NETAJTANILMEJ TEIN KISAJ ITECH BIBLIA
Tetatmej, ¿keniuj kuali nankiniskaltiskej nanmokoneuan?
¿Tikonmachtia mokonetsin maj kitasojta Dios?
Tein okachi kinpaleuis konemej maj kuali moskaltikan yejua maj kiitakan ke inintatuan motasojtaj uan mopoujkaitaj (Colosenses 3:14, 19). No moneki kimatiskej ke inintatuan kintasojtaj uan ke kinyolpaktia tein kichiuaj. Jiova kinmakak se kuali neskayot tetatmej keman kiluij iKonetsin, Jesucristo, ke kitasojtaya uan ke tein kichiuaya kiyolpaktiaya. (Xikonixtajtolti Mateo 3:17.)
ToTajtsin Dios, Jiova, techkaki uan kiita tein tikmachiliaj. Tetatmej monekiskia kichiuaskej kemej yejuatsin uan kikakiskej tein kijtouaj ininkoneuan (Santiago 1:19). Moneki maj kipoujkaitakan tein kimachiliaj uan maj amo kimoujkaitakan komo kijtouaj teisa tein amo moneki. (Xikonixtajtolti Números 11:11, 15.)
¿Keniuj tikonpaleuis mokoneuan maj kuali monejnemiltikan?
Tetatmej kinnamiki kiixtaliskej tanauatilmej ininkalijtik (Efesios 6:1). Sayoj ke, ijkon kemej Dios, moneki kinmelauiliskej katiyejuan uan toni uelis kinpanos komo amo kintakamatij. Ika nejon kinextiskej ke kintasojtaj (Génesis 3:3). Uan no, moneki maj amo kinchikaujkauikan maj tatakamatikan, ta okachi kuali maj kinnextilikan ke kuali kinyas komo kichiuaj tein kuali. (Xikonixtajtolti Isaías 48:18, 19.)
Xikonixtali tikonpaleuis mokoneuan maj kitasojtakan Dios. Ijkon yejuan kuali monejnemiltiskej, maski tejuatsin amo iniuan tionyetos. Dios techmachtia ika tein kichiua; tejuatsin no ijkon xikonchiua. (Xikonixtajtolti Deuteronomio 6:5-7; Efesios 4:32, uan 5:1.)