¿Katiyejua itokay Dios?

Keman tiknekij tikixmatiskej aksa, yekinika xa tiktajtaniaj: “¿Keniuj tionmonotsa?”. Komo tiktajtaniskiaj Dios nejon, ¿toni technankiliskia?

“Nejua niJiova. Yejua nejon notokay.” (Isaías 42:8.)

¿Tikonkakini nejon tokayit? Xa amo, porin miakej akin kitajtolkepaj Biblia amo semi kikuij oso nion kikuij. Miakpa kikuij tajtol TOTEKO. Sayoj ke, keman yekinika moijkuiloj Biblia itokay Dios ixnesia panoua siete mil. Nejon tokayit ixnesi itech tajtol hebreo ika naui letras YHWH oso JHVH, uan itech tajtol náhuatl motajtolkepa kemej “Jiova”.

Itokay Dios itech tajtol hebreo itech amatajkuilol tein moajsik mar Muerto — Amatajkuilol Salmos tein moajsik mar Muerto (xiuit 30 hasta 50, HEBREO)

Itokay Dios itech tajtol inglés itech Biblia tein kitajtolkepak Tyndale — Tein kitajtolkepak Tyndale (1530, INGLÉS)

Itokay Dios itech tajtol español itech Biblia Reina-Valera — *Reina-Valera* (1602, ESPAÑOL)

Itokay Dios itech tajtol chino itech Biblia Union Version — *Union Version* (1919, CHINO)

Itokay Dios ixnesi itech amatajkuilolmej itech tajtol hebreo uan itech miak Biblias

KEYEJ MOTELNEKI ITOKAY DIOS

Dios kiita ke motelneki. Amo akin kitalilij nejon tokayit Dios, ta yejuatsin kiixpejpenak. Jiova kijtoua: “Yejua nejin notokay nochipaya, uan ika nejin nechelnamikiskej axkan uan nochipaya” (Éxodo 3:15). Itech Biblia, itokay Dios okachi miakpa ixnesi ke okseki tajtolmej tein ika kiixmatij kemej Akin kipia nochi chikaualis, toTajtsin, toTeko oso Dios, uan okachi ixnesi ke okseki tokaymej kemej Abrahán, Moisés, David oso Jesús. Uan no, Jiova kineki maj tikixmatikan itokay. Biblia kijtoua: “Maj taltikpakneminij kimatikan ke motokay Jiova uan ke sayoj tejua okachi tiUeyichiujkej itech nochi taltikpak” (Salmo 83:18).

Jesús kiita ke motelneki. Ika netataujtil tein moixmati kemej padrenuestro, Jesús kinmachtij imomachtijkauan maj kitataujtikan Dios ijkon: “Maj mochipaujkatali motokay” (Mateo 6:9, TNM). Uan no kitataujtij Dios: “Notajtsin Dios, xikueyipanchiua motokaytsin” (tejuan tiktalilijkej cursivas; Juan 12:28). Jesús kiitaya ke motelnekia kiueyitalis itokay Dios. Yejua ika kiluij: “Nikinnextilijtinemik [...] motokaytsin de akoni Tejuatsin. Uan nikinmachtijtinemis” (Juan 17:26).

Akin kiixmatij Dios kiitaj ke motelneki. Ne uejkauj, itekitikauan Dios kimatiaj ke yejuatsin kinpaleuiskia uan kinmakixtiskia komo kiixmatiaj itokay uan komo sayoj yejua kiueyichiuayaj. Semej kijtoj: “Itokay Jiova se uejkapan tepankali. Ompa youi akin yolmelauak uan kiselia nepaleuil”. Uan okse kijtoj: “Nochin akin kijtoskej itokay Jiova makisaskej” (Proverbios 18:10; Joel 2:32). Biblia kijtoua ke itekitikauan Dios moixnextiskiaj ika itokay. “Nochin xolalmej nentinemiskej, sejse itech itokay idios, sayoj ke tejuan tinentinemiskej itech itokay Jiova toDios nochipaya.” (Miqueas 4:5; Hechos 15:14.)

