Xikchiuakan ijkon kemej kichiujkej tanauatianij: Joel
1. ