TAMACHTILIS ITECH IPEUJYAN AMAIX | ¿TAPALEUIA MAJ SE MELAUJKANEMI?

Tinochin techijtakoua tein amo melauak

“Miakpa, komo tepitsin titakajkayaua uelis mitskixtis itech se ouijkayot” (Samantha, akin kayot Sudáfrica).

¿No ijkon tiontanemilia? Tein melauj, tinochin miakpa tikixnamikinij seki taman tein techouijkalakia oso tein uelis kichiuas maj titakajkayauakan. Sayoj ke, kemej timonejnemiltiskej keman timoajsiskej itech se taman tein kichiuas maj amo timelaujkanemikan kinextis keniuj yekmelauj titamatij. Kemej neskayot, komo tikitaj ke okachi moneki maj kuali techitakan oksekin, keman tikchiuaskej se taman tein amo kuali yetok xa timotenpaleuiskej uan tikitaskej ke moneki titakajkayauaskej. Sayoj ke keman momatis tein melauak, monekis tikixnamikiskej tein kiualkuis nejon tein tikchiujkej. Maj tikitakan seki taman keniuj taijtakoua.

TAKAJKAYAUALIS KINIJTAKOUA AKIN KUALI MOUIKAJ

Komo omen takuaujtamatij se iuan okse kinpaleuia maj kisentokakan kuali mouikakan. Sayoj ke, amo niman mochiua. Nejon panoua keman miakpa monojnotsaj ika tein melauak uan amo kitemouaj sayoj inintanejnekilis. Sayoj ke, tetayokoltij tikijtoskej ke ika sayoj se takajkayaualis oso okse taman tachiualis tein mouika iuan, uelis moijtakos takuaujtamatilis tein mopialiaj akin kuali mouikaj. Uan keman nejon panoua, semi ouij oksepa kuali mouikaskej.

¿Mitsonkajkayauani aksa akin tikontasojta? Komo ijkon, moajsikamati ke xa mitsonyolkokoj oso hasta tionyolkualanik. Kemej tikitaj, takajkayaualis uelis kinxelos hasta akin semi kuali mouikaj.

AKIN AMO MELAUJKANEMIJ UELIS TECHMAUASKEJ

Robert Innes, akin tamachtia tein mouika ika tomin itech Ueyi kaltamachtiloyan ompa California, kiajsik ke “akin amo melaujkanemij uelis temauaskej”. Kemej yeskia se kokolis tein momoyaua: ijkon kemej okachi timoajsiskej iuan aksa akin takajkayaua satepan no uelis peuas titakajkayauaskej.

Biblia uelis techpaleuis maj amo techijtako nejon. Timitsonyoleuaj xikonita seki tayolmajxitilismej tein kipia.

Seki taman tein kichiuaj akin amo melaujkanemij

Takajkayauaj

¿TONI KIJTOSNEKI? Se kiluis tein amo melauak akin moneki kimatis tein melauak. No kijtosneki keman se kipata tein yekmelauj panok uan ijkon amo kiyekmatis nochi, amo se kijtos nochi tein moneki porin se kitemoua se takajkayauas uan no se kiajxitilia okachi ke tein yekmelauj mochiuak uan ika se kitemoua maj kuali teitakan.

TEIN BIBLIA TAMACHTIA: “Akin kinextia ke yolkuali sayoj ke amo melauak [oso takajkayaua], Jiova amo kineki kiitas, sayoj ke moteluika iniuan akin yolmelaujkej” (Proverbios 3:32). “Ika ya nojon xiksekokautiyakan nochi tataman xolopijyot. Uan axkan moneki xitajtojtinemikan sayo ika ten melau” (Efesios 4:25).

Kijtouiliaj aksa tein amo melauak

¿TONI KIJTOSNEKI? Se kijtouilis aksa tein amo melauak porin amo kuali tikpiaj toyolo uan tiknekij maj amo kuali kiitakanok.

TEIN BIBLIA TAMACHTIA: “Se kuejmolchiujkej kichiua maj moixnamikikan, uan se tetakajkayauilijkej kinxeloua akin semi tasojiknimej” (Proverbios 16:28). “Kampa amo onkak kouit, seui tit, uan kampa amo moajsi tetakajkayauilijkej, tami tajtolteuilis” (Proverbios 26:20).

Kikuiliaj tein iaxka aksa ika takajkayaualis

¿TONI KIJTOSNEKI? Se kikajkayauas aksa porin tiknekij maj kitemaka itomin oso tein iaxka.

TEIN BIBLIA TAMACHTIA: “Moneki amo timokauilis taxtauil tein kinamiki kiselis se tonaltekitikej akin kipolojtok uan moajsi itech tatasojtilis” (Deuteronomio 24:14, 15). “Akin mokauilia itaxtauil akin kipanotok tatasojtilis kiuijuikaltia iTachijchiujkauj, sayoj ke akin kiiknelia akin kipanotok tatasojtilis, kiueyitalia yejuatsin” (Proverbios 14:31).

Tachtekij

¿TONI KIJTOSNEKI? Se kikuis tein iaxka aksa uan amo se kitajtania.

TEIN BIBLIA TAMACHTIA: “Naken tachtektinemia, yejua ne ma kikautiu ya nitachtekilis. Uan kachi kuali ma motekitilti ka imauan tech se kuali tekit para ijkon uelis kinpaleuis oksekin ten kipolojtinemij ten kuaske” (Efesios 4:28). “Nion tachtekinij, nion xijxikuimej, nion tauananij, nion tauijuikaltianij uan nion akin kitekuiliaj teisa ika temojmoujtilis amo yetoskej itech itekiuajyo Dios” (1 Corintios 6:9, 10, TNM).