Maj amo tiyolijsiuikan itech tanojnotsalis
1. ¿Keniuj Jiova kinnextiliani taltikpakneminij ke amo yolijsiui?
1 Dios kinextia ke amo yolijsiui imiuan taltikpakneminij (Éxo. 34:6; Sal. 106:41-45; 2 Ped. 3:9). Semej tein okachi kinextia nejon, yejua tanojnotsalis tein mouika iuan iTekiuajyo Dios tein mochiujtok noyampa taltikpak. Ajsitokya 2,000 xiujmej Jiova kichiujtok maj miakej tein yolmelaujkej motokikan iuan, uan kisentoka kichiua nejon (Juan 6:44). ¿Keniuj uelis tiknextiskej itech tanojnotsalis ke amo tiyolijsiuij ijkon kemej Jiova?
2. ¿Keniuj tiknextiaj ke amo tiyolijsiuij keman titanojnotsaj?
2 Tanojnotsalis kajkalpan. Tiknextiaj ke amo tiyolijsiuij ijkon kemej Jiova, keman ‘amo tikauaj’ tanojnotsalis itech xolalmej kampa taltikpakneminij amo kinekij momachtiskej (Hech. 5:42). Tikxikouaj keman amo kinekij momachtiskej, techkejkelouaj uan keman kiixnamikij totanojnotsalis (Mar. 13:12, 13). Uan no tiknextiaj ke amo tiyolijsiuij keman tiktemouaj tein tapaleuis maj kinekikan momachtiskej iTajtol Dios maski ouij tikinajsiskej kampa nemij.
3. ¿Keyej moneki maj amo tiyolijsiuikan keman oksepa titakalpanoskej oso titamachtiskej ika Biblia?
3 Akin tikinmachtiaj ika Biblia. Keman teisa tiktokaj, moneki timochiaskej maj moskaltij. Ueli tiktaliliaj tein kichikauas sayoj ke amo ueli tikchiuaj maj ijsiujka moskalti (Sant. 5:7). No ijkon panoua imiuan taltikpakneminij tein mochiuaj imomachtijkauan Jesús. Yejuan yolik moskaltiaj (Mar. 4:28). Akin tikinmachtiaj ika Biblia xa kitelouijmatiskej kikauaskej seki taman tein kineltokaj oso costumbres tein Biblia amo tamachtia. Maj amo tikinchikaujkauikan maj mopatakan porin tiknekij maj ijsiujka moskaltikan, ta maj tiknextikan ke amo tiyolijsiuij uan maj tikchiakan tonalmej tein monekis uan ijkon tikauaskej maj iespíritu Dios tekiti itech imin yolo (1 Cor. 3:6, 7).
4. Keman tikinnojnotsaskej tochankauan tein amo momachtiaj, ¿keniuj okachi tapaleuis komo tiknextiaj ke amo tiyolijsiuij?
4 Tochankauan tein amo momachtiaj. Maski tiktelnekij maj tochankauan tein amo momachtiaj kiselikan iTajtol Dios, timochiaj keman uelis tikintapouiskej tein tikneltokaj uan tiktemoskej amo tikinyolajxitiskej ika miak nemachtil (Ecl. 3:1, 7). Sayoj ke tikaujtokej maj tokuali neskayo kinnextili keniuj techpaleuijtok iTajtol Dios, uan timochixtokej keman uelis tikintapouiskej tein tikneltokaj ika yemanik tajtolmej uan ueyi poujkaitalis (1 Ped. 3:1, 15). Kemej tikitakejya, komo tiknextiaj ke amo tiyolijsiuij keman titanojnotsaj, okachi kuali tikchiuaskej tekit uan kiyolpaktis toTajtsin tein nemi iluikak.