Maj ajsitok totanojnotsalis
1. ¿Toni kuali neskayot techkauilia tatitanil Pablo ika tanojnotsalis?
1 “Nochi nijin motekiu xikyekchiuati.” (2 Tim. 4:5.) Tatitanil Pablo amo kipiaya nion teyi tein kitsakuiliaya keman kiyolmajxitij Timoteo porin yejua ijkon kichiujtoya. Itech xiujmej 47 uan 56 itech totonaluan, Pablo expaya kiska tanojnotsato itech tataman altepemej. Amatajkuilol Hechos miakpa kijtoua ke Pablo ajsitok kichiuaya itanojnotsalis (Hech. 23:11; 28:23). ¿Keniuj no ijkon uelis tikchiuaskej axkan?
2. ¿Keniuj uelis ajsitok titanojnotsaskej keman tiyaskej kajkalpan?
2 Kajkalpan. Miakej taltikpakneminij amo keman kikakinij totanojnotsalis, yejua ika moneki tikinkalpanoskej tataman hora itech tonal, ijkon uelis tikinajsiskej. Takat uelis yetosya ichan tiotakpa oso itamiampa semana. Moneki timochikauaskej titajtoskej itech nochi kalmej, uan tiyaskej oksepa keman amo akin tikajsiskej itech se kali. ¿Uan toni uelis tikchiuaskej komo amo tikinajsij? Xa kuali techkisas keman tikinijkuilouiliskej se amat oso tikinnotsaskej ika teléfono.
3. ¿Kemanian uelis titanojnotsaskej kampa yeski oso senteixtenoj?
3 Senteixtenoj uan kampa yeski. Itech nejin tonalmej itekitikauan Dios kinixmatiltiaj “tamatilis tein melauak” akin kinekij kinkakiskej. Kemansa mochiua “itech ojti” oso “senteixtenoj” (Prov. 1:20, 21). Keman tikchiujtokej okseki tataman tekimej, ¿tiktemouaj keniuj uelis titanojnotsaskej? ¿Uelis moijtos ke ‘kachi ok titanojnotstinemij ika in Tajtoltsin de Dios’? Komo ijkon tikchiuaj, melauak tiktakamattoskej tanauatil tein kijtoua “ma [ajsitok] titanojnotstinemikan ika in Tajtoltsin de Dios” (Hech. 10:42; 17:17; 18:5; 20:20, 21, 24).
4. Keman tikchiuaj netataujtil uan titanemiliaj ika nejmachkayot, ¿keniuj techpaleuia maj ajsito totanojnotsalis?
4 Kemansa, xa tiomeyolouaj titanojnotsaskej porin tipinauaj titajtoskej oso tikmachiliaj ke amo tiueliskej. Sayoj ke, tikmatij ke Jiova kiajsikamati tein techpanoua (Sal. 103:14). Maski ijkon, keman techpanos nejon, uelis tikchiuaskej netataujtil uan tiktajtaniskej maj techpaleui maj tiuelikan titajtokan (Hech. 4:29, 31). No ijkon, keman timomachtiskej toselti uan titanemiliskej ika nejmachkayot itech iTajtol Dios, uelis tiktemoskej keniuj okachi tikitaskej ipatiuj tein kipia tein Dios techmachtia (Filip. 3:8). Nejin techyolchikauas maj titanojnotsakan ika yolchikaualis.
5. ¿Keniuj uelis titapaleuiskej maj mochiua tein achto kijtojka tanauatijkej Joel?
5 Tanauatijkej Joel kijtojkaya ke achtopa ijkuak ejkoskia iueyi tonal Jiova, ixolal Dios kisentokaskia tekititoskia itech tanojnotsalis uan amo teyi kitsakuiliskia (Joel 2:2, 7-9). Yejua ika, maj senkis titekititokan itech nejin tanojnotsalis tein amo keman oksepa mochiuas.