¿Keniuj kiixtauaj tekit tein kichiuaj?

Xijxiujtika tikixtiaj uan tikmoyauaj miak millones Biblias uan amaixmej tein ika tajtouaj iTajtol Dios. Noyampa taltikpak tikinchijchiuaj sucursales kampa moajsij teposmej tein kikixtiaj amaixmej. Timoajsij itech tel miak nechikolmej uan timosentiliaj itech kalmej tein amo semi uejueykej tein tikintokaytiaj Kalmej kampa tiMosentiliaj. ¿Akoni kiixtaua nochi nejon?

Nochi tekit tein tikchiuaj moixtaua ika tomin tein kitemakaj taltikpakneminij ika nochi ininyolo (2 Corintios 9:7). Itech xiuit 1879, keman ojpatika mokixtij nejin amaix Tanejmachtijkej, tein motokaytiaya Zion’s Watch Tower kijtoj: “Tikneltokaj ke JIOVA kipaleuia [nejin amaix] uan ijkon kemej kisentokas kipaleuijtos, amo keman kintajtanis tomin takamej nion tajtanis maj kipaleuikan”. Hasta axkan tiksentokaj ijkon tikchiuaj.

Tomin tein se kitemaka ika nochi se iyolo uelis motitanis itech sucursal oso uelis motalis itech kaxomej tein moajsij itech Kalmej kampa tiMosentiliaj. Amo titajtanij diezmo nion titajtantinemij tomin, nion tikchiaj maj techtaxtauikan keman tikchiuaj se tekit itech nechikol nion maj kiixtauakan toamaixuan. Amo akin techtaxtauia keman tikteixmatiltiaj iTajtol Dios, keman titamachtiaj itech nechikol nion keman tikchijchiuaj Kalmej kampa tiMosentiliaj. Ta, Jesús kijtoj: “Ijkon keme Dios namechtayokolij [...] no ijkon [...] amo teyi xikintopaluikan” (Mateo 10:8). Nion se itaixpantijkauj Jiova akin tekiti itech ueyi kali kampa moixyekana tekit nion akin tekitij itech sucursales tajtanij maj kintaxtauikan, nion akin kinixyekanaj itaixpantijkauan Jiova.

Tomin tein kitemakaj taltikpakneminij ika nochi ininyolo no ika titapaleuiaj kampa mochiua se tetsauit. Yekinika imomachtijkauan Cristo ika miak pakilis kinpaleuiayaj akin tajyouiayaj (Romanos 15:26). No ijkon, axkan akin kipanouaj se tetsauit tikinyekchijchiuiliaj ininchan uan tikinmakaj takual, taken uan pajti. Uan no tikinyekchijchiuaj Kalmej kampa tiMosentiliaj itech xolalmej kampa uejueliujkej.