Jiova kitatiochiuij itakuaujtamatilis siuat akin nemia Sarepta

SE SIUAT akin amo nemiok itakauj uan kipanotok tatasojtilis kinaua ika yolpakilis iokichpil akin ipa setsin. ¡Amo ueli kineltoka tein mochiuak! Tepitsin achto maktoya ikonetsin miket. Sayoj ke axkan oksepa nemi uan kiixuetskilia. Siuat semi yolpaki. Takat akin mokaua ichan siuat, kiiluia: “Xikita, mokonetsin yoltok”.

Nejin neajokuilis tein teyolpaktij mochiuak kemej eyi mil xiuit achto uan moajsi itech 1 Reyes capítulo 17. Takat katka Elías, itanauatijkauj Dios, uan temomaj, se siuat akin amo moijtoua itokay akin momikilijkaya itakauj uan nemia itech altepet Sarepta. ¡Xa semi mochikauak itakuaujtamatilis ijkuak kiitak ke oksepa nemik ikonetsin! Maj tikitakan seki taman tein motelneki tein uelis techmachtis tein kipanok siuat.

ELÍAS KIIXMATI SE SIUAT AKIN TAKUAUJTAMATI

Jiova kijtojka ke miak tonalmej amo kiouiskia ompa Israel keman taixyekantoya Acab akin amo yolkuali katka. Satepan ke Elías kitematiltij ke tauaktoskia itech altepet, Dios kitatij uan ijkon Acab amo kiajsiskia, uan ika ichikaualis kitamakak ijkuak kichiuak maj seki cuervos kiuikilianij pantsin uan nakat. Satepan kiiluij: “Ximoketsteua uan xiyouj Sarepta, tein poui Sidón, uan ompa xinemiti. ¡Xikita! Yekmelauj niknauatis se siuat akin amo nemiok itakauj maj mitstamaka” (1 Rey. 17:1-9).

Keman Elías ajsik Sarepta kiitak se siuat akin kipanotoya tatasojtilis koujpejpentoya. ¿Yejua yeskia siuat akin kitamakaskia? ¿Ueliskia kichiuas, ta kitelpanotoya tatasojtilis? Maski Elías xa omeyolouaya, kinemilij kinojnotsas. Kiiluij: “Ika kualtakayot, xinechualkuili ika se tapalkat tepitsin at tein nitayis”. Keman yejua yajtoyaya kikuiti at, Elías no kiiluij: “Ika kualtakayot, xinechualkuili tsikitsin pantsin” (1 Rey. 17:10, 11). Siuat ueliskia kimakas tepitsin at, sayoj ke amo ueliskia kitamakas.

Siuat tanankilij: “Yekmelauj kemej Jiova moDios yoltok, amo nikpia nion se pantsin youaltik, ta sayoj nikpia sentamatsol harina itech se ueyi komit uan tepitsin aceite itech se tsikitsin komit; uan nikan nikpejpentok keski koujtatil, uan nikchijchiuatiuj tein tikuaskej nejua uan nokonetsin, uan satepan timayamikiskej” (1 Rey. 17:12). ¿Toni techmachtia tein monojnotskej?

Tajtolmej “yekmelauj kemej Jiova moDios yoltok” kinextia ke siuat kiitaya Elías kemej se israelita akin kimoujkatokaya Dios. Nesi ke tepitsin kiixmatia ininDios israelitas, sayoj ke amo senkis, yejua ika amo uelik kijtoj “noDios” ijkuak ika tajtoj Jiova. Siuat nemia Sarepta, tein moijtoua ke katka se altepet fenicia tein pouia Sidón, xa porin ompa taixyekanayaj. Akin nemiaj Sarepta xa kiueyichiuayaj Baal. Maski ijkon, Jiova kiitak teisa tein kuali itech iyolo nejon siuat akin kipanotoya tatasojtilis.

Maski kiyoualouayaj akin kinueyichiuayaj tiotsitsin, takuaujtamatia iuan Dios akin melauak. Jiova kititanik Elías maj youi ichan nejon siuat porin ijkon mopaleuiskia yejua uan kipaleuiskia siuat. Nejin techmachtia se taman tein motelneki.

