¿Monekiskia tikonitas tein biblia tamachtia iuan tein tikonneltoka?

¿TIONPOUI iniuan akin kitojtokaj Cristo? Komo ijkon, tionpoui iniuan panoua ome mil millones akin no ijkon kichiuaj. Itech nejin tonalmej moajsij miak taneltokalismej kampa kijtouaj ke kichiuaj kemej Cristo, sayoj ke tataman tein tamachtiaj uan tataman kemej tanemiliaj. Xa tein tejuatsin tikonneltoka semi taman ke tein kineltokaj oksekin akin no kijtouaj ke kichiuaj kemej Cristo. ¿Motelneki tikonitas tein kijtoua Biblia iuan tein tikonneltoka? Kemaj, komo tejuatsin tikonneki tikontojtokas Cristo ijkon kemej kijtoua Biblia.

Yekinika itatojtokakauan Jesús moixmatkej kemej cristianos (Hechos 11:26). Kemej sayoj moajsia se oloch akin takuaujtamatia iuan Cristo, amo monekia okse tokayit tein ika moixmatiskiaj. Itatojtokakauan Cristo kisentakamatiaj tamachtilismej uan tanauatilmej tein kinmakak Cristo Jesús. Uan itech tiopan kampa tionpoui, ¿tikonnemilia ke tamachtiaj tein Cristo tamachtij uan kineltokaj tein yekinika itatojtokakauan kineltokayaj? ¿Toni uelis mitsonpaleuis xikonmati ox ijkon kichiuaj? Uelis tikonmatis sayoj komo tikonita tein tamachtiaj itech tiopan kampa tionpoui iuan tein kijtoua Biblia.

Xikonnemili nejin: Jesucristo senkis kipoujkaitaya Biblia porin kineltokaya ke katka iTajtol Dios. Yejua amo kuali kiitaya maj tepitsin kipatakan tein kijtoua uan ijkon kipaleuiskej tein tamachtiaj takamej (Marcos 7:9-13). Yejua ika, uelis senkis tikijtoskej ke akin yekmelauj katkaj itatojtokakauan Cristo tein kineltokayaj kikixtiayaj itech Biblia. Yejua ika, nochin akin kinekiskej kichiuaskej kemej Cristo monekiskia motajtaniskej: “Tein tamachtiaj itech notaneltokalis, ¿mouika iuan tein Biblia tamachtia?”. Uelis tikonnankilis nejin netajtanil, komo tikonita tein tamachtiaj itech tiopan kampa tionpoui iuan tein Biblia kijtoua.

Jesús kijtoj ke moneki tikueyichiuaskej Dios ika tamachtilis tein melauak uan nejon tikajsij itech Biblia (Juan 4:24; 17:17). Uan no, Pablo se imomachtijkauj Jesús kijtoj ke timomakixtiskej komo timomachtiaj “in melauak Tajtoltsin de Dios” (1 Timoteo 2:4). Yejua ika tein tikneltokaskej motelneki maj kisa itech tamachtilis tein melauak tein moajsi itech Biblia. Nejon techpaleuis maj timomakixtikan.

¿KENIUJ UELIS TIKITASKEJ TEIN TIKNELTOKAJ IUAN TEIN BIBLIA TAMACHTIA?

Timitsonyoleuaj xikonixtajtolti chikuasen netajtanilmej tein moajsij itech recuadro uan xikonita keniuj Biblia kinankilia sejse. Xikonixtajtolti textos tein ijkuiliujtokej uan xiontanemili itech tanankililmej tein motemakaj. Satepan xionmotajtani: “¿Mouika tein tamachtiaj itech notiopan iuan tein kijtoua Biblia?”.

Nejin tein tikitakej mitsonpaleuia xikonita tein Biblia tamachtia iuan tein tikonneltoka. ¿Tikonuelitaskia tikonitas okseki taman tein kijtoua Biblia iuan tein tamachtiaj itech motiopan? Itaixpantijkauan Jiova uelis mitsonpaleuiskej xikonita tein tamachtia Biblia. Xiontajtani se nemachtil ika Biblia iniuan itaixpantijkauan Jiova oso itech jw.org, Internet kampa timoteixmatiltiaj. Amo moneki tiontaxtauas.

1 NETAJTANIL: ¿Akoni Dios?

TANANKILIL: Jiova, iPopaj Jesús, yejua Dios akin nochipa nemi akin nochi kichijchiuak uan kipia miak chikaualis.

TEIN KIJTOUA BIBLIA

“Nachipa tiktasojkamachiliaj Dios ika por namejuan. Uan Totajtsin Dios Yejuatsin ne Itajtsin de Totekotsin Jesucristo” (Colosenses 1:3).

