TAMACHTILIS ITECH IPEUJYAN AMAIX: ¿NOCHI TAMI KEMAN TIMOMIKILIAJ?
¡Amo tami nochi keman timomikiliaj!
Betania katka se xolal tein moajsia eyi kilómetros iuan Jerusalén (Juan 11:18). Ompa mochiuak se taman tein tetayokoltij seki semanas achto ke momikiliskia Jesús. Lázaro, akin kuali mouikaya iuan Tamachtijkej, kokolispeuak uan momikilij.
Keman Jesús kimatik nejin, kiniluij imomachtijkauan ke Lázaro kochtoya uan ke yejua yaskia kiijxititiuj (Juan 11:11). Sayoj ke kemej kiitak ke amo kiajsikamatkej, kinyekiluij: “Lázaro miyik ya” (Juan 11:14).
Naui tonal satepan ke Lázaro kipachojkej, Jesús ajsik Betania uan kitemoj Marta, iikniuj Lázaro uan ijkon iniuan yetoskia tepitsin. Marta kiiluij: “Tajkon Tejuatsin tiyetoskia nikan tochan, ijkuakon ne noknitsin Lázaro amo momikiliskia” (Juan 11:17, 21). Jesús kinankilij: “Nejuatsin nikinyolitia in [...] [mikemej] uan nikinmaka nemilis oksepa. Uan nochi ten nouan yek takuautamati, yejua ne maski momikilis ya, pero oksepa yoltinemis” (Juan 11:25).
“Lázaro, xiualkalankisa”
Kemej Jesús kinekia kinextis ke melauak tein motenkaujtoya, motokij kampa kipachojkej Lázaro uan kitsajtsilij: “Lázaro, xiualkalankisa” (Juan 11:43). Nochin kimoujkaitakej keman Lázaro kalankisak.
Achtoya, momati ke Jesús ipa kinajokka omen akin momikilijkaj. Semej katka isiuapil Jairo, uan itech nejon tonal no kijtoj ke siuapil kochtoya (Lucas 8:52).
Tikitaj ke keman Lázaro uan isiuapil Jairo momikilijkej, Jesús kijtoj ke kochtoyaj. Uan nejon semi melauak. ¿Keyej? Porin keman se kochi amo teyi se kimatiok uan kinamiki maj se kijto ke se moseuia uan amo se kimachiliaok tekokojkayot uan tajyouilis (Eclesiastés 9:5; xikonita recuadro “Mikilis kemej yeskia kuali se kochtoskia”). Yekinika imomachtijkauan Jesús kuali kiajsikamatiaj keniuj yekmelauj moajsij mikemej. Encyclopedia of Religion and Ethics kijtoua: “[Yejuan], kiitayaj mikilis kemej yeskia kochtoskiaj, uan taltekoch, kemej kampa moseuiaj [...] akin momikilijkej akin nochipa kitekitiliayaj Dios”.a
Techyolseuia tikmatiskej ke mikemej amo tajyouijtokej; ta kochtokej kampa kinpachojkej. Ijkon, tikmatij toni panoua keman timomikiliaj uan amo moneki tikmouiliskejok mikilis.
“KOMO SE TAKAT [...] MOMIKILIA, ¿UELIS OKSEPA NEMIS?”
Maski tinochin tikuelitaj kuali timoseuiskej, ¿melauj ke amo akin kiuelitaskia kochis nochipaya? ¿Uelis tikchiaskej maj oksepa nemikan mikemej akin kochtokej kampa kinpachojkej ijkon kemej Lázaro uan isiuapil Jairo?
Keman Job kimachilij ke yaya momikilitia tajtanik: “Komo se takat [...] momikilia, ¿uelis oksepa nemis?” (Job 14:14).
Job iselti monankilij keman kijtoj tein kichiuaskia Dios, Akin nochi ueli kichiua: “Tejua titanotsas, uan nejua nimitsnankilis. Tejua tiktelnejnekis tein momauan kichijchiujkej” (Job 14:15). Nejin takat akin amo keman kikauak Jiova kiyekmatia ke yejuatsin kinejnekia oksepa kimakas inemilis. ¿Sayoj mokajkayaujtoya? Amo.
Keman Jesús kinajokuik sekin akin momikilijkaj kiyeknextia ke Dios kimakak chikaualis maj kiajchiua mikilis. Tein melauj, Biblia kijtoua ke Jesús kipia “tanauatil [kemej yeskia llaves] ipan nochi nekes ten momikilijke” (Apocalipsis 1:18). Ika nejon llaves tatapos itech taltekoch, ijkon kemej tanauatij maj kijkuanianij tet tein ika tsaktoya kampa Lázaro kitalijkaj.
Biblia miakpa ika tajtoua ke Dios motenkauak ke mikemej oksepa nemiskej. Kemej neskayot, se ángel kiyekiluij tanauatijkej Daniel: “Timoseuis, sayoj ke timoajokuis uan tikuis tein moaxka itech itamian tonalmej” (Daniel 12:13). Keman Jesús kinnojnotstoya saduceos, taixyekananij itech taneltokalis akin amo kineltokayaj ke mikemej oksepa nemiskej, kiniluij nejin: “Nanmokajkayautokke san ika ne nexkuitil, porin amo nankiyekixmatij in Tajkuilolamatsin de Dios, nion no ichikaualis den Totajtsin Dios” (Mateo 22:23, 29). Uan tatitanil Pablo kijtoj: “Nitakuautamati iuan Dios de ke se tonal [...] kinpankixtis yoltokke nochi in [...] [mikemej], amo sayo in yolkualime. Ta, no nekes ten amo yolkualime” (Hechos 24:15).
¿KEMANIAN MOAJOKUISKEJ MIKEMEJ?
¿Kemanian oksepa nemiskej akin yolkualmej uan akin amo yolkualmej? “Itech itamian tonalmej”, kemej ángel kiiluij Daniel. Marta kineltokaya ke iikniuj moajokuiskia satepan itech “tonalme kuak pankisaske yoltokke nochi in [mikemej]” (Juan 11:24).
Biblia kinextia ke nejin “tonalme” yeski keman Jesús tekiuajtitos. Pablo kijkuiloj: “Cristo semi moneki ma tayekantinemi keme rey nikan taltikpak hasta in tonal kuak Totajtsin Dios kintamitanilis ya nochi nekes ten kixnamiktinemij Cristo. [...] Ijkuakon Yejuatsin kitamitanilis ya in mikilis uan amo teyi chikaualis kipia[s] ok” (1 Corintios 15:25, 26). Nejin se taman tein motelneki tein kinextia keyej moneki tiktajtaniskej Dios maj uiki iTekiuajyo uan maj mochiua itanejnekilis nikan taltikpak.b
Kemej Job kuali kimatia, Dios kineki oksepa kinmakas ininnemilis akin momikilijkejya. Keman ejkos nejon tonal, mikilis yekmelauj tamis, uan nion kemanok timotajtaniskej: “¿Nochi tami keman timomikiliaj?”.
a Tein melauj, tajtol miketekoch kisa itech se tajtol tein kijtosneki “kampa moseuiaj”.
b Komo tikonneki tikonmatis okachi ika iTekiuajyo Dios, xikonita capítulo 8 itech amatajkuilol ¿Toni yekmelauj tamachtia Biblia?, tein kichijchiujkej iTaixpantijkauan Jiova.