Amo nochin akin nemiaj Sarepta kampa kiueyichiuayaj Baal, senkis amo kuali ininyolo kipiayaj. Ijkuak Jiova kititanik Elías ichan nejon siuat, yejuatsin kinextij ke kinita taltikpakneminij akin kipiaj se kuali yolo akin ayamo kitekitiliaj. Kemej tikitaj, “kiniknelia tagayot tech nochi in senmanauak komo yejuan kimouistiliaj Yejuatsin uan chipaukanentinemij” (Hech. 10:35).

¿Kanachimej akin tamatij kemej siuat akin nemia Sarepta moajsij kampa titanojnotsaj? Maski kampa nemij kinyoualouaj akin pouij itech taneltokalismej tein amo melaujkej, xa sekin kitemojtokej tein okachi kuali. Xa kiixmatij Jiova tepitsin oso nion teyi, uan yejua ika moneki maj aksa kinpaleui maj no kiselikan taueyichiualis tein melauak. ¿Timochikauaj tikinajsiskej uan tikinpaleuiskej nejon taltikpakneminij?

“ACHTO XINECHCHIJCHIUILI SE TSIKITSIN PANTSIN”

Axkan maj tikitakan tein Elías kitajtanij siuat. Yejua yekin kimelauilijka ke sayoj kipiaya tein kikuaskiaj sayoj sepa yejua uan ikonetsin uan satepan momikiliskiaj. Sayoj ke Elías kiiluij: “Amo ximomoujti. Xikalaki, uan xikchiua kemej tiknemilijtoya. Sayoj ke achto xinechchijchiuili se tsikitsin pantsin youaltik, uan xinechualkuili nikan altepetenoj, uan tein tikuas tejua uan mokonetsin uelis tikchijchiuas satepan. Porin yejua nejin kijtoua Jiova ininDios israelitas: ‘Harina tein kipia ueyi komit amo tamis, uan aceite tein kipia tsikitsin komit amo kaxanis, hasta keman Jiova takiouiltis itech taltikpak’” (1 Rey. 17:11-14).

Miakej xa kinemiliskiaj: “¿Maj nikmaka takual tein sayoj sepa techajsis? ¡Sayoj kamanalojtok!”. Sayoj ke ¿keniuj tanankilij siuat? Maski amo kuali kiixmatia Jiova, kineltokak tein Elías kiiluij uan kichiuak tein kitajtanij. ¡Semi moyejyekoj itakuaujtamatilis... uan tel kuali tein kiixpejpenak kichiuas!

Dios amo kisenkauak. Ijkon kemej Elías motenkauak, Jiova kimiakiltij takual tein amo miak katka itech nochi tonalmej keman amo kiouik uan ijkon Elías, siuat uan ikonetsin kipiaskiaj tein kikuaskiaj. Yekmelauj, “harina tein kipiaya ueyi komit amo tamik, uan aceite tein kipiaya tsikitsin komit amo kaxanik, ijkon kemej kijtojka Jiova itenkopa Elías” (1 Rey. 17:16; 18:1). Komo siuat amo kinekiskia kitemakas takual, pantsin tein kichijchiuaskia ika tepitsin harina uan aceite tein mokauaya xa kemaj sayoj sepa kinajsiskia. Sayoj ke siuat kinextij ke takuaujtamatia iuan Jiova uan achto kitamakak Elías.

Nikan tikitaj se taman tein techmachtia: Dios kintatiochiuia akin takuaujtamatij. Yejuatsin techpaleuia komo titakuaujtamatij iuan keman tikpanouaj tayejyekolis. Techmaka tein moneki, techyekpia uan mochiua toTasojikniuj uan ijkon uelis titaxikoskej (Éx. 3:13-15).

Itech xiuit 1898, amaix Zion’s Watch Tower (Uejkapan tepamit kampa Motajpia tein iaxka Sión) kinextij nejin taman tein techmachtia: “Komo siuat kinextiskia takuaujtamatilis uan tatakamatiskia, toTajtsin kiitaskia ke kinamikia kiselis inepaleuil itechkopa itanauatijkauj; sayoj ke komo amo kipiaskia takuaujtamatilis, ueliskia kiajsis okse siuat akin kemaj kipiaskia. No ijkon panoua axkan itech tonemilis. [...] Komo titakuaujtamatij tikseliaj itatiochiualis; uan komo amo, tikpolouaj”.

