO AKIN KIJYOUISOK MAYAN.
UEYI TACHIUALIS:
JESÚS KICHIUAK MAJ TACHIAKAN AKIN AMO TACHIAYAJ. (MATEO 9:27-31; MARCOS 8:22-26)
TEIN DIOS MOTENKAUA:
“Ininixtololouan ixpopoyomej tapouiskej.” (ISAÍAS 35:5)
KENIUJ TECHPALEUIS:
NOCHIN AKIN AMO TACHIAJ TACHIASKEJ.
UEYI TACHIUALIS:
JESÚS KINPAJTIJ AKIN AMO KUALI YETOYAJ. (MATEO 11:5, 6; JUAN 5:3-9)
TEIN DIOS MOTENKAUA:
“Koxoj ajkotsikuinis ijkon kemej kichiua masat.” (ISAÍAS 35:6)
KENIUJ TECHPALEUIS:
PAJTISKEJ NOCHIN AKIN AMO KUALI YETOKEJ.
UEYI TACHIUALIS:
JESÚS KINPAJTIJ AKIN KIPIAYAJ TATAMAN KOKOLISMEJ. (MARCOS 1:32-34; LUCAS 4:40)
TEIN DIOS MOTENKAUA:
“Nion se taltikpaknenkej kijtos: ‘Nimokokoua’.” (ISAÍAS 33:24)
KENIUJ TECHPALEUIS:
AMO ONKASOK NION SE KOKOLIS UAN AMO KEMAN TIKOKOLISPEUASKEJOK.
UEYI TACHIUALIS:
JESÚS KITAMATILIJ EJEKAT UAN AT. (MATEO 8:23-27; LUCAS 8:22-25)
TEIN DIOS MOTENKAUA:
“Uan yekmelauj kinchijchiuaskej kalmej uan ompa chanchiuaskej, yekmelauj kitokaskej uvajmekat uan kikuaskej takilot. Amo nenkaj motekitiltiskej.” (ISAÍAS 65:21, 23)
“Uejka timoajsis itech [...] teisa tein tel temoujtij, porin amo mitsajsitiuj.” (ISAÍAS 54:14)
KENIUJ TECHPALEUIS:
AMO MOCHIUASOK TETSAUJMEJ.
UEYI TACHIUALIS:
JESÚS KINAJOKUIK MIKEMEJ. (MATEO 9:18-26; LUCAS 7:11-17)
TEIN DIOS MOTENKAUA:
“Nochin akin yetokej itech miketekochmej tein moelnamikij [...] kisaskej.” (JUAN 5:28, 29, Traducción del Nuevo Mundo de las Santas Escrituras [TNM])
“Ueyiat kintemakak mikemej tein ompa yetoyaj, uan mikilis uan Hades kintemakakej mikemej tein ompa yetoyaj.” (REVELACIÓN 20:13, TNM)
KENIUJ TECHPALEUIS:
NOCHIN AKIN TIKINTASOJTAJ MOAJOKUISKEJ.