Keniuj tikitaskej tein kuali tein techualkuilia tochikauak tekit
1. ¿Toni uelis kichiuas maj amo tiyolpakikan itech totanojnotsalis?
1 Dios kichijchiuak taltikpaknenkej maj ueli “kiita tein kuali tein kiualkuilia nochi chikauak tekit tein kichiua” (Ecl. 2:24). Yejua ika, keman tikitaj ke amo kuali techkisa tein tikchiuaj itech tanojnotsalis, uelis timoyolkokoskej uan tikpoloskej toyolpakilis. ¿Toni uelis techpaleuis maj tikpiakan se kuali tanemilil?
2. ¿Keyej moneki tikchiaskej tein yekmelauj uelis panos?
2 Maj tikchiakan tein yekmelauj uelis panos. Maski amo miakej kitojtokakej Jesús, amo akin uelis kijtos ke amo kuali kisak tein kichiuak itech tanojnotsalis (Juan 17:4). Keman ika tajtoj se tatokkej kemej neskayot, Jesús kijtoj ke miakej amo kiseliskiaj itajtol Dios tein moneskayotia kemej xinach (Mat. 13:3-8, 18-22). Sayoj ke, maj tikitakan nochi tein uelis mochiuas komo timochikauaj tikchiuaj totekiuj.
3. ¿Keniuj tikchiuaj maj onka takilot maski amo nochipa techkakiskej?
3 Keniuj tikchiuaj maj onka miak takilot. Itech neskayot ika tatokkej tein kijtoj Jesús, kinextia ke akin kiseliskej itajtol Dios “kitemakaske kuali takilome” (Mat. 13:23). Keman taol ixua uan chikauaya, amo taki yankuik mil, ta kitemaka yankuik xinach. No ijkon, takilot tein kitemaka se akin kichiua kemej Cristo amo kijtosneki yankuik momachtianij, ta kimiakilis nejon xinach, tein kijtosneki, tajtos miakpa ika iTekiuajyo Dios. Nochi tein kuali tein tikchiuaj techualkuilia yolpakilis, maski amo kuali technankiliskej taltikpakneminij. Keman titanojnotsaj, titapaleuiaj maj moueyitali itokay Jiova (Is. 43:10-12; Mat. 6:9). Se ueyi tatiochiualis tisentekitiskej iuan Dios (1 Cor. 3:9). Uan no, Jiova kitelyolpaktia keman kiita ke tikueyichiuaj “ika toten” (Heb. 13:15, 16).
4. ¿Toni takilot uelis tiktemakaskej maski amo tikmatiskej?
4 Maj tikelnamikikan ke amo nochipa tikitaskej nochi tein kuali tein techualkuilia tochikauak tekit. Xa sekin akin kikakkej Jesús amo mochiujkej imomachtijkauan keman yejua yetoya nikan taltikpak. No ijkon, xinach tein moneskayotia ika itajtol Dios tein kemej yeskia tiktokaj itech iyolo se aksa, uelis amo niman moskaltis, uan xa nejon taltikpaknenkej uelis satepan mochiuakiuj itaixpantijkauj Jiova maski amo tikmatiskej. Moyekita ke totanojnotsalis tapaleuia ika miak taman tein kuali. Yejua ika, maj tiksentokakan tiktemakakan “miak takilome” uan maj tiknextikan ke yekmelauj tiktojtokaj Jesús (Juan 15:8).