“Akin yolmelauak moyolpaktis itech Jiova”

DIANA kipia panoua 80 xiujmej. Inamik, akin kipiaya kokolis tein moixmati kemej Alzheimer uan nemia kampa kinyekpiaj akin xiuejkejya, momikilij. No momikilijkej nochin ome ikoneuan uan kipiak cáncer de mama. Maski ijkon, keman tokniuan kiitaj itech nechikolmej oso itech tanojnotsalis, Diana nochipa yolpaktok.

John takalpanoj itech nechikolmej panoua cuarenta y tres xiujmej. Kiteluelitaya nejon tekit, sayoj ke monekik kikauas porin monekia kiyekpias se ichankauj akin mokokouaya. Keman tokniuan akin uejkaujya kiixmatij iuan moajsij itech uejueyi nechikolmej, kijtouaj ke amo mopatani. Kisentoka yolpaki.

¿Keyej Diana uan John kisentokaj yolpakij? ¿Keniuj aksa ueli kisentoka yolpaki maski tajyouia oso moneki kikauas se tekit tein kiteluelita? Biblia tanankilia: “Akin yolmelauak moyolpaktis itech Jiova” (Sal. 64:10). Uelis okachi kuali tikajsikamatiskej nejin tein melauak komo tikmatij toni kichiuas maj yekmelauj tiyolpakikan uan toni amo.

YOLPAKILIS TEIN AMO UEJKAUA

Moajsi seki taman tein miakpa kichiua maj tiyolpakikan, kemej ijkuak timonamiktiaj, tikpiaj se konetsin oso tikseliaj se tekit itech itekiyo Dios. Uan taixejekol maj ijkon timomachilikan, porin nejin Jiova techtayokolia. Yejuatsin kiixtalij nemilis kemej namikuanij, kichiuak maj ueli tikinpiakan konemej uan techmaka tekit itech inechikol (Gén. 2:18, 22; Sal. 127:3; 1 Tim. 3:1).

Sayoj ke, seki taman tein kichiua maj tiyolpakikan, amo uejkaua. Inamik aksa uelis momikilis oso uelis kikajkayauas, uan nejon semi tetayokoltij (Ezeq. 24:18; Os. 3:1). Konemej xa amo kintakamatiskej inintatuan nion Dios uan hasta xa monekis kinkalankixtiskej itech nechikol. Kemej neskayot, ikoneuan tanauatijkej Samuel amo kitekitilijkej Jiova kemej yejuatsin kiyolpaktia; uan tekiuaj David tajtakoj uan nejon kiualkuilij miak ouijkayomej ichankauan (1 Sam. 8:1-3; 2 Sam. 12:11). Nejin ouijkayomej tetajyouiltiaj.

No ijkon, kemansa amo ueli tiksentokaj tikchiuaj se taman tekit itech itekiyo Dios porin tikokolispeuaj, moneki tikyekpiaskej se tochankauj oso mopata seki taman itech inechikol Dios. Miakej tokniuan akin monekini kikauaskej tekit tein kipiayaj kijtouaj ke kinekiskiaj oksepa kimachiliskej yolpakilis tein kinualkuiliaya.

Amo techouijmaka tikitaskej ke nejon tein kichiuaya maj tiyolpakikan amo nochipa uejkaua. Sayoj ke ¿moajsi se taman yolpakilis tein tiksentokaj tikmachiliaj hasta keman tikpanouaj ouijkayomej? Kemaj, porin Samuel, David uan oksekin kisentokakej yolpakkej keman kipanokej ouijkayomej.

YOLPAKILIS TEIN UEJKAUA

Jesús kimatia toni yekmelauj yolpakilis. Biblia kijtoua keniuj momachiliaya achto ke ualaskia nikan taltikpak: “Niyolpakia nochipa niyetos iixpan [Jiova]” (Prov. 8:30). Sayoj ke, keman nikan yetoyaya, kemansa kipanok uejueyi ouijkayomej. Maski ijkon, kiyolpaktiaya kichiuas itanejnekilis iTajtsin (Juan 4:34). ¿Toni kipaleuij maj kixiko tajyouilis keman yaya momikilitiya? Itech Biblia moijtoua: “Yejuatsin kipouak ke amo teyi pinaualis kuak kikuoupampilojke. Ta, [...] kipia ueyi yolpakilis” (Heb. 12:2). Maj tikitakan ome taman tein Jesús kijtoj ika yekmelauj yolpakilis.

Se tonal, 70 imomachtijkauan mokepkej ika yolpakilis satepan ke tanojnotsatoj porin kichiujkaj uejueyi tachiualismej, kemej kinkixtiliskej taltikpakneminij amo kuali ejekamej. Sayoj ke Jesús kiniluij: “Amo ximoyolpaktikan sayo porin in amokuali ejekame namechtakamatij san. Ta, kachi ok moneki ximoyolpaktikan porin Totajtsin Dios kijkuiloj ya namotokay ya tech ilista nepa eluiyaktsinko” (Luc. 10:1-9, 17, 20). Kemaj, tikpiaskej itatiochiualis Jiova okachi moneki uan okachi teyolpaktia ke se tekit tein tikchiuaskej itech itekiyo.

