Kemaj uelis titanojnotsaskej kampa yeski timoajsiskej
1. 1) ¿Toni kijtosneki se tanojnotsas kampa yeski? 2) ¿Kanachimej tein nikan timonechikojtokej yekinika namechtapouijkej iTajtol Dios maski amo yetoyaj kajkalpan?
1 ¿Kanachimej tein moajsij itech monechikol yekinika kintapouijkej iTajtol Dios maski amo yetoyaj kajkalpan? Xa tikonmoujkakakis tikonmatis kanachimej. Titanojnotsaskej kampa yeski, kijtosneki tikintapouiskej kuali tanauatilmej akin tikinitaj keman titakalpanotij, tiyouij kansaika, titakouatij, tiyouij escuela, itech tekit uan kampa yeski. Itech se oloch tein moajsiaj panoua 200 itaixpantijkauan Jiova tein moauijkejya, 40% yekinika kintapouijkej iTajtol Dios maski amo yetoyaj kajkalpan. Nejin kinextia ke semi kuali kisa maj titanojnotsakan kampa yeski timoajsiskej.
2. ¿Akonimej ixnesij itech Biblia akin tanojnotskej kampa yeski moajsiaj?
2 Tanojnotsanij itech yekinika siglo kitetapouiayaj kuali tanauatilmej kampa yeski. ¿Akonimej ijkon kichiujkej? Keman Jesús panotoya Samaria, kitapouij iTajtol Dios se siuat tein atakuito itech iameyal Jacob (Juan 4:6-26). Felipe peuak kinojnotsa se ueyichiujkej etíope akin kiixtajtoltijtoya amaix Isaías ijkuak kitajtanij: “¿Xe tikonajsikamatilia de nojon tikinleerojtok?” (Hech. 8:26-38). Keman Pablo tsaktoya itech altepet Filipos, yejua kinojnotsak se cárcel tajpixkej (Hech. 16:23-34). Satepan, keman Pablo kiyekpixtoyaj itech se kali kampa tepal yetoya, “kinseliaya nochi ne naken yeskij ualayaj [kikalpanokij]. Uan in Pablo kitetapouiaya [“iTekiuajyo Dios”, NM] ika miak yolchikaualis [...]. Uan kachi ok kinmachtiaya den ichipaujkanemilis de Totekotsin Jesucristo” (Hech. 28:30, 31). ¿Keniuj no uelis tiontanojnotsas kampa yeski tionmoajsis maski tikonmouilis tiontajtos?
3. ¿Toni uelis techpaleuis komo tikmachiliaj ke amo uelis titajtoskej?
3 Yekinika taman. Timiakej tikitaj tel ouij tipeuaskej titajtoskej iuan akin amo tikixmatij. Uan maski tikixmatijya, ipa tel ouij techkisa tiktapouiskej iTajtol Dios. Sayoj ke komo tiknemiliaj ke Jiova techmaka tein kuali, techmaka tel kuali tamachtilis, uan ke taltikpakneminij moajsij kampa tel amo takualyan, techolinis maj titanojnotsakan (Jon. 4:11; Sal. 40:5; Mat. 13:52). Uan no, uelis tiktajtaniskej Jiova maj ‘techyolchikauaʼ (1 Tes. 2:2). Kemej kijtoj se akin momachtito Galaad: “Nikita ke netataujtil nechpaleuia keman nikmachilia ke amo uelis nikinnojnotsas taltikpakneminij”. Komo tikmachiliaj ke amo uelis titajtoskej, moneki tikchiujtiuetsiskej se netataujtil ika tajtol amo chikauak (Neh. 2:4).
4. ¿Toni achto moneki tiktaliskej itech toyolo tikchiuaskej uan keyej?
