“Keniuj uelis tiktemakaskej revistas itech metsti...”

Itech sejse metsti itech Nechikol tein Techmachtia iTekiyo Dios ixnesi se tamachtilis kampa moijtoua keniuj tiktemakaskej revistas. Nejin amo kijtosneki ke moneki moijtos nochi tein kijtoua amaix, ta moijtos tataman tanemililmej kemej uelis se kitemakas. Ijkon kemej kijtoua itech nejon taxelol, tokniuj akin kipanoltia tamachtilis amo uejkaua keman peua uan tayolchikaua. Ompa, kiniluia takakinij maj kijtokan toni uelis kijtoskej keman kitenextiliskej se tamachtilis oso tamachtilismej itech ipeujyan amaix. Ijkon, nochin uelij kiitaj tamachtilismej uan kiamataliaj tanemililmej tein kitekitiltiskej. Tokniuj akin kipanoltis tamachtilis amo moneki tajtanis maj kijtokan keniuj senkis motemakas, ta kiniluis tokniuan maj kijtokan toni netajtanilmej tapaleuis maj taltikpakneminij kinekikan kimatiskej okachi uan toni tajkuilolmej itech Biblia uelis tikixtajtoltiskej. Keman tami, kichiua maj monexti keniuj tiktemakaskej sejse amaix. Techyoleuaj maj tinochin achto tikixtajtoltikan amaixmej uan maj tikijtokan totanemililuan itech nechikol. Komo tinochin kuali timomachtiaj, uelis timosenpaleuiskej (Prov. 27:17).