“Tejuatsin mitsonnamiki xikselijto nochi ne mouistililis uan ne ueyipanchiualis uan ne chikaukakualtsiyo. Porin sayo Tejuatsin tikonchijchiuak nochi ten ongak” (Apocalipsis [Revelación] 4:11).

No xikonita Romanos 10:13; 1 Timoteo 1:17.

2 NETAJTANIL: ¿Akoni Jesucristo?

TANANKILIL: Jesús yejua yekinika iKonetsin Dios. Kemej kichijchiujkej, kipiak ipeujyan. Uan no, mokaua maj Dios kiixyekana uan kitakamati.

TEIN KIJTOUA BIBLIA

“Notajtsin Dios Yejuatsin ya ne kachi ueyi chiuke uan ke Nejuatsin” (Juan 14:28).

“[Jesucristo] tamati kemej Dios akin amo ueli se kiita, yejua tayekankakonet itech nochi tachijchiualis” (Colosenses 1:15, TNM).

No xikonita Mateo 26:39; 1 Corintios 15:28.

3 NETAJTANIL: ¿Toni espíritu santo?

TANANKILIL: Espíritu santo amo se aksa, ta se chikaualis tein Dios kikui uan ika kichiua itanejnekilis. Aksa uelis kiselis ichikaualis nejon espíritu.

TEIN KIJTOUA BIBLIA

“Kuak in Elisabet kikayik ke in María kinaltajpaloto ya, ijkuakon in konetsin de Elisabet sepa san moolinij ne ijtikpa. Uan ijkon Dios kiyolpepexokaltij Elisabet ika in chikaualis den Yektikatsin Espíritu” (Lucas 1:41).

“Kuak ualas ya namoyolijtik in Yektikatsin Espíritu, ijkuakon namejuan nankiseliske ichikaualis” (Hechos 1:8).

No xikonita Génesis 1:2; Hechos 2:1-4; 10:38.

4 NETAJTANIL: ¿Toni iTekiuajyo Dios?

TANANKILIL: ITekiuajyo Dios se taixyekanalis tein moajsi iluikak. Jesús yejua taixyekankej itech nejon Tekiuajyot uan amo uejkaua kichiuas maj itanejnekilis Dios mochiua itech nochi taltikpak.

TEIN KIJTOUA BIBLIA

“Chikome ángel tapitsak ika itrompeta. Uan mokayik se chikaukatajtolisme nepa eluiyaktsinko ten kijtoaya ijkuin: Nochi in pueblojme uan nochi senmanauak moinaxkatilij ya Totekotsin Dios uan Jesucristo.[...] Ika ya nojon Yejuatsin tayekantinemis sen nachipa uan sen nachipa” (Apocalipsis 11:15).

No xikonita Daniel 2:44; Mateo 6:9, 10, TNM.

5 NETAJTANIL: ¿Youij iluikak nochin akin yolkualmej?

TANANKILIL: Amo. Dios kiixpejpenani se “amo ueyi oloch ichkamej”, oso seki takamej uan siuamej akin amo kikauaj Dios uan yaskej iluikak. Yejuan iuan Jesucristo kinixyekanaskej akin nemiskej nikan taltikpak.

TEIN KIJTOUA BIBLIA

“Amo ximomoujtikan, amo ueyi oloch ichkamej, porin nanmoTajtsin namechmakati tekiuajyot” (Lucas 12:32, TNM).

“Tekititinemiske keme tiopixkame itenkopaka Totajtsin Dios uan itenkopaka Cristo. Uan yejuan tayekantinemiske iuan Cristo” (Apocalipsis 20:6).

No xikonita Apocalipsis 14:1, 3.

6 NETAJTANIL: ¿Toni kiixtalia Dios kichiuas nikan taltikpak uan iniuan akin nemiskej ompa?

TANANKILIL: Keman taixyekantos iTekiuajyo Dios, taltikpak mochiuas se xochital kampa akin amo kikauaj Dios amo kokolispeuaskejok, nemiskej ika yolseuilis uan kipiaskej nemilis nochipaya.

TEIN KIJTOUA BIBLIA

“Akin yolnejmachmej ininaxkatis taltikpak uan yekmelauj yolpakiskej porin kipiaskej ueyi yolseuilis” (Salmo 37:10, 11).

“[Dios] kinelkaualtis de ninchokilisuan de nochi itaneltokakauan. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok. Uan ijkon yeski porin nochi tajtamik ya de ne achtopa onkaya” (Apocalipsis 21:3, 4).

No xikonita Salmo 37:29; 2 Pedro 3:13.