¿Keyej kisentokaj moajsij akin amo monejnemiltiaj melaujkej?
“Taltikpaknenkej kiixyekanani taltikpaknenkej uan ijkon kitajyouiltia.” (ECLESIASTÉS 8:9)
NEJIN tajtolmej tel kuali kimelaua tein kichiuanij taltikpaktekiuanij akin inintajtakol maj onka tel miak tajyouilis. Itech nochi xiujmej tein panouanij, sekin taltikpakneminij kipianij se kuali tanemilil uan kitemouanij kichiuaskej maj onka melaujkayot, sayoj ke miakpa kiitanij ke amo uelij kichiuaj nejon porin tel nemij akin xijxikuimej uan akin amo monejnemiltiaj melaujkej. ¿Keyej panoua nejon? ¿Keyej kisentokaj kichiuaj tein amo melauak? Porin moajsi eyi taman tein okachi kinuika maj kichiuakan nejon.
1. Ichikaualis tajtakol.
Biblia kiyeknextia ke “techkitskijtinemi in chikaualis den tajtakol” (Romanos 3:9). Uelis tikijtoskej ke tajtakol tein totech moajsi tamati kemej se kokolis tein tikseliaj uan amo kipia pajti. Tel miak xiujmejya, tajtakol kinixyekanani taltikpakneminij kemej yeskia se tekiuaj. Uan tajtakol kisentoka techyekana. Nejin kinuika tel miakej maj kitayekanaltikan sayoj inintanejnekilis oso maj kitemokan motomintiskej oso kipiaskej ueyi tanauatil maski kinijtakoskej oksekin (Romanos 5:21; 7:17, 20, 23, 25).
2. Tanemilil tein amo kuali tein onkak nikan taltikpak kampa tinemij.
Kampa tinemij tel miakej moajsij akin xijxikuimej uan sayoj kitemouaj inintanejnekilis. Yejua ika sekin semi kinouijmaka yeskij tamamej. No kinejnekij kipiaskej nochi tein kinekij, kitemouaj kipiaskej tanauatil uan kitelnekij kipiaskej tomin uan okseki taman tein amo yekmelauj kinpoloua. Tetayokoltij tikijtoskej ke yejuan kitemouaj kiajsiskej tein kinekij maski amo ika melaujkayot. Uan amo kiixtopeuaj nejon tanemililmej tein amo kuali, ta ‘kintojtokaj miakej taltikpakneminij uan ijkon kichiuaj tein amo kuali’ (Éxodo 23:2).
3. Ichikaualis Amokuali Satanás.
Satanás, se espíritu tein taixnamiki, “kinkajkayautinemi nochi in taltikpakuani” (Apocalipsis [Revelación] 12:9). Kiteluelita kitemos maj taltikpakneminij kichiuakan tein yejua kineki. Yejua kimati ke taltikpakneminij kinejnekij kipiaskej se kuali nemilis uan maj amo kinpolo tein ika moixpanoltiskej, yejua ika miakpa kinolinia maj kiajsikan nochi nejon maski takajkayauaskej.
¿Kijtosneki nejon ke nochipa timoajsij imako Satanás uan moneki tikchiuaskej tein yejua kineki? Itech okse tamachtilis tikajsiskej tanankilil.