4 Keman titanojnotsaskej kampa yeski, amo moneki tipeuaskej tiknojnotsaskej aksa kemej tikchiuaj kajkalpan oso niman tikixtajtoltiliskej se texto. Ta sayoj tiktaliskej itech toyolo tikpeualtiskej titajtoskej iuan aksa, uan amo tikmachiliskej ke moneki niman tiktapouiskej iTajtol Dios. Miakej tanojnotsanij kijtouaj ke kichiuaskej ijkon, kinpaleuia maj kuali momachilikan uan yolik uelij kikalakiaj iTajtol Dios itech imin tanojnotsalis. Komo taltikpaknenkej amo kineki tajtos touan, amo onkak keyej tikchikaujkauiskej maj kichiua. Ika poujkaitalis iuan timonauatiskej uan tikauaskej.
5. ¿Toni kipaleuia se tokniuj siuat tein kimouilia tajtos maj kitematilti kuali tanauatilmej kampa yeski?
5 Se tokniuj siuat tein kimouilia tajtos kichiua nejin: keman youi takouati, yekinika kiixita aksa uan tepitsin kiuetskilia. Komo yejua no ijkon kichiua, tokniuj kiiluia ome eyi tajtolmej. Komo taltikpaknenkej kuali tanankilia, kipaleuia tokniuj maj kuali momachili uan kisentoka tajtoua iuan. Tokniuj kuali kikaki tein kiiluia uan kinemilia toni taman tein kijtoua iTajtol Dios kiuelkakis taltikpaknenkej. Kichiuas nejon kitelpaleuia, ta uelikya kitemakak miak amaixmej uan hasta kipeualtijya se nemachtil ika Biblia.
6. ¿Keniuj uelis peuas titajtoskej keman titanojnotsaskej kampa yeski?
6 Komo tikitaj toni techpaleuis. ¿Toni uelis tikijtoskej keman tipeuaskej titajtoskej? Keman Jesús peuak tajtoj iuan siuat itech ameyal, sayoj kitajtanij maj kimaka at (Juan 4:7). Tejuan xa no uelis tipeuaskej titajtoskej komo tiktajpalouaj aksa oso tikchiuiliaj se netajtanil. Keman iuan titajtojtoskejya, tikitaskej ox uelisya tikiluiskej se tanemilil bíblico uan ijkon xa uelis tiktokaskej xinach tein mouika iuan iTajtol Dios (Ecl. 11:6). Sekin kiitaj ke tel kuali kisa komo kijtouaj tajtolmej tein tetanemililtij uan tein kinolinis maj kinekikan kimatiskej okachi. Se neskayot, keman tiyetoskej tapajtiloyan porin tikchixtokej tapajtijkej, uelis peuas titajtoskej komo tikijtouaj: “¡Tel kualtsin eski keman amo nikpiasok kokolis!”.
7. Komo tikinitaj keniuj moajsij oksekin, ¿keniuj techpaleuis maj tiuelikan titanojnotsakan kampa yeski?
7 Komo tikinitaj keniuj moajsij taltikpakneminij, no techpaleuis maj tipeuakan titajtokan. Komo tikitaj se tepopaj iuan ikoneuantsitsin tein nesi ke yektakakij, uelis tikiluiskej ke semi kuali tein kichiua uan tiktajtaniskej: “¿Toni mitsonpaleuia xikonchiua nejon?”. Se tokniuj siuat kikaki toni ika tajtouaj oksekin itekitikaikniuan, uan kinuikilia amaixmej tein ika motajtoua tein kinekij kimatiskej. Keman kimatik ke se itekitikaikniuj siuat yaya monamiktiti, tokniuj kiuikilij amaix ¡Despertad! tein kijtoua toni moneki kichiuaskej akin monamiktitij. Nejon tapaleuij maj okachi ika tajtokan Biblia.
8. ¿Keniuj ika amaixmej uelis tipeuaskej titajtoskej?
