Ojpatika netajtanil: ¿Toni nechpanos keman nimomikilis?

ROMAN konetok katka keman se itasojikniuj momikilij ijkuak mochiuak tein amo kuali ika teposmej. Yejua kijtoua: “Imikilis notasojikniuj semi nechijtakoj miak xiujmej. Niksentokaya nimotajtaniaya toni techpanoua keman timomikiliaj”.

¿Keyej mochiuiliaj nejin netajtanil?

Nochin taltikpakneminij kinouijmaka kineltokaskej ke aksa momikilij. Maski miak xiujmejya nenkej, amo kinekij momikiliskej. Miakej hasta kimouiliaj tein panoua satepan keman aksa momikilia.

¿Keniuj tanankiliaj sekin?

Miakej kijtouaj ke ijkuak aksa momikilia, teisa kisentoka nemi. Kineltokaj ke akin yolkualmej, kiseliskej tein kuali ne iluikak, uan akin amo yolkualmej tajyouitiuij miktan nochipaya. No moajsij akin kijtouaj ke ijkuak aksa momikilia, senkis tami uan satepan kielkauaj.

¿Toni kinextia nejon tanankilil?

Se tanankilil kiteajsikamatiltia ke amo akin yekmelauj momikilia, uan okse ke amo teyi onkak tein teualkuilia yolpakilis. Akin kijtouaj ke amo teyi onkak tein kuali, xa kipiaj nejin tanemilil: “Ma titatakuakan san uan ma timouintikan san porin mosta timikiske” (1 Corintios 15:32).

¿Toni tamachtia Biblia?

Kinextia ke amo teyi moajsi tein kisentoka nemi keman aksa momikilia. Dios kichiuak maj tekiuaj Salomón kijkuilouani nejin: “Akin yoltokej kiyekmattokej ke momikiliskej; sayoj ke akin momikilijkejya, yejuan amo kimatijok nion teyi” (Eclesiastés 9:5). Akin momikilijkejya, “amo kimatijok nion teyi”, amo kimatijok toni mochiua, tein kijtosneki ke amo ueli kichiuaj nion kimachiliaj nion se taman. Yejua ika, mikemej amo ueli kinpaleuiaj oso kinijtakouaj akin yoltokej.

Miakej kinemiliaj ke Dios techchijchiuak maj timomikilikan. Sayoj ke nejon nion tepitsin melauak. Keman kichijchiuak yekinika takat Adán, kinekia maj nemini nochipaya nikan taltikpak. Sayoj ika tajtoj mikilis keman kimatiltij Adán toni kipanoskia komo kikuaskia itakilo se kouit tein moajsia itech xochital. Yejuatsin kinejmachtij: “Yekmelauj timomikilis” (Génesis 2:17). Komo Adán uan Eva kitakamatiskiaj, yejuan uan ininkoneuan tein amo kikauaskiaj Dios, kisentokaskiaj nemiskiaj nochipaya nikan taltikpak.

Sayoj ke Adán amo kichiuak tein Dios kiiluij; tajtakoj keman amo kitakamatik uan yejua ika momikilij (Romanos 6:23). Amo teyi kisentokakok nemik keman Adán momikilij. Sayoj amo nemiaok. Dios kiiluijka: “Ika moneton itech moixko tikajsis tein tikuas hasta keman timokepas itech tal porin ika tichijchiujtok. Porin titalnex uan talnex timokepas” (Génesis 3:19). Kemej tinochin tiikoneuan, tinochin tikselijkej tajtakol uan yejua ika timomikiliaj (Romanos 5:12).

Maski amo kuali tein Adán kiixpejpenak kichiuas, nejon amo kitsakuilis maj mochiua itanejnekilis Dios. Yejuatsin kinekia maj nikan taltikpak momiakilianij ikoneuan Adán akin amo kipiaskiaj tajtakol, uan ijkon mochiuas (Génesis 1:28; Isaías 55:11). Amo uejkaua, Jiova oksepa kinmakas nemilis tel miakej akin momikilijkejya. Kemej kijtoj tatitanil Pablo, moajokuiskej “amo sayo in yolkualime. Ta, no nekes ten amo yolkualime” (Hechos 24:15).

Tikonajsis okachi nemachtil kampa kimelaua toni techpanoua keman timomikiliaj, itech amaix ¿Toni yekmelauj tamachtia Biblia? itech capítulo 6. Uelis tikonkixtis itech www.jw.org/ncj

¿Toni tamachtij Jesús tein techpanoua keman timomikiliaj?

Maski sekin tayekananij itech taneltokalis tein nemiaj itech itonaluan Jesús amo kineltokayaj ke oksepa nemiskiaj akin momikilijkej, yejua amo ijkon kineltokaya (Lucas 20:27). Uan amo no tamachtij ke teisa kisentoka nemi keman aksa momikilia. Komo amo, ¿toni tamachtij?

Kinextij ke mikilis tamati kemej kochilis. Keman momikilij Lázaro, Jesús kijtoj: “Axkan ne totasojikniu Lázaro, yejua axkan kochtok san. Pero axkan Nejuatsin niyo nikijxititi”. Kemej imomachtijkauan amo kiajsikamatkej, kijtojkej: “Totekotsin, takan melau kochtok san motasojikniu Lázaro, ijkuakon oksepa ixpetanis”. Tajkuilol kijtoua ke “Jesús kinekia kinyekajsikamatiltis ke ne Lázaro mikik ya. Pero imomachtijkauan [...] kinemiliayaj ke in Jesús [tajtojtoya] de ke Lázaro [moseuijtoya] san tech in kochilis. Ijkuakon in Jesús oksepa kinyekajsikamatiltij imomachtijkauan ijkuin: -Yek melau, Lázaro miyik ya” (Juan 11:11-14).

Kijtoj ke akin momikilijkej oksepa nemiskej. Keman Jesús yajki itech altepet kampa nemia Lázaro, ajsik naui tonal satepan keman yejua momikilij. Yejua kinekia kiyolchikauas Marta, yejua ika kiiluij: “Moknitsin oksepa pankisas yoltok”. Satepan moyektenkauak: “Nejuatsin nikinyolitia in animajme [oso mikemej] uan nikinmaka nemilis oksepa. Uan nochi ten nouan yek takuautamati, yejua ne maski momikilis ya, pero oksepa yoltinemis”. Satepan kinextij ke amo sayoj tajtojtoya, ta oksepa kimakak nemilis Lázaro ininixpan miakej (Juan 11:23, 25, 38-45).

Keman Jesús kiitaltij Juan se taman, yejua oksepa kijtoj ke kinmakas nemilis akin momikilijkej. Kijtoj ke ejkos tonal keman mikilis kemej yeskia kinmajkauas akin kinkitskijtok (Apocalipsis [Revelación] 20:13).