¿Moneki okachi nitekitis itech tanojnotsalis?
1. ¿Toni uelis kitekipachos se itekitikauj Dios?
1 ¿Kemansa tikonmachilia ke amo miak tein tikonchiua? Xa amo ueliok tiontanojnotsati kemej achto porin tionxiuejya, mitsontsakuilia kokolis oso mochankauan uan nejin kichiua amo kuali xionmomachili. Se tokniuj siuat tein kipia eyi ikoneuan kijtoua ke kemansa amo kuali momachilia porin moneki kinitas ichankauan uan amo semi ueli tanojnotsati. Keman techpanos ijkon, ¿toni techpaleuis maj tikitakan ika taixejekolis nejon?
2. ¿Toni kichia Jiova maj tikchiuakan?
2 Toni kichia Jiova. Tinochin tikuelitaskiaj okachi tiktekitiliskej Jiova. Sayoj ke tel taman tein tikuelitaskiaj tikchiuaskej uan tein ueli tikchiuaj. Keman tikijtouaj ke okachi tiknekij titekitiskej, tiknextiaj ke tiknekij tikchiuaskej nochi tein tiueliskej. Sayoj ke, moneki tikelnamikiskej ke Jiova kuali techixmati uan amo techtajtania maj tikchiuakan tein kimati ke amo tiueliskej (Sal. 103:13, 14). Komo ijkon, ¿toni kichia maj tikchiuakan? Yejuatsin kineki maj tiktekitilikan ika nochi toyolo uan maj tikmakakan nochi tein tiueliskej (Col. 3:23).
3. ¿Toni techpaleuis maj tikitakan tein kemaj uelis tikchiuaskej itech tanojnotsalis?
3 ¿Toni techpaleuis maj tikitakan tein kemaj uelis tikchiuaskej? Uelis tiktajtaniskej Jiova maj techpaleui maj tikitakan keniuj yekmelauj timoajsij (Sal. 26:2). No uelis techpaleuis komo tiktajtaniaj se tokniuj takuaujtamach, akin kuali techixmati, kualtsin iuan timouikaj uan amo kimouilia techiluis komo moneki timotekitiliskej itech se taman (Pro. 27:9). Uan no, moneki tikelnamikiskej ke mopata tonemilis, yejika semi kuali maj kemansa timoitakan keniuj timoajsij (Efe. 5:10).
4. ¿Keniuj moneki tikitaskej keman techelnamiktiaj ika Biblia keniuj moneki titekitiskej itech tanojnotsalis?
4 Keniuj moneki tikitaskej taelnamiktilis. Keman motatanij itech se tsikuinalis, tachianij kitsajtsiliaj akin kipaleuiaj porin kinekij maj tatani uan amo porin kinekij kiyolkokoskej. No ijkon, keman techyolchikauaj ika Biblia uan techelnamiktiaj itech nechikolmej uan itech amaixmej maj ijsiujka ‘titanojnotsakan ika in Tajtoltsin de Diosʼ, kichiuaj porin ika techpaleuiaj, uan amo porin kinekij kinextiskej ke amo miak tein tikchiuaj (2 Tim. 4:2). Kemaj, uelis senkis tikneltokaskej ke komo tikchiujtokej nochi tein tiuelij, Jiova kielnamikis uan kiselis ‘tekit uan netasojtalisʼ tein tiknextiaj (Heb. 6:10).