Okse tonal, keman Jesús kinmachtijtoya miakej, se siuat judía kijtoj ke imomaj nejon tel kuali tamachtijkej semi yolpakia. Sayoj ke Jesús kiluij: “Kachi kuali ma tikijtokan ke tatiochiualme de Dios [oso yolpakij] nochi nekes ten kiyekakij in Tajtoltsin de Dios uan kitakamatij” (Luc. 11:27, 28). Komo ikoneuan aksa kuali monejnemiltiaj, yejua xa semi yolpaki uan kuali momachilia. Sayoj ke, okachi yolpakis komo kitakamati Jiova uan kuali mouika iuan.

Semi tiyolpakij keman tikmachiliaj ke tikpiaj itatiochiualis Jiova. Uan maski kuejmolmej amo techyolpaktiaj, amo no kichiuaj maj amo tiyolpakikan, ta keman titaxikouaj uan tiksentokaj tiktakamatij Jiova, okachiok tiyolpakij (Rom. 5:3-5). No maj tikelnamikikan ke Jiova kinmaka iespíritu akin iuan takuaujtamatij, uan semej kualneskayomej tein nejon espíritu kichiua maj tikpiakan yejua yolpakilis (Gál. 5:22). Yejua ika Salmo 64:10 kijtoua: “Akin yolmelauak moyolpaktis itech Jiova”.

Nochi nejin kinextia keyej Diana uan John kisentokakej yolpakkej maski kipanotoyaj ouijkayomej. Diana kijtoua: “Nimopaleuiani itech Jiova, ijkon kemej se konetsin mopaleuia inintech itatuan”. No kijtoua: “Nikmachilia ke Dios nechtatiochiuiani keman nechpaleuia maj niksentoka nitanojnotsa ika yolpakilis”. ¿Uan toni kipaleuij John? Yejua kijtoua ke itech xiuit 1998 kiixtalijkej maj tamachti itech Tamachtilis tein kinpaleuia Tokniuan Takamej itech iTekiyo Dios, uan nejon kichiuak maj okachi momachtiani. Nejon tamachtilis kipaleuij maj kisentokani kitekitiliani Jiova keman satepan monekik kikauas tekit kemej takalpanojkej. Kijtoua ke yejua uan inamik amo ouij kinkisak kiseliskej nejon tein mopatak, porin nochipa motemakakej kichiuaskej tein Jiova kiniluiskia. Uan kijtouaj ke amo kinemiliaj maj amo kichiuanij.

Miakej tokniuan no kiitanij ke melauak tein kijtoua Salmo 64:10. Kemej neskayot, seki namikuanij akin panoua treinta xiujmej tekitikej Betel tein moajsi Estados Unidos uan kiselijkej tekit kemej precursores especiales, kijtouaj: “Keman tikpoloua teisa tein tiktelpatiuita, taixejekol xitayokoya. Sayoj ke amo uelis ijkon timoajsis nochipaya”. Niman keman ajsikej kampa tapaleuiskiaj, peujkej tanojnotsaj iniuan tokniuan. No kijtouaj: “Senkis tikiluiayaj Jiova tein tikmachiliayaj. Keman tikitayaj keniuj technankiliaya, titelyolpakiaj uan timoyolchikauayaj. Tepitsin satepan ke tiajsikej, okseki tokniuan itech nechikol mochiujkej precursores. Uan no, tikpiakej yolpakilis tikinmachtiskej omen akin satepan moauijkej”.

“XIYOLPAKIKAN NOCHIPAYA”

Melauak ke amo nochipa uelis tiyolpaktoskej. Kemansa, titayokoxtoskej. Sayoj ke Jiova techyolseuia ika tajtolmej tein moajsij itech Salmo 64:10. Maski tiyolkuetaujtoskej, uelis titakuaujtamatiskej ke “akin yolmelauak moyolpaktis itech Jiova”. Nejin kijtosneki ke maski tein yeski tikpanoskej, tiyolpakiskej komo tiksentokaj tiktakamatij Jiova. Uan tikchiaj maj ejko tonal keman moajsis “yankuik iluikak uan se yankuik taltikpak” kemej Jiova motenkauak. Ijkuak, itekitikauan Dios amo tajtakolejkejok yeskij uan yolpakiskej nochipaya ika nochi tein Jiova kichiuas (Is. 65:17, 18).

Maj tiknemilikan tein kijtosnekis nejon: amo tikpiaskejok kokolis uan mojmostaj timeuaskej ika chikaualis. Tein yeski tein amo kuali tein techpanok achto, amo techtayokoltisok. Jiova motenkaua: “Tein achto panok amo moelnamikisok, nion yetosok itech nanmoyolo”. Kemej kinajokuis mikemej, oksepa tiyetoskej iniuan tochankauan uan totasojikniuan akin momikilijkejya. Tel miakej semi yolpakiskej, ijkon kemej itatuan siuapiltsin akin kipiaya 12 xiujmej akin Jesús kiajokuik (Mar. 5:42). Uan ejkos tonal keman nochin akin nemiskej itech taltikpak yeskij yekmelauj yolmelaujkej uan ‘moyolpaktiskej itech Jiova’ nochipaya.