8 Tikixtajtoltiskej amaixmej kampa uelis techitaskej oksekin, no uelis techpaleuis maj tipeuakan titajtokan. Se tokniuj kiixtapoua La Atalaya oso ¡Despertad! itech se tamachtilis tein teyoltilana, uan peua kiixtajtoltia ika tajtol amo chikauak. Komo kiita ke aksa kiitilijtok iamaix, kichiuilia se netajtanil oso kiiluia ome eyi tajtolmej tein kiualkui tamachtilis. Nejon kipaleuia maj peua tajto iuan aksa uan maj kimatilti iTajtol Dios. Uan no, komo tikauaj amaixmej kampa nochin uelis kiitaskej, xa sekin tein imiuan titekitij oso imiuan timomachtiaj escuela, kinekiskej kimatiskej toni ika tajtoua nejon amaixmej.
9, 10. 1) ¿Keniuj uelis tiktemoskej titanojnotsaskej kampa yeski? 2) ¿Keniuj tikonchiuani nejon?
9 Tiktemoskej titanojnotsaskej. Kemej moneki ijsiujka titanojnotsaskej, maj amo sayoj titanojnotsakan komo uelik. Ta moneki tiktemoskej keniuj tiktematiltiskej iTajtol Dios kampa yeski. Maj achto timonemilikan akonimej uelis imiuan timoitaskej uan maj tiknemilikan keniuj uelis titajtoskej imiuan. Maj nochipa tikpiakan Biblia uan amaixmej tein uelis tikinmakaskej akin kinekiskej kimatiskej okachi (1 Ped. 3:15).
10 Miakej tanojnotsanij tein kitemouaj kitetapouiskej iTajtol Dios, kiajsij miak taman keniuj uelis tanojnotsaskej kampa yeski. Se neskayot, se tokniuj siuat akin nemi itech se edificio kampa tel tajpixtokej, youi kampa moixpetaniaj uan ompa peua kisajsaloua rompecabezas tein kipia se kualtsin paisaje. Keman oksekin tein ompa panouaj, kijtouaj ke tel kualtsin nesi nejon paisaje, yejua peua tajtoua imiuan uan kintapouia ke Biblia kijtoua ke onkas “se yankuik eluiyak uan se yankuik taltikpak” (Apo. 21:1-4). ¿Ueli tikonnemilia okseki taman keniuj uelis tiontanojnotsas kampa yeski?
11. ¿Keniuj uelis tiksentokaskej tikinmachtiskej akin kiuelkakij keman titanojnotsaj kampa yeski?
11 Tiksentokaskej tikinmachtiskej. Komo tikajsij se akin kiuelkakik tein tikiluijkej, maj tiktemokan keniuj tiksentokaskej tikmachtiskej. Komo tikitaj ke ueli, maj tikiluikan: “Nechmakak miak pakilis nitajtos mouan. ¿Kani uelis nimitsonajsis uan ijkon oksepa uelis titajtoskej?”. Sekin tanojnotsanij sayoj kinkauiliaj dirección uan itapoual teléfono uan kiniluiaj: “Nechmakak miak pakilis nitajtos mouan. Komo tikonneki tikonmatis okachi tein axkan ika titajtojkej, nikan uelis tinechonajsis oso tinechonnotsas”. Komo tejuan amo uelis tiksentokaskej tikmachtiskej akin tikajsikej, maj niman tikijkuilokan itech amat Sírvase visitar (S-43-S) uan maj tikmakakan tajkuilojkej itech tonechikol, ijkon yejua kipanoltilis okse nechikol tein uelis kisentokas kikalpanos.
12. 1) ¿Keyej moneki maj amo tikelkauakan tikijkuilojtiyaskej tiempo tein titanojnotsaskej kampa yeski? 2) ¿Keniuj tapaleuia titanojnotsaskej kampa yeski? (Xikonita recuadro “Tanojnotsalis tein amo mochiua kajkalpan no kiualkui tein kuali”.)
