TAMACHTILIS ITECH IPEUJYAN AMAIX: ¿KEMANIAN AMO TECHIKOITASKEJOK?
Tachikoitalis, moita noyampa taltikpak
JONATHAN, akin kayot Estados Unidos uan itatuan coreanos, semi kichikoitakej keman katka konet. Keman moskaltij, kitemoj yas kampa amo kichikoitaskiaj porin taman ixtamatia. Mochiuak tapajtijkej uan mokaltalito itech se xolal tein moajsia norte uan pouia Alaska (Estados Unidos). Ompa miakej akin kinpajtiaya, ixtamatiaj kemej yejua. Kinemiliaya ke ijkon kisaskia kampa semi kichikoitayaj uan ajsiskia kampa amo ijkon kiitaskiaj.
Sayoj ke, senkis mopatak tein kichiaya keman kipajtij se siuat akin kipiaya 25 xiujmej uan amo talnamikiaok. Keman yejua ixpetanik uan kiixitak Jonathan, kiuijuikaltij. ¿Keyej? Porin kintauelitaya coreanos. Nejon tein kipanok Jonathan tein semi kiyolkokoj, kiajsikamatiltij ke nenkaj kitemo yas okseko porin amo kinekiaok maj kichikoitanij.
Tein kipanok Jonathan kinextia se taman tein tetayokoltij: tachikoitalis moajsi hasta kampa okachi uejka itech taltikpak. Moita ke kampa moajsij taltikpakneminij onkak tachikoitalis.
Maski tachikoitalis moajsi noyampa, miakej taltikpakneminij amo kuali kiitaj. Nejon semi ouij se kineltokas. ¿Keyej tel onkak se taman tein tel amo kinyolpaktia? Moyekmati ke miakej akin amo kinyolpaktia tachikoitalis, amo kimatij ke yejuan no kinextiaj. ¿Xa no yejua mitsonpanoua?
TINOCHIN TIKPIAJ TACHIKOITALIS
Taltikpaknenkej semi kiouijmaka kimatis ox iyolijtik tepitsin techikoita. ¿Keyej? Biblia kimelaua: “Iyolo taltikpaknenkej okachi takajkayaua ke okseki taman” (Jeremías 17:9). Kemej tikitaj, uelis timokajkayauaskej keman tiknemiliskej ke tikyekitaj akin yeski oso tikneltokaskej ke onkak keyej tikinchikoitaskej seki taltikpakneminij.
¿Keniuj tionmomachiliskia komo tikonpanoskia tein moijtoj nikan?
Tein techpaleuis maj tikitakan ke semi ouij tikitaskej ox titechikoitaj, xikonnemili ke tionnejnentiuj youak kampa taseltijkan uan tayouayan. Ompa tikonita ome telpochmej akin amo tikonixmati uitsej kampa tionyetok. Moita ke semi chikaujkej uan se nesi ke teisa kiualkui imako.
¿Tikonnemiliskia ke teisa mitsonchiuiliskej? Xa tein mitsonpanouani mitsonmachtiani ke moneki tionmoyekpias, sayoj ke, ¿onkak keyej moneki tikonnemilis ke nejon ome telpochmej yekmelauj tamouililmej? Uan netajtanil tein okachi tayekantok yejua nejin: ¿kani tikonnemilia ke pouij? Ika tein tiontanankilis kinextis tein melauak. Uelis nesis ke itech moyolo no tepitsin tiontechikoita.
Komo tiyolmelaujkej tikyekijtoskej ke toyolijtik tepitsin titechikoitaj. Biblia ika tajtoua se taman tachikoitalis tein okachi moita. Ompa kijtoua: “Taltikpaknenkej kiita tein nesi tapani” (1 Samuel 16:7). Kemej tikitaj, tinochin tikchikoitaj aksa maski amo tikixmatij, uan kemansa kiualkui tein tel amo kuali. ¿Uelis timokixtiliskej tachikoitalis itech tonemilis? ¿Uelis se tonal nochin taltikpakneminij moajchiuiliskej?