Kampa monankilia netajtanilmej
◼ ¿Keniuj uelis tikinpaleuiskej akin amo tanojnotsajok maj oksepa mochiuakan tanojnotsanij?
Techpaktia keman akin kisenkauak itekiyo Dios kinextia ke oksepa kineki kitekitilis Jiova ika nochi iyolo (Luc. 15:4-6). Xa keman kipiak ouijkayomej oso kiixnamikkej kichiuak maj kisenkaua inemachtil ika Biblia, nechikolmej uan tanojnotsalis. ¿Toni uelis tikchiuaskej tein kipaleuis maj mochikaua ikuali uikalis iuan Jiova?
Tinochin moneki tiknextiliskej akin oksepa kineki kitekitilis Jiova ke yekmelauj tiktasojtaj. Tayekananij itech nechikol moneki niman kiitaskej toni kipoloua kichiuas tein kipaleuis maj kichikaua ikuali uikalis iuan Dios (Sant. 5:14, 15). Komo ayamo uejkaua keman kikauak tanojnotsalis, uelis xa ayamo panoua se xiuit, xa sayoj monekis maj kipaleui se tanojnotskej akin kuali kimatis keniuj kichiuas. Sayoj ke, komo uejkaujya kikauak nechikol, xa monekis maj kiseli okachi nepaleuil. Xa monekis maj oksepa kiseli se nemachtil ika Biblia, ika se amaix tein okachi uelis kipaleuis maj kichikaua itakuaujtamatilis uan inetasojtalis iuan Dios. Komo ijkon, akin kiixyekana tanojnotsalis itech nechikol kiixtalis maj se kuali tanojnotskej kimachti ika Biblia (Heb. 5:12-14; xikonita “Sección de preguntas” itech Nuestro Ministerio del Reino, noviembre de 1998). Komo tikonixmati aksa akin moneki kiselis nejon nepaleuil, xikonilui akin kiixyekana tanojnotsalis itech nechikol.
Achto ke tikyoleuaskej akin uejkaujya kikauak itekiyo Dios maj oksepa tanojnotsa, moneki maj ome tayekananij monechikokan iuan uan kiitaskej ox uelis oksepa mochiuas tanojnotskej. Yejuan kichiuaskej ijkon kemej keman mosentiliaj iuan akin kineki mochiuas tanojnotskej (xikonita La Atalaya, 15 de noviembre de 1988, pág. 17). Akin amo tanojnotsaok moneki yekmelauj kinekis kiteixmatiltis iTajtol Dios. No moneki kichiuas ijkon kemej motajtani itech amaix Organizados, páginas 79 hasta 81, uan nochipa yas nechikolmej.
Komo kiixtalia momachtis, monechikos uan tanojnotsas, nejon kipaleuis maj mochikaua ikuali uikalis iuan Jiova uan maj amo kikaua ojti tein teuika itech nemilis nochipaya (Mat. 7:14; Heb. 10:23-25). Komo senkis mochikaua uan kitemoua kipias kualneskayomej kemej itatojtokakauj Cristo, ‘amo nenkajtis san tein kichiuas’ (2 Ped. 1:5-8).