12 Moneki tikijkuiloskej itech informe tiempo tein titanojnotsaj kampa yeski. Yejika, maj amo tikelkauakan tikijkuilojtiyaskej maski tikchiuaskej sayoj ome eyi minuto itech se tonal. Maj tiknemilikan nejin: komo nochin tanojnotsanij kitematiltiaj iTajtol Dios kampa yeski moajsiskej sayoj makuil minuto itech se tonal, senochia ajsiskia panoua 17 millones ika horas itech se metsti.
13. ¿Toni moneki techolinis maj titanojnotsakan kampa yeski?
13 Netasojtalis tein tikpialiaj Dios uan taltikpakneminij, techolinia maj titanojnotsakan kampa yeski (Mat. 22:37-39). Kemej tiktasojkamatij ika nochi toyolo ikualneskayouan Jiova uan itanejnekilis, techolinia maj tiktematiltikan “ikualtsinyo ueyiot tein kipia iueyi taixyekanalis” (Sal. 145:7, 10-12). Kemej yekmelauj iminka timotekipachouaj taltikpakneminij, techolinia maj tiktemokan keniuj tiktematiltiskej kuali tanauatilmej kampa yeski axkan ke ueliok (Rom. 10:13, 14). Komo timonemiliaj akonimej uelis tikinajsiskej uan timomachtiaj tein tikijtoskej, tinochin uelis titanojnotsaskej kampa yeski, uan uelis tikpiaskej yolpakilis tein se kipia keman se kipaleuia aksa akin yolmelauak maj kiixmati iTajtol Dios.
[Tajtolmej itech página 4]
Techtelpaleuis komo sayoj timoteixmatiltiaj iuan aksa uan peua titajtouaj iuan
[Tajtolmej itech página 5]
Miakej tanojnotsanij tein kitemouaj kitetapouiskej iTajtol Dios, kiajsij miak taman keniuj uelis tanojnotsaskej kampa yeski
[Tajtolmej itech página 5]
Tein techpaleuis maj tipeuakan titajtokan
◼ Maj tiktataujtikan Jiova maj techpaleui maj tipeuakan titajtokan
◼ Maj tiktajpalokan akin nesi ke kualtakat uan amo ijsiujtok
◼ Maj tikixitakan, maj tepitsin tikuetskilikan uan maj tikiluikan ome eyi tajtolmej tein kiyoltilanas
◼ Maj kuali tikakikan tein techiluia
[Tajtolmej itech página 6]
Tanojnotsalis tein amo mochiua kajkalpan no kiualkui tein kuali
• Keman se tokniuj mochixtoya maj kiyektalilikan icoche, yejua kinnojnotsak akin ompa moajsiaj uan kinkauilij se amatsin tein kinyoleuaya maj kikakitij se tanojnots bíblico itech ueyi nechikol. Se xiuit satepan itech se ueyi nechikol, se aksa kitajpaloj tokniuj tein yejua amo kiixmatia. ¡Katka semej akin kimakaka amatsin kampa kitechijchiualtito icoche se xiuit achto! Takat yajka kikakito tanojnots, tajtanik se nemachtil ika Biblia uan axkan yejua uan inamik moauijkejya.
• Se tokniuj siuat akin yekinika kitapouijkej iTajtol Dios maski amo moajsiaj kajkalpan, kiita ke uelis kinnojnotsas taltikpakneminij tein kinixmati itechkopa eyi ikoneuan. Nejin taltikpakneminij yejuan tein ompakauin nemij, tetatmej tein moita imiuan itech escuela uan tein kinita keman kipiaj nechikol tetatmej. Nochipa ke moteixmatiltia akoni yejua, kijtoua ika nochi iyolo keniuj Biblia kitelpaleuia maj kiniskalti ikoneuan. Uan ompa, ika miak tamatilis kipata itanojnots. Ijkuak kichiua nejon, kipaleuia maj amo ouijok ika tajto Biblia keman oksepa imiuan tajtoua. Nejon tein kichiua tel kuali kisa, ta uelikya kinpaleuij 12 taltikpakneminij maj moauikan.
