TAMACHTILIS ITECH IPEUJYAN AMAIX | ¿TIKONUELITASKIA TIONMOMACHTIS BIBLIA?

Se nemachtil ika Biblia tein nochin uelis kiseliskej

Tiitaixpantijkauan Jiova techixmatij noyampa porin tikteixmatiltiaj tein kijtoua Biblia. Sayoj ke, ¿tikonmatia ke noyampa taltikpak tikinpaleuiaj taltikpakneminij maj kiajsikamatikan tein kijtoua Biblia?

Se takat kiselijtok se nemachtil ika Biblia kampa tekiti

Itech xiuit 2014, panoua 8,000,000 itaixpantijkauan Jiova kitemakakej mejmetstika ajsitoyaya 9,500,000 nemachtilmej ika Biblia itech 240 altepemej.a Tein melauj, akin touan momachtiaj okachi miakej ke akin nemij kemej itech 140 altepemej.

Tein tapaleuia maj motemaka nejin tamachtilis, yejua ke xijxiujtika tikixtiaj ajsitokya 1,500 millones amaixmej, kampa pouij Biblias, libros, revistas uan folletos, kemej itech 700 tataman tajtolmej. Nejin tekit tein amo moajsi okse ijkon, kipaleuia akin kineki kiselis nejin tamachtilis maj momachti itech tajtol tein kinekis.

“Amo keman nikuelitak nimomachtis, sayoj ke axkan nechyolpaktij. Tein nimomachtij nechtelpaleuij.” (Katlego, Sudáfrica)

“Nemachtil kinankilij nochi netajtanilmej tein nikpiaya, uan nimomachtij okachi miak taman.” (Berta, México)

“Timomachtiayaj nokalijtik uan itech hora tein nejua niuelia. ¡Toni okachi uelis se tajtanis!” (Eziquiel, Brasil)

“Nemachtil uejkauaya quince minutos oso hasta tajko hora; itech seki tonalmej okachi tiuejkauayaj. Nejua nikixtaliaya.” (Viniana, Australia)

“¡Amo nikneltokaya maj nemachtil amo teyi moixtaua!” (Aimé, Benín)

“Siuat akin nechmachtiaya amo yolijsiuia uan kinextiaya kualtakayot... Peuak kuali timouikaj.” (Karen, Irlanda del Norte)

“Miakej momachtiaj Biblia sayoj ke amo mochiuaj itaixpantijkauan Jiova.” (Denton, Inglaterra)

NETAJTANILMEJ TEIN OKACHI MOCHIUAJ IKA NEMACHTIL IKA BIBLIA

¿Keniuj mochiua nemachtil?

Itech nemachtil moita tataman tamachtilismej tein ika tajtoua Biblia. Kemej neskayot, Biblia kinankilia nejin netajtanilmej: ¿Akoni Dios? ¿Keniuj tamati? ¿Katiyejua itokay? ¿Kani moajsi? uan ¿ox uelis kuali timouikaskej iuan? Momachtianij kinnextiliaj kani itech Biblia kiajsiskej itanankililuan nejon netajtanilmej uan okseki.

Tein tapaleuia maj motemaka tamachtilis yejua amaix ¿Toni yekmelauj tamachtia Biblia?b Nejin amaix mokixtij uan ika tikinpaleuiaj taltikpakneminij maj kiajsikamatikan tein tamachtia Biblia. Kipia tamachtilismej tein kinextia keniuj yekmelauj moixmati Dios, akoni Jesucristo, keyej titajyouiaj, timomikiliaj, keyej moneki timotataujtiskej uan okseki tamachtilismej.

¿Kani uan kemanian motemaka nemachtil?

Tejuatsin tikonixtalia kani uan kemanian tionmomachtis.

¿Kanachi uejkaua nemachtil?

Kemej tionuelis. Tejuatsin uelis tikonixtalis hora. Miakej kiixtaliaj momachtiskej kemej se hora chijchikueyitika. Sayoj ke oksekin momachtiaj sayoj diez oso quince minutos.

¿Kanachi se taxtaua?

Nion teyi. Nemachtil uan amaixmej tein ika titamachtiaj amo moixtauaj. Tein melauj, Jesús kiniluij imomachtijkauan: “Ijkon keme Dios namechtayokolij [...] no ijkon [...] amo teyi xikintopaluikan” (Mateo 10:8).

¿Kanachi uejkaua nochi nemachtil?

Tiempo tein tejuatsin tikonnekis. Amaix ¿Toni yekmelauj tamachtia Biblia? kipia 19 tataman tamachtilismej. Tejuatsin uelis tikonitas nochi tamachtilismej tein tikonnekis ijkon kemej tionuelis.

¿Moneki maj se mochiua itaixpantijkauj Jiova?

Amo. Amo akin tikchikaujkauiaj, ta tikmatij ke sejse kinamiki kiixpejpenas tein kineki kineltokas. Sayoj ke, tikonmatis tein Biblia tamachtia uelis mitsonpaleuis xikonixpejpena tein okachi kuali.

¿Kani uelis tikonmatis okachi?

Itech Internet jw.org/ncj kampa timoteixmatiltiaj tikonajsis tamachtilis tein ajsitok uan tein takuaujtamach ika tein tikneltokaj uan tein tikchiuaj.

¿Kani moneki se moijkuilos?

Uelis tiontajtanis maj mitsonkalpanokan ika se formulario tein tikonijkuilos uan tikonajsis itech www.jw.org/ncj.
No uelis tiontajkuilos itech semej altepemej tein ixnesij itech página 2.
Oso no uelis tiontajtos iuan semej itaixpantijkauan Jiova akin nemij ompakauin kampa tejuatsin tionnemi.

a Seki nejin nemachtilmej kiseliaj kemej se oloch.

b Tein kichijchiujkej itaixpantijkauan Jiova. Nejin amaix tein kipia 224 páginas mokixtiani panoua 230 millones amaixmej itech panoua 260 tataman tajtolmej.

KALYETOUANIJ KISELIAJ NEPALEUIL

“Keman nonamik peuak momachtia Biblia, kipatak miak taman. Nochi okachi kuali yaya tokalijtik. Niknekik nikmatis keyej uan peuak nimomachtia. Tein nimomachtij nechpaleuij maj okachi kuali nimonejnemilti. Timomachtiskej Biblia kichiuak maj okachi kuali timouikakan kemej kalyetouanij.” (Eziquiel)

“Satepan ke peuak nimomachtij Biblia, nikauak drogas uan tauanalis uan nechpaleuij maj niktsakuili kualanyot. Axkan nochan okachi chipauak uan tayekyetok. Okachi nikintasojta nokalyetouanij uan nikuelita nikinpaleuis. Axkan okachi niyolpaki ke achto.” (Karen)

“Miakej nechijijtojkej porin nimomachtijtoya Biblia. Sayoj ke nonamik nechpaleuiaya. Nechiluiaya: ‘Amo nechtekipachoua tein kijtouaj oksekin. Tein okachi moneki yejua ke axkan okachi kuali tiyetok. Xiksentoka xikchiua tein tikchiujtok’. Amo keman ijkon tiyolpaktoyaj kemej kalyetouanij.” (Viniana)