Keniuj techyolseuia Dios

Se imomachtijkauj Jesús akin motokaytij Pablo kijtoj ke Jiovaa yejua “Dios akin iaxka nochi taman yolseuilis, akin techyolseuia itech nochi totayejyekolis” (2 Corintios 1:3, 4, TNM). Ika nejin tajtolmej, Biblia senkis techiluia ke Dios uelis techpaleuis tinochin uan maski ouijkayot tein tikpanotoskej semi ueyi yeski, toTajtsin akin moajsi iluikak uelis techyolseuis.

Sayoj ke, moneki tikchiuaskej teisa komo tiknekij maj Dios techyolseui. Xikonnemili nejin, ¿keniuj uelis techpaleuis se tapajtijkej komo amo tiyouij kaltapajtiloyan? Yejua ika, iTajtol Dios techiluia: “Ximotokikan iuan Dios uan Yejuatsin no motokis namouan” (Santiago 4:8).

¿Keniuj uelis tikmatiskej ox yekmelauj Dios motokis touan? Yekinika, yejuatsin miakpa techyekiluia ke kineki techpaleuis (xikonita recuadro tein moajsi itech okse página). Uan ojpatika, moajsinij akin kitematiltianij ke yekmelauj Dios kinyolseuiani.

Tekiuaj David kipanok miak taman tein kitajyouiltij, ijkon kemej axkan miakej kipanouaj uan kitemoj inepaleuil Dios. Yejua kitataujtij: “Xikaki nonetataujtiluan keman nimitstsajtsilia xinechpaleui”. ¿Kinankilij Jiova? Kemaj, porin satepan kijtoj: “Nechpaleuiani, yejua ika niyolpaki” (Salmo 28:2, 7).

¿KENIUJ TAPALEUIA JESÚS MAJ MOTEMAKA YOLSEUILIS?

Dios kinekik maj Jesús tapaleuiani keman motemakaskia yolseuilis. Kemej neskayot, Jiova kinauatij ‘maj kinyolseui akin tajyouijtokej’ uan ‘maj kinyolseui nochin akin moyolkokojtokej’ (Isaías 61:1, 2). Ijkon kemej achto moijtojka, Jesús senkis kinextij ke motekipachouaya ininka akin ‘motekitiltijtokej uan tamamajtokej ika ne tajyouilis’ (Mateo 11:28-30).

Jesús kinyolseuiaya nochin keman kinnextiliaya netasojtalis, ijkuak kuali kinyolmajxitiaya, uan kemansa hasta kinpajtiaya akin mokokouayaj. Se tonal, se takat akin kipiaya lepra kitataujtij: “Komo tikonekiskia, tionuelis tinechonchipauas de nijin pitsotik kokolis”. Nejon kiyololinij Jesús uan kiluij: “Nikneki ma tejua xichipaua de mokokolis” (Marcos 1:40, 41). Uan nejon takat pajtik.

Maski iKonetsin Dios amo moajsiok nikan taltikpak, iTajtsin, “Dios akin iaxka nochi taman yolseuilis”, kisentoka kinyolseuia akin tajyouiaj (2 Corintios 1:3, TNM). ¿Keniuj kichiua? Maj tikitakan naui taman kemej okachi kichiua.

• Biblia. “Nochi tanextililis ten tikajsij tech in Tajkuilolamatsin de Dios, nochi nojon techijkuilouilijke para tejuan ika timomachtiske kachi ok. [...] Porin ompa tikajsij de keniu titaxikojtiyaske ika ne tajyouilis uan no tikajsij de keniu timoyoltalijtiyaske [oso timoyolseuijtiyaskej]” (Romanos 15:4).

• Iespíritu Dios oso ichikaualis. Satepan ke Jesús momikilij, imomachtijkauan itech yekinika siglo kipiakej yolseuilis. Biblia kijtoua ke “kimouistilijtinemiaj Totajtsin Dios porin in Yektikatsin Espíritu kinyolojmajxitijtinemia” (Hechos 9:31). Iespíritu Dios kipia miak chikaualis uan ika ueli kiyolseuia akin yeski maski kipanotos tein yeski ouijkayot.

• Netataujtil. Biblia kijtoua: “Amo teyika ximoyolkuejmolokan”. Uan teyolmajxitia: “Xiktajtanilikan Dios nochi ten namechpoloa. Uan [...] Dios namechtayokolijtiyas ne yolseuilis ten kachi kuika uelilis hasta amo uelis se kajsikamatis ok de keniu” (Filipenses 4:6, 7).

• Oksekin akin kichiuaj kemej Cristo. Yejuan uelis techyolseuiskej ijkon kemej kichiua se akin kuali iuan timouikaj. Pablo kijtoj ke akin kuali iniuan mouikaya ‘kiyolseuijtinemiaj’ keman ‘yoltasematoya ya uan yoltajyouiaya’ (Colosenses 4:11; 1 Tesalonicenses 3:7).

Xa tionmotajtania ox nejin taman tein tikitakej yekmelauj tapaleuia. Maj tikitakan okachi tein kinpanok akin ininka titajtojkej itech yekinika tamachtilis. Ijkon kemej yejuan, tikonitas ke Dios kisentoka kichiua nejin tein motenkauak: “Ijkon kemej se temomaj kiyolseuia ikoneuj, ijkon niksentokas nimitsyolseuis” (Isaías 66:13).