Keman tikpiaskej se tayejyekolis, moneki tiktemoskej maj Dios techyekana ika Biblia uan amaixmej tein kitemaka inechikol. Satepan moneki tikchiuaskej kemej techiluia Jiova maski techouijmakas. Uelis tikyekneltokaskej ke tikseliskej itatiochiualis komo tikchiuaj nejin tein tayolmajxitia Biblia: “Xitakuaujtamati iuan Jiova ika nochi moyolo, uan amo ximopaleui itech motaajsikamatilis. Itech nochi tein tikchiuas xiktemo Dios uan yejuatsin mitspaleuis ximelaujkanemi” (Prov. 3:5, 6).

“TIUALAJ [...] TIKMIKTIKO NOKONETSIN”

Sayoj ke oksepa moyejyekoj itakuaujtamatilis siuat. Biblia kijtoua: “Satepan keman panok nochi nejin, ikonetsin nejon siuat akin ompa chanchiuaya, kokolispeuak, uan ikokolis mochikauak uan ijyokotonik konet”. Siuat kinekia kimatis keyej panok nejon uan yejua ika kitayokoliluij Elías: “¿Keyej tinechchiuilij nejin, itekitikauj Dios akin melauak? Tiualaj tikchiuako maj moelnamiki notajtakol uan tikmiktiko nokonetsin” (1 Rey. 17:17, 18). ¿Keyej siuat kijtoj nejon tein semi kitayokoltiaya?

¿Xe kielnamikik se tajtakol tein kikuejmolouaya itanemilil? ¿Kinemilij ke Dios kitatsakuiltijtoya ijkuak momikilij ikonetsin uan ke Elías kititankej maj tanauati akoni momikiliskia? Biblia amo kimelaua, sayoj ke kemaj moyekita ke siuat amo kitajtakoltijtoya Dios ke amo teiknelia.

Elías xa kimoujkaitak ijkuak kimatik ke momikilij ikonetsin siuat akin semi tayokoxtoya, uan no porin kinemiliaya ke Elías kichiuak nejon porin ompa moajsia. Satepan ke Elías kiuikak konetsin akin momikilijkaya ajko kampa yejua kochia, motataujtij: “Jiova noDios, ¿no tikualkuilij tajyouilis nejin siuat akin amo nemiok itakauj kampa nimokalotia keman tikmiktilij ikonetsin?”. Tanauatijkej semi kitekipachouaya maj amo kuali ika tajtouanij Dios ijkuak kikauak maj okachi tajyouiani nejon siuat teiknelijkej uan kualtakat. Yejua ika motataujtij: “Jiova noDios, ika kualtakayot, xikchiua maj inemilis nejin konetsin oksepa itech mokepa” (1 Rey. 17:20, 21).

“XIKITA, MOKONETSIN YOLTOK”

Jiova kikaktoya inetataujtil Elías. Siuat kinextijka takuaujtamatilis ijkuak kitamakak tanauatijkej. Moita ke Dios kikauak maj kokolis kichiuani maj momikiliani konetsin porin kimatia ke oksepa kimakaskia inemilis. Nejon neajokuilis tein yekinika ixnesi itech Biblia, kinmakaskia se nechialis akin satepan nemiskiaj. Satepan ke Elías motataujtij, Jiova oksepa kimakak nemilis nejon konetsin. Maj timonemilikan keniuj tel yolpakik siuat keman Elías kiiluij: “Xikita, mokonetsin yoltok”. Siuat tanankilij: “Axkan senkis nikmati ke tiitekitikauj Dios, uan itajtol Jiova tein tinechiluia yejua tein melauak” (1 Rey. 17:22-24).

Tajkuilol amo okachi ika tajtoua nejin siuat. Sayoj ke kemej Jesús ika tajtoj tein kuali tein kichiuak siuat, ueli tikijtouaj ke kitekitilij Jiova nochi tonalmej keman nemik (Luc. 4:25, 26). Tein kipanok kinextia ke Dios kintatiochiuia akin kinpaleuiaj itekitikauan (Mat. 25:34-40). No kinextia ke kinmaka tein moneki akin amo kikauaj maski kipanotoskej uejueyi ouijkayomej (Mat. 6:25-34). Uan no kinextia ke Jiova kineki uan ueli kinajokui mikemej (Hech. 24:15). Yejua ika motelneki maj tikelnamikikan siuat akin nemia Sarepta.