Maj moita ke tiktasojkamatij tein Jiova kichiua
Imikilis Jesús tikelnamikiskej itech tonal 17 metsti abril
1. Ijkon kemej momachilij salmista, ¿toni moneki okachi tikmachiliskej itech tonalmej keman moelnamiki imikilis Jesús?
1 Kemej salmista kitasojkamatia kimatis ke Jiova miakpa kinextiani ke teiknelia uan temakixtia, kiolinij maj tajtani: “¿Keniuj niktaxtauis Jiova ika nochi tein ika nechpaleuia?” (Sal. 116:12). Axkan moajsi se taman keyej itekitikauan Dios moneki okachi motasojkamatiskej. Ta miak xiujmej satepan ke moijkuiloj nejin tajtolmej, Jiova kinmakak taltikpakneminij se netetayokolil tein okachi ueyi, uan nejin yejua inemilis Jesús kemej se taxtauil. Ijkon kemej titanemilijtiyaskej itech tonal 17 metsti abril keman tikelnamikiskej imikilis Jesús, tiknekij maj moita ke timotasojkamatij (Col. 3:15).
2. ¿Keyej moneki maj tiktasojkamatikan taxtauil tein Jesús kitemakak?
2 Tatiochiualismej tein techualkuilia taxtauil. Ika inemilis Jesús tein kitemakak kemej se taxtauil, Dios ueli ‘techtapojpoluia totajtakoluan’ (Col. 1:13, 14). Nejin techpaleuia maj tikmachilikan ke Jiova techselia keman tikueyichiuaj (Heb. 9:13, 14). No kuali timomachiliaj titajtoskej iuan Jiova itech netataujtil (Heb. 4:14-16). Uan kemej tikneltokaj taxtauil tein Jesús kitemakak, tikchiaj tikseliskej nemilis nochipaya (Juan 3:16).
3. ¿Keniuj uelis tiknextiskej ke tiktasojkamatiliaj Jiova maj techmakani inemilis Jesús kemej se taxtauil?
3 Maj moita ke timotasojkamatij. ¿Keniuj uelis tiknextiskej ke timoteltasojkamatij? Se taman komo mojmostaj tikixtajtoltiaj Biblia tein ixyetok tikitaskej achto ke tikpiaskej nejon Talnamikilis uan itech titanemiliaj tein tikixtajtoltiaj. Uan tamachtilis “¿Está usted listo para el día más importante del año?” tein kiualkui La Atalaya 1 de febrero de 2011, techpaleuis maj tikchiuakan nejon. Okse taman, moneki ika nochi toyolo tikiluiskej Jiova itech netataujtil ke tikteltasojkamatij nejon taxtauil (1 Tes. 5:17, 18). No tiknextiskej ke timoteltasojkamatij komo tiyetokej itech Talnamikilis ijkon kemej tanauatij Jesús (1 Cor. 11:24, 25). Uan no, komo tiknextiaj netasojtalis kemej Jiova uan tikinyoleuaj nochin taltikpakneminij tein uelis maj touan mosentilikan nejon tonal (Isa. 55:1-3).
4. ¿Toni moneki tiktaliskej itech toyolo tikchiuaskej?
4 Itekitikauan Jiova tein motasojkamatij amo kiitaj nejon Talnamikilis kemej sayoj se nechikol, ta kiitaj kemej se nechikol tein okachi motelneki itech nochi xiuit. Yejika, ijkon kemej ajsitiyas tonal keman tikpiaskej nejon Talnamikilis, maj senkis tiktalikan itech toyolo tikchiuaskej kemej salmista kijtoj: “Nikueyichiua Jiova uan amo nikelkaua nochi tein kichiua” (Sal. 103:2).