“Amo ximoui”

1. Ijkon kemej kipanok Jeremías, ¿toni ouijkayomej uelis tikpiaskej?

¹ Keman Jiova kiixpejpenak Jeremías maj mochiua itanauatijkauj, yejua kimachiliaya ke amo ueliskia kichiuaskia nejon tekit. Sayoj ke Jiova kiiluij ika netasojtalis: “Amo ximoui”. Yejuatsin kiyolchikauak uan ijkon ueliskia kichiuaskia tekit tein kinauatijka (Jer. 1:6-10). Axkan tejuan no ijkon uelis techpanos. Komo tikmouiliaj titajtoskej oso tiknemiliaj ke amo kuali techkisas, uelis techtsakuilis maj amo titanojnotsakan. Komo tikmouiliaj maj amo kuali techkakikan oso maj amo kuali techitakan, uelis kemansa techtsakuilis maj amo tiktematiltikan iTajtol Dios. ¿Toni techpaleuis maj amo tikmouilikan titanojnotsaskej? ¿Toni tatiochiualismej tikseliskej?

2. Komo timomachtiaj keniuj titanankiliskej, ¿keniuj techpaleuis maj amo semi tikmouilikan titanojnotsaskej?

² Maj achto timomachtikan. Komo timomachtiaj tein tikijtoskej techpaleuis maj amo semi timouikan. Se neskayot, komo achto tiknemiliaj toni ika uelis techixnamikiskej, techpaleuis maj tikpiakan se tanemilil keniuj titanankiliskej (Pro. 15:28). Nejon uelis tikchiuaskej itech Youak keman tiTaueyichiuaj kemej Kalyetouanij. Maj tiknemilikan ome eyi taman toni okachi ika techixnamikij itech escuela oso itech tanojnotsalis, uan maj tiktemokan keniuj titanankiliskej (1 Ped. 3:15).

3. ¿Keniuj komo titakuaujtamatij iuan Jiova techpaleuis maj amo tikmouilikan titanojnotsaskej?

³ Maj titakuaujtamatikan iuan Jiova. Komo titakuaujtamatij iuan Dios, techtelpaleuis maj amo tikmouilikan titanojnotsaskej. Jiova techyekiluia ke techpaleuis (Isa. 41:10-13). ¡Yejua okachi ueyi nepaleuil tein uelis tikpiaskej! Uan no, Jesús techyekiluij ke maski tikpanoskej se taixnamikilis tein amo tikchiayaj, iespíritu Dios techpaleuis maj tiktematiltikan iTajtol Jiova kemej moneki (Mar. 13:11). Yejika, moneki mojmostaj tiktajtaniskej maj techmaka iespíritu (Luc. 11:13).

4. ¿Toni tatiochiualismej tikseliaj keman tiksentokaj titanojnotsaj maski tikpiaj ouijkayomej?

⁴ Tatiochiualismej tein tikseliskej. Komo tiksentokaj titanojnotsaj maski techixnamikij, techpaleuis maj tikxikokan ouijkayomej tein uelis ualas satepan. Uan no, okachi tikpiaskej yolchikaualis tein kitemaka iespíritu Dios (Hech. 4:31). Uan kemej ika inepaleuil Jiova timoyolchikauaj titanojnotsaskej, mochikaua totakuaujtamatilis uan senkis tikneltokaj ke yejuatsin mochiuas totemakixtijkauj (Isa. 33:2). No tiyolpakij uan kuali timomachiliaj tikmatiskej ke tikyolpaktijtokej toTajtsin tein nemi iluikak (1 Ped. 4:13, 14). Yejika, maj amo tikmouilikan titetapouiskej iTekiuajyo Dios, ta maj tikchiuakan ika yolchikaualis uan maj nochipa titakuaujtamatikan ke Jiova techpaleuis.