¿Keniuj uelis tikpaleuiskej se tokniuj inamik tein amo taneltoka?
1. ¿Keyej amo sayoj tokniuj tein kipia inamik tein amo taneltoka kineki kipaleuis maj kiseli iTajtol Dios?
1 ¿Moajsi itech monechikol se tokniuj tein inamik amo taneltoka? Komo ijkon, senkis tikneltokaj ke nejon tokniuj kineki maj inamik no kiueyichiua Dios. Uan amo sayoj yejua. Nochin tein monechikouaj tanemiliaj kemej Dios, akin “kimonekiltia ke nochi in taltikpakuanij maj makisakan de nintajtakoluan para maj ijkon kajsikamati[kan] in melauak Tajtoltsin de Dios” (1 Tim. 2:4). ¿Keniuj uelis tikpaleuiskej inamik se tokniuj tein moajsi itech tonechikol?
2. ¿Keniuj uelis tikpaleuiskej se tokniuj inamik tein amo taneltoka komo tikajsikamatij?
2 Yekinika, moneki timochikauaskej tikitaskej keniuj tanemilia tokniuj inamik tein amo taneltoka. Miakej xa kintasojtaj imin chankauan uan mochikauaj mochiuaskej se kuali namik uan tepopaj oso temomaj, sayoj ke xa no taman tein kineltokaj. Uan xa sayoj tepitsin kinixmatij itaixpantijkauan Jiova, porin kiniluianij tein amo melauak akin imiuan mouikaj. Miakej xa amo kuali momachiliaj porin tiempo tein achto kikuia inamik imiuan ichankauan axkan kikui itech itaueyichiualis. Komo tikajsikamatij tokniuj inamik tein amo taneltoka, techpaleuis maj iuan titajtokan ika yemanik tajtolmej uan poujkaitalis, uan maj kuali timomachilikan keman iuan tiyetoskej (Pro. 16:20-23).
3. ¿Toni okachi tapaleuis maj se tokniuj inamik tein amo taneltoka kineki momachtis?
3 Maj yekmelauj ika timotekipachokan. ¿Toni okachi tapaleuis maj se tokniuj inamik tein amo taneltoka kineki momachtis? Xa keman tipeuaskej tikpaleuiskej, okachi kipaleuis totachiualis uan amo komo tiknojnotsaj ika Biblia (1 Ped. 3:1, 2). Moneki tiknextiskej ke yekmelauj ika timotekipachouaj. Tokniuan siuamej uelis ika motekipachoskej siuat namikej, uan tokniuan takamej no ijkon uelis kichiuaskej iuan tetakauj tein amo taneltoka. ¿Keniuj uelis se kichiuas nejin?
4. ¿Keniuj uelis tiknextiskej ke yekmelauj ika timotekipachouaj tokniuj inamik tein amo taneltoka?
4 Komo ayamo tikonixmati tokniuj inamik, achto xikonilui tokniuj taneltokakej toni tikonnemilia tikonchiuas. Amo xionmoyolkoko komo nejon takat oso siuat namikej amo kuali mitsonselia. Komo tiktakachiuaj uan yekmelauj ika timotekipachouaj, uelis kiolinis maj okachi kuali kinita itaixpantijkauan Jiova (Rom. 12:20). Sekin tokniuan tein kuali tekititokej kiyoleuaj imin chan maj takuati akin amo taneltoka iuan ichankauan, porin ijkon uelis okachi kuali kiixmatiskej uan tapaleuis maj amo techitaok kemej achto. Yejuan ika tajtouaj tein kiyoltilana akin amo taneltoka uan amo kitemouaj ika tajtoskej taueyichiualis. Satepan, keman okachi kuali momachilis imiuan, uelis ika tajtoskej Biblia. Oso keman kiyoleuaskej maj youi semej tonechikoluan xa kinekis yas uan kikakitiuj toni momachtia inamik, uan okachiok komo kinixmatiya sekin tein monechikouaj. Uan maski ayamo kineki momachtis, moneki tiktasojkamatiliskej nepaleuil tein kimakatok inamik tein taneltoka.
5. ¿Keniuj tayekananij uelis kipaleuiskej tokniuj inamik tein amo taneltoka?
5 Yekinika tayekananij moneki kitemoskej keniuj kinpaleuiskej tokniuan imin namik tein amo taneltokaj, uan kitemoskej kinmatiltiskej iTajtol Dios. Se tokniuj inamik akin achto amo kinekia kikakis tamachtilis, uelis kikakis yolchikaualis tein kitemaka Biblia keman moajsis tapajtiloyan oso motelkokoua. Komo itech kalyetouanij semej namikuanij amo taneltoka uan kipanouaj se ueyi tayokol, xa keman semej kalyetouanij momikilia, tayekananij uelis kiyoleuaskej akin amo taneltoka maj no ompa yeto keman kinyolchikauaskej ika Biblia kalyetouanij.
6. ¿Keyej moneki tiktemoskej keniuj tikpaleuiskej se tokniuj inamik tein amo taneltoka?
6 Maj timonemilikan keniuj yolpakis tokniuj komo inamik mochiua se itekitikauj Dios. Nejon no kiualkuilia ueyi yolpakilis Jiova, ángeles uan nochin tein moajsij itech tonechikol (Luc. 15:7, 10). Sayoj ke komo se tokniuj inamik tein amo taneltoka ayamo kineki kiselis iTajtol Dios, uelis tiyolpakiskej tikmatiskej ke tein tikchiuaj kiyolpaktia Jiova, akin “amo kineki maj senmej ixpoliuikan. Ta, [...] kimonekiltia ke tinochin maj timoyolnemilikan de totajtakoluan” (2 Ped. 3:9).
[Tajtolmej itech página 6]
¿Toni okachi tapaleuis maj se tokniuj inamik tein amo taneltoka kineki momachtis? Xa keman tipeuaskej tikpaleuiskej, okachi kipaleuis totachiualis uan amo komo tiknojnotsaj ika Biblia