¿Tikixtaliaj tikpataskej?
1. Kemej tein mochiujtok itech taltikpak mopatatok, ¿toni moneki tikchiuaskej?
1 Biblia kijtoua ke tein mochiujtok itech taltikpak nochipa mopatatok. Yejua ika kemansa moneki maj tikpatakan kemej titanojnotsaj, hora keman tikisaj uan tein ika peua titajtouaj. Sayoj ke, ¿tikixtaliaj ijkon tikchiuaskej?
2. ¿Toni moneki tikchiuaskej uan ijkon timokauaskej maj techixyekana inechikol Jiova?
2 Kemej titanojnotsaj. Itech inechikol Dios mopatani kemej se tanojnotsa keman moitani ke moneki. Keman Jesús kintitanik imomachtijkauan maj tanojnotsatij, yekinika kiniluij maj amo kiuikakan tein ika kieuaskiaj teisa nion tomin (Mat. 10:9, 10). Sayoj ke, satepan kipatak nejon tein kinnauatijka porin kimatia ke kinixnamikiskiaj uan ke tanojnotsalis momoyauaskia itech okseki xolalmej (Luc. 22:36). Itech siglo tein panok, itech inechikol Jiova mopatatiyajki kemej motanojnotsaya ijkon kemej monekia itech nejon xiujmej. Kemej neskayot, mokuikej amatsitsin kampa moijkuilouaya tein kinekiaj kitapouiskej taltikpaknenkej, motemakayaj tanojnotsmej itech radio, uan ika tepostamamajkej kampa motaliayaj tanojnotsmej itech se tepostatsotson. Itech nejin tonalmej, miakkan ouij se kinajsi taltikpakneminij ininchan, yejua ika okachi moijtouani ke moneki se tanojnotsas kampa yeski se yetos uan kampa moajsij miakej taltikpakneminij, uan ijkon amo sayoj kajkalpan titanojnotsaskej. Uan no techyolmajxitianij maj titanojnotsakan tiotakpa, porin ijkon uelis tikinajsiskej akin tekitij nochi tonal. Tein melauj, icarro Jiova kipatatiuj kampa ika youi. ¿Tiktojtokaj uan timokauaj maj techixyekana? (Ezeq. 1:20, 21.)
3. ¿Toni uelis tikchiuaskej uan ijkon okachi kuali kisas totanojnotsalis?
3 Tein ika peua titajtouaj. ¿Toni kintekipachoua axkan taltikpakneminij kampa titanojnotsaj? ¿Tomin? ¿Ininchankauan? ¿Tein amo kuali tein mochiua? Komo tikmatij toni kuejmolmej mochiujtok uan keniuj moajsij taltikpakneminij, techpaleuis maj tikitakan toni uelis tikiniluiskej tein okachi kinpaleuis (1 Cor. 9:20-23). Keman taltikpakneminij tajtojtoskej, maj amo niman tikinnankilikan uan maj amo tiksentokakan ika titajtokan tein tikixtalijkaj tikiniluiskej, ta okachi kuali maj ika titajtokan tein kintekipachoua.
4. ¿Keyej motelneki maj tikixtalikan tikpataskej kemej titanojnotsaj?
4 Amo uejkaua, itech taltikpak amo teyi mopatasok uan peuas ueyi tajyouilis. Tamilis “amo uejkauas ok” (1 Cor. 7:29). Yejua ika, motelneki maj tikixtalikan tikpataskej kemej titanojnotsaj keman monekis. Sayoj ijkon uelis tikchiuaskej tein tiueliskej itech tonalmej tein mokauajok.