¿Keyej moneki titetapojpoluiskej?

TEIN TAYOLMAJXITIA BIBLIA: “Xiksentokakan [...] ximotapojpoluikan ika pakilis se iuan okse komo aksa kiyolxokolijkej. Kemej Jiova ika miak pakilis namechtapojpoluij namejuan, no ijkon xikchiuakan namejuan” (Colosenses 3:13, TNM).

¿Toni kijtosneki? Biblia kijtoua ke tajtakol tamati kemej ijkuak aksa tauika uan netapojpoluilis kemej ijkuak kiluiaj ke amo monekiok maj kikepa tein tauika (Lucas 11:4). Se amaix tein ika tajtoua Biblia kimelaua ke tajtol griego tein mokepa “netapojpoluilis” uelis kijtosnekis ke “amo se kichiaok maj tetaxtauikan, keman amo se tajtaniok tein tetauikiliaj”. Yejua ika, keman tikixtaliaj tiktapojpoluiskej akin techyolxokolij, tikitaj ke amo techtauikiliaok teisa. Se tetapojpoluis amo kijtosneki ke tiknemiliaj ke kuali yetok tein kichiuak oso ke amo techyolkokoua. Ta, tikixtalianij amo iuan tiyolkualantoskej, maski tein kichiuak techyolxokolij.

¿Tapaleuia nejin tayolmajxitilis? Tinochin timopolouaj porin titajtakouanij (Romanos 3:23). Yejua ika, taixejekol maj tikintapojpoluikan oksekin porin satepan monekis maj techtapojpoluikan. Uan no, komo titetapojpoluiaj no techpaleuia. ¿Keniuj?

Komo tiyolkualantokej iuan aksa uan amo tiktapojpoluiaj, tein melauj timoijtakouaj. Nejon tein tikmachiliaj xa kichiuas maj amo tiyolpakikan, maj techyekana itech tonemilis uan maj timoyolkokokan. Hasta uelis kichiuas maj tikokolispeuakan. Itech amaix Journal of the American College of Cardiology tein ika tajtoua tapajtilis, tapajtijkej Yoichi Chida uan tamachtijkej ika Psicología Andrew Steptoe, kijtojkej ke tein moajsini kinextia ke yolkualanyot kiualkui se kokolis tein moixmati kemej cardiopatía coronaria.

Axkan xiontanemili keniuj techpaleuia komo titetapojpoluiaj. Keman tikintapojpoluiaj oksekin tikchiuaj maj onka yolseuilis, maj tisenyetokan uan maj kuali timouikakan iniuan oksekin. Sayoj ke tein okachi moneki yejua ke tikchiujtokej kemej Dios, akin nochipa kintapojpoluia akin tajtakouaj uan kinyolkokoua tein kichiujkej uan yejuatsin kichia maj tejuan no ijkon tikchiuakan (Marcos 11:25; Efesios 4:32; 5:1).