Tein tajtanij akin taixtajtoltiaj

¿Akonimej kijtouaj tein moajsi itech Salmo 144:12-15? ¿Itekitikauan Dios oso akin uejka kayomej uan amo yolkualmej akin ininka motajtoua itech versículo 11?

Tajkuilol itech tajtol hebreo ueli kiteajsikamatiltia ome taman. Maj tikitakan seki taman tein techpaleuis maj tikajsikamatikan katiyejua tanemilil tein melauak:

1. Moneki se kiitas nochi tein kijtoua capítulo. Tatiochiualismej tein ika motajtoua itech versículos 12 hasta 14 moajsikamati ke kinpanoua akin yolmelaujkej, akin itech versículo 11 kitajtaniaj Dios maj kinmakixti porin akin amo yolkualmej kintajyouiltiaj. Uan no, tajtol “yolpaki”, tein ojpa mokui itech versículo 15, kinnamiki sayoj akin yolmelaujkej: akin pouij itech “xolal tein iDios yejua Jiova”.

2. Nejin mouika ika okseki tajkuilolmej kampa ika motajtoua tatiochiualismej tein Dios kinmakas itekitikauan akin amo kikauaj. Salmo 144 kinextia ke David senkis takuaujtamatia ke satepan ke Dios kinmakixtiskia israelitas, kintatiochiuiskia ika yolpakilis uan kuali nemilis (Lev. 26:9, 10; Deut. 7:13; Sal. 128:1-6). Kemej neskayot, Deuteronomio 28:4 kijtoua: “Tatiochiualmej yeskij mokoneuan uan itakilo motal uan ininkoneuan motapialuan, mokuakuejkoneuan uan moichkakoneuan”. Kemaj, keman tekiuajtitoya Salomón, itelpoch David, itech xolal onkaya yolseuilis uan kuali nemiaj kemej amo keman ijkon panotoya. Tein melauj, seki taman tein panok itech nejon tekiuajyot kiixnextia itekiuajyo Mesías (1 Rey. 4:20, 21; Sal. 72:1-20).

Ika amo miak tajtolmej, kemej moajsikamati Salmo 144 okachi kuali kinextia tein tel uejkaujya kichixtonij itekitikauan Jiova: maj kinixpolo akin amo yolkualmej uan maj akin yolmelaujkej nochipa kipiakan yolseuilis uan kuali nemilis (Sal. 37:10, 11).