¿Tikonpia moixtololo tein yektekiti?
1. ¿Toni kijtosneki se kipias se ‘ixtololo tein yektekitiʼ?
1 Tein tikitaj moteluika iuan tein tikchiuaj. Yejika semi kuali tein Jesús kijtoj: “Takan namoixtololouan yek tekitij kemej se kuali tanex, no ijkon kuali namechtauilia tech nochi namonakayo” (Mat. 6:22). Keman toixtololo moajsi kemej Jesús kijtoj, kiita sayoj se taman. ¿Toni nejin? Kichiuas itanejnekilis Dios. Kijtosneki ke tiktayekanaltiaj iTekiuajyo Dios uan amo sayoj tiksentiliaj miak taman, niono tikchiuaj tein techtsakuilia maj titanojnotsakan.
2. ¿Toni uelis techuikas maj tikitakan ke motelneki tikpiaskej teisa, uan toni techpaleuis maj amo techpano nejon?
2 ¿Nikpia noixtololo tein yektekiti? Tikitaskej ke motelneki tikpiaskej teisa, komo tikneltokaj tein kinextiaj tanamakanij oso tikitaj tein kipiaj oksekin. Yejika akin kipia tamatilis, achto ke kinemilis kichiuas oso kikouas teisa tein kiuikilis miak tonalmej, tomin oso chikaualis, kuali ‘kiixejekouaʼ uan motajtania ox kipaleuis oso kitsakuilis maj kichiua itekiyo Dios (Luc. 14:28; Fili. 1:9-11). No moneki maj kemansa tikitakan keniuj uelis tikauaskej seki taman tein amo semi tayekantok, uan ijkon uelis okachi titekitiskej itech tanojnotsalis (2 Cor. 13:5; Efe. 5:10).
3. ¿Toni techmachtia tein kipanok se tokniuj siuat akin kikauak seki taman itech inemilis?
3 Se tokniuj tein mochiuak precursora regular, kinemilij kisentokas tekitis nochi tonalmej maski kiajsiskia tomin komo tekitiskia sayoj seki tonalmej. Satepan kiajsikamatik nejin: “Amo akin ueli kitekitilia ome tekomej. Monekik nikauas notanejnekilis uan sayoj nikitas noixpanolis. Nikajsikamatik ke panouasaj tein niksentilijtoya, uan semi nechsiyoujtijtoya”. Yejua kiitak ke ueliskia kikauas seki taman. Kipatak tekit tein kipiaya uan nejon kipaleuij maj kisentoka tekiti kemej precursora.
4. ¿Keyej axkan okachi motelneki maj tikpiakan toixtololo tein yektekiti?
4 Kemej tinemij itech tonalmej keman moneki maj timoijsiuilikan, okachi moneki maj tikpiakan toixtololo tein yektekiti. Ijkon kemej panotiuj tonalmej, okachi motokia tonal keman ixpoliuis nochi tein axkan mochiujtok uan peuas xochital tein Dios kiualkuis (1 Cor. 7:29, 31). Komo tiktayekanaltiaj tanojnotsalis uelis timomakixtiskej tejuan uan akin techkakij (1 Tim. 4:16).