• Keman se takat tein kinamaka seguros ajsik ichan se tokniuj siuat, yejua kiitak ke ueliskia kitapouis iTajtol Dios. Tokniuj kitajtanij takat ox kiuelitaskia kipias seguro tein mouika iuan tapajtilis, yolpakilis uan nemilis nochipaya. Takat kijtoj ke kemaj uan kitajtanij toni taman seguro ika tajtouaya tokniuj siuat. Yejua kinextilij ika Biblia toni motenkaua kichiuas Dios uan kimakak se amaix. Nejon takat kiixtajtoltij nochi itech sayoj se tiotak. Ompa, kiitakej maj se tokniuj kimachti ika Biblia, peuak youi nechikolmej uan satepan moauij.
• Keman se tokniuj siuat yajtoya itech se avión, peuak kinojnotsa se siuat tein iuan motalij uan uelik kimatiltij iTajtol Dios. Keman ajsikej kampa yayaj, tokniuj kimakak dirección uan itapoual teléfono uan kiiluij maj kintajtani itaixpantijkauan Jiova se nemachtil ika Biblia keman oksepa kitajpaloskej. Sayoj se tonal satepan, ome itaixpantijkauan Jiova tanotskej ichan siuat. Yejua peuak momachtia Biblia uan ijsiujka kichiuak tein momachtiaya, moauij uan amo uejkauak, yejuaya kiixyekantoya eyi tamachtilmej ika Biblia.
• Se tokniuj takat tein kipia 100 xiujmej uan amo tachia, moajsi itech se kali kampa kinyekpiaj akin xiuejkejya. Yejua miakpa kijtoua: “Moneki maj uikia iTekiuajyo Dios”. Nejon kinolinia enfermeras uan oksekin tein mokokouaj maj kichiuilikan netajtanilmej tokniuj uan ueli kinmelauilia toni iTekiuajyo Dios. Se tonal, semej siuamej tein ompa tekitij, kitajtanij tokniuj toni kichiuas itech Xochital. Yejua tanankilij: “Nejua oksepa nitachias uan ninejnemis uan nikchichinos nosilla de ruedas”. Kemej tokniuj amo tachia, kiiluia nejon siuat maj kiixtajtoltili revistas. Se tonal, keman isiuapil tokniuj kikalpanoto, nejon siuatekitikej kitajtanij ox uelis kiuikas ichan nejon revistas. Se enfermera kiiluij tesiuapil: “Axkan nikan ika titajtouaj ke ‘Moneki maj uikia iTekiuajyo Diosʼ”.
• Se tokniuj siuat tein yetoya itech restaurante uan kichiujtoya fila, kikakik ke seki takamej tein xiuejkejya ika tajtouayaj política kampa tokotsyetoyaj. Keman semej tein ompa moajsiaj kijtoj ke tekiuanij amo uelij kimelauaj kuejmolmej tein kipiaj taltikpakneminij, tokniuj kinemilij: “Axkan uelis nikinnojnotsas”. Kichiujtiuetsik se netataujtil uan motokij kampa yetoyaj. Achto moteixmatiltij uan ompa kintapouij ke moajsi se tekiuajyot tein kiyektalis nochi kuejmolmej tein onkak nikan taltikpak, uan nejin yejua iTekiuajyo Dios. Ompa, kinnextilij se folleto. Keman kichiujtoya nejon, motokij akin kinixyekana tekitinij. Tokniuj kinemilij ke kiiluiskia maj youi, sayoj ke amo kichiuak nejon, ta kiiluij ke kikaktoya itanojnots uan no kinekia se folleto. Ompa, se siuatekitikej tein no kikaktoya motokij iuan tokniuj uan ixayojtemotoya. Nejin siuat achto kiselijtoyaya se nemachtil ika Biblia uan oksepa kinekia kisentokas momachtis.