TONI KINEXTIA NEJON TOKAYIT

Kinextia ke amo onkak okse Dios. Miakej motelmachtianij kijtouaj ke tokayit Jiova kijtosneki “Yejuatsin Kichiua maj Mochiua”. Kemej Jiova moixnextij iuan Moisés techpaleuia maj tikajsikamatikan tein kijtosneki itokay. Dios kijtoj: “Nejua nimochiuas tein nikixpejpenas nimochiuas” (Éxodo 3:14). Yejua ika, itokay techmachtia ke yejua Tachijchiujkej, akin kichiua maj nochi onka. Uan no, techmachtia ke yejuatsin ueli mochiua oso kichiua maj itachijchiualis mochiua tein moneki uan ijkon maj mochiua itanejnekilis. Maski tajtolmej tein ika kiixmatij kinextia tanauatil tein kipia oso ichikaualis, sayoj itokay, Jiova, kinextia keniuj tamati uan tein ueli kichiua.

Kinextia ke Dios toka motekipachoua. Tein kijtosneki itokay Dios kinextia ke yejuatsin kitasojta nochi tein kichijchiuani, kampa tejuan no tipouij. Yejuatsin kineki maj tikixmatikan uan yejua ika techmatiltij itokay. Tein melauj, Dios techmatiltij itokay achto ke timotajtaniskiaj keniuj monotsa. Kemej tikitaj, yejuatsin amo kineki maj tiknemilikan ke amo ueli se kiixmati oso ke uejka moajsi, ta ke yekmelauj nemi uan ke ueli iuan se motokia (Salmo 73:28).

Keman tiktokaytiaj, tiknextiaj ke tiknekij tikixmatiskej. Xikonnemili ke tikonneki tionmouikas iuan aksa uan tikoniluia maj mitsontokayti. ¿Keniuj tionmomachiliskia komo amo kineki? Xa tikonnemiliskia ke amo kineki mouan mouikas. No ijkon panoua iuan Jiova. Yejuatsin techmatiltij itokay uan kineki maj tikuikan. Keman tikchiuaj, tiknextiaj ke tiknekij timotokiskej iuan. Biblia kijtoua ke Dios kimati akoni tanemilijtok itech itokay (Malaquías 3:16).

Motelneki tikmatiskej keniuj monotsa Dios porin nejon techpaleuis maj peua tikixmatikan. Uan no, moneki tikmatiskej keniuj tamati.

¿KATIYEJUA ITOKAY DIOS? Itokay Dios yejua Jiova. Nejon tokayit kinextia ke sayoj yejua ueli kichiua nochi tein kiixtalia.

¿AKONI KICHIJCHIUAK DIOS?

Miakej motajtanianij nejon uan xa tejuatsin no. Komo nochi tein onkak aksa kichijchiuak, ¿keniuj peuak nemi Dios?

Miakej tamatinij kineltokaj ke nochi tein onkak kipiak ipeujyan. Nejin tein kineltokaj mouika iuan tajkuilol tein ika peua Biblia, kampa kijtoua: “Keman peuak nochi, Dios kichijchiuak iluikak uan taltikpak” (Génesis 1:1).

Nochi tein onkak amo ueliskia iselti mochijchiuas. Se taman amo ueli sayoj ijkon nesi. Axkan moajsi nochi tein onkak porin achto moajsik teisa. Maski ouij tikajsikamatiskej, monekik moajsis aksa akin amo ueli tikitaj uan nochipa nemi. Jiova, yejua se espíritu akin semi tamatkej uan kipia chikaualis, yejua kipeualtij nochi tein onkak (Juan 4:24, TNM).

Biblia kijtoua: “Achto ke nesiskiaj tepemej oso tikchiuaskia maj taltikpak nesi uan tal kampa moteltachiua, itech tonalmej tein amo kipia ipeujyan uan hasta itech tonalmej tein amo kipia itamian, tejua tiDios” (Salmo 90:2). Yejua ika, Dios nochipa nemini uan yejua tachijchiuak “keman peuak nochi” (Apocalipsis [Revelación] 4:11).