¿Akoni kiuelitaskia kimatis nejin?
1. ¿Toni moneki tiknemiliskej keman tikixtajtoltiskej amaix Tanejmachtijkej oso ¡Despertad!, uan keyej?
1 Keman moijkuiloua amaix Tanejmachtijkej uan ¡Despertad! ininka tanemiliaj nochin taltikpakneminij itech nochi taltikpak. Yejua ika, miak taman ika tajtouaj. Keman tikixtajtoltiskej sejse tamachtilis tein kiualkui, moneki tiknemiliskej akoni kinekis kimatis tein kijtoua uan satepan maj tikixtalikan tein tikiluiskej.
2. ¿Toni tein ika tajtouaj toamaixuan uelis kinekiskej kimatiskej oksekin?
2 Maj tiknemilikan ke itech se yankuik amaix Tanejmachtijkej ika tajtoua se taman tein achto ika timonojnotskej iuan se totekitikaikniuj. Oso xa se amaix ika tajtoua nemilis kemej kalyetouanij tein uelis kipaleuis se tochankauj. No uelis panos ke xa tikixmatij aksa akin kipia se kokolis tein amaix ¡Despertad! achto ika tajtojka. Uan no, akin tanamakaj oso akin tekitij itech tekitiloyamej tein tekiuajyot kinixtalijtok kampa titanojnotsaj, xa kinekiskej kimatiskej tein ika tajtouaj semej amaixmej. Kemej neskayot, itech kalmej kampa kinyekpiaj akin xiuejkejya uelis kinekiskej kiixtajtoltiskej se amaix tein ika tajtoua ouijkayomej tein kipanouaj yejuan. Uan kampa tamelauaj tekiuanij oso kampa kinixyekanaj policías xa kinyolnotsas se amaix kampa ika tajtoua tein amo kuali tein mochiua.
3. Xikonijto se neskayot tein kinextia toni tein kuali mochiuas komo tikinmakaj se amaix akin tiknemiliaj ke kinekiskej kiixtajtoltiskej tein ika tajtoua.
3 Toni tein kuali mochiuas. Satepan ke kiselijkej amaix ¡Despertad! octubre de 2011, tein motokaytij “Cómo criar hijos responsables”, se tokniuj iuan inamik akin nemij Sudáfrica, kinnotskej ika teléfono akin tamachtiaj itech 25 kaltamachtiloyamej tein moajsij kampa tanojnotsaj, uan 22 kaltamachtiloyamej kiselijkej nejin amaixmej uan kinxejxelouilijkej momachtianij. Okse tokniuj iuan inamik itech nejon altepet no kinemilijkej kichiuaskej nejon uan kintemakakej amaixmej itech kaltamachtiloyamej tein moajsij kampa tanojnotsaj. Itech se kaltamachtiloyan, tamachtianij kiixtalijkej kikuiskej nejon amaix keman tamachtiskiaj. Nejin namikuanij kitapouijkej se tokniuj takalpanojkej tein kichiujkej. Satepan, yejua kinyolchikauak nechikolmej tein kinkalpanouaya maj no ijkon kichiuakan itech kaltamachtiloyamej tein moajsij kampa tanojnotsaj. Itech sucursal tajtankej okachi amaixmej, uan monekik oksepa kinchijchiuaskej okachi.
4. ¿Keyej tiknekij maj okachi taltikpakneminij kiixtajtoltikan toamaixuan?
4 Toamaixuan ika tajtouaj tein yekmelauj kijtosneki tein panotok axkan uan kichiua maj akin kiixtajtoltiaj kiitakan tein kijtoua Biblia uan maj kimatikan tein iTekiuajyo Dios kichiuas. Uan no, sayoj nejin amaixmej itech nochi taltikpak kitematiltiaj ke onkas nemakixtilis (Is. 52:7). Yejua ika, tiknekij maj okachi taltikpakneminij kiixtajtoltikan. Techpaleuis maj ijkon tikchiuakan komo timotajtaniaj: “¿Akoni kiuelitaskia kimatis nejin?”.