Kampa monankilia netajtanilmej
◼ ¿Toni tajkuilolmej itech Biblia uelis techpaleuis keman tikuiskej teléfono itech nechikolmej uan itech tanojnotsalis?
“Nochi ixyetok tonal keman mochiuas.” (Ecl. 3:1.) Ika teléfono tein tikuikatinemij ueli tikintajkuilouiliaj oso tikinnotsaj oksekin keman yeski. Maski ijkon, kemansa tiitaixpantijkauan Jiova moneki tikchiuaskej okseki taman tein okachi moneki uan amo tiktekitiltiskej teléfono. Kemej neskayot, keman tiyouij nechikolmej tikueyichiuatij Dios, timomachtiaj iTajtol uan tikseliaj nepaleuil uan timoyolchikauaj iniuan okseki tokniuan (Deut. 31:12; Sal. 22:22; Rom. 1:11, 12). ¿Uelis tikseuiskej teléfono achto ke peuas nechikol uan tikitaskej tein techijkuilouilijkej keman tikisaskejya? Komo motelneki technotsaskej uan amo ueli tikseuiaj, moneki tiktaliskej kemej amo kintapololtis oksekin.
Maj tikchiuakan nochi “sayo ika porin Tajtoltsin de Dios” (1 Cor. 9:23). Kemansa kuali maj tiktekitiltikan teléfono itech tanojnotsalis. Kemej neskayot, tokniuj akin taixyekana nejon tonal uelis kinnotsas akin tanojnotstoskej oksekopa. Uan se tanojnotskej xa kinekis kinnotsas akin kinkalpanoua oso kinmachtia achto ke yas kinitatiuj, okachiok komo uejka nemij. Maski ijkon, moneki tikitaskej maj teléfono amo techtapololti keman titajtojtoskej ika Biblia iuan aksa (2 Cor. 6:3). Uan no, komo moneki tikinchiaskej okseki tanojnotsanij, amo kuali yetok maj titanotsakan ika teléfono oso tiktajkuilouilikan aksa. Okachi kuali yeskia komo amo titanemiliaj itech okse taman, ta sayoj itech tanojnotsalis, uan maj tikinitakan tokniuan akin yetoskej touan.
Maj tikinpoujkaitakan oksekin (1 Cor. 10:24; Filip. 2:4). Amo keman moneki tiknemiliskej ke uelis tiajsiskej tajkaj itech nechikol tein mochiua achto ke tiyaskej titanojnotsatiuij ta uelis tiknotsaskej se tokniuj oso tiktajkuilouiliskej maj techilui kani tanojnotstokej. Keman tajkaj tiajsij, moneki oksepa moyektalis kemej ixyetoyajya tokniuan. Tein melauj, uelis panos seki taman tein kichiuas maj tajkaj tiajsikan. Sayoj ke, komo nochipa tiajsij itech hora tein moixtalia, tiknextiskej ke tikpoujkaitaj tein Dios kiixtalia, tikpoujkaitaj akin taixyekana nejon tonal uan okseki tokniuan.