NETAJTANILMEJ TEIN KISAJ ITECH BIBLIA

¿Kinkaki Dios nochin akin kitataujtiaj?

Dios kinkaki taltikpakneminij akin moajsij itech nochi taltikpak (Salmo 145:18, 19). ITajtol, Biblia, techyoleua maj tikiluikan nochi taman tein techtekipachos (Filipenses 4:6, 7). Sayoj ke amo kiyolpaktia kinkakis sekin akin kitataujtiaj, kemej akin kijtouaj sayoj tein ijkuiliujtok itech se amat. (Xikonixtajtolti Mateo 6:7.)

Amo kikaki keman kitataujtiaj akin kitapanauiliaj itanauatiluan (Proverbios 28:9). Kemej neskayot, ne uejkauj amo kinkakik israelitas akin temiktiayaj. Kemej tikitaj, moneki tikchiuaskej seki taman uan ijkon Dios techkakis. (Xikonixtajtolti Isaías 1:15.)

¿Toni moneki tikchiuaskej uan ijkon Dios techkakis?

Komo amo tikpiaj takuaujtamatilis, Dios amo uelis techkakis (Santiago 1:5, 6). Moneki tikyekneltokaskej ke nemi uan kitekipachoua tein techpanoua. Yejua ika moneki timomachtiskej iTajtol, ta moneki titakuaujtamatiskej porin tikajsij miak taman tein kinextia ke uelis se takuaujtamatis. (Xikonixtajtolti Hebreos 11:1, 6.)

No moneki tiktataujtiskej ika nochi toyolo uan timoyolyemaniskej kemej Jesús (Lucas 22:41, 42). Yejua ika, amo tikiluiskej Dios toni moneki kichiuas, ta tiktemoskej tikajsikamatiskej tein techtajtania. ¿Keniuj? Keman tikixtajtoltiaj Biblia. Ijkon, tein tiktataujtiskej mouikas iuan itanejnekilis. (Xikonixtajtolti 1 Juan 5:14.)