Maj titeyoliknelikan
1. ¿Toni kitemouaj taltikpakneminij tein moneki ijsiujka kiseliskej?
1 Axkan tel miakej taltikpakneminij kitemouaj uan tajtanij nepaleuil. Nejin amo keman ijkon mochiujtoya. Nochi tein amo kuali mochiujtok noyampa taltikpak, kichiua maj tayokoyakan, maj amo yolpakikan uan maj kipolokan imin nechialis. Akin tikchiuaj kemej Cristo tikmatij ke tel miakej taltikpakneminij kinekij maj se kinpaleui uan tomako yetok maj tikinnextilikan teiknelilis (Mat. 22:39; Gál. 6:10). Maj tikitakan keniuj uelis tiknextiskej tein melauak teiknelilis.
2. ¿Keniuj uelis tiknextiskej melauak teiknelilis?
2 Se tekit tein mochiua ika teiknelilis. Sayoj itech Dios uelis moajsis yekmelauj yolseuilis (2 Cor. 1:3, 4). Jiova techyoleua maj no ‘titeyoliknelikan’ uan techiluia maj tikintapouikan iTekiuajyo Dios nochin tein nemij kampa tichanchiuaj (1 Ped. 3:8). Komo tikchiuaj nejon tekit nochi tein tiueliskej, okachi uelis tikinyolchikauaskej akin tajyouijtokej porin sayoj iTekiuajyo Dios yekmelauj kichiuas maj tami tajyouilis (Isa. 61:1). Kemej Jiova semi kiniknelia itekitikauan, amo uejkaua kiixpolos nochi tein amo kuali uan kichiuas maj onka melaujkayot nikan taltikpak (2 Ped. 3:13).
3. ¿Keniuj uelis no ijkon tikinitaskej taltikpakneminij kemej Jesús kinitaya?
3 Maj tikinitakan taltikpakneminij kemej Jesús kinitaya. Maski Jesús kinsennojnotsaya miakej taltikpakneminij, iminka motekipachouaya sejse. Kimatia ke tataman nepaleuil monekia kinmakas tein ika motokiskiaj iuan Dios. Yejuan moajsiaj kemej ichkamej tein amo kipiayaj imin tajpixkauj uan Jesús kinikneliaya, yejua ika kinmachtiaya ika nejmachkayot (Mar. 6:34). Komo no ijkon tikchiuaj kemej Jesús, yekmelauj titeikneliskej uan nejin tiknextiskej itech toixko uan kemej titajtoskej. Uan no, tiktayekanaltiskej tanojnotsalis uan tiktemoskej tajtolmej tein ika tikyolchikauaskej sejse taltikpaknenkej (1 Cor. 9:19-23).
4. ¿Keyej moneki tikpiaskej ueyi “teiknelilis”?
4 Tel miakej taltikpakneminij tein seseko kayomej kuali kiselijtokej tamachtilis tein kitemaka iTekiuajyo Dios tein kinyolseuia, uan kinpaleuijtok maj tikinnextilikan netasojtalis. Keman tikpiaj ueyi “teiknelilis”, tikueyichiuaj uan tikyolpaktiaj Jiova Dios akin semi teiknelia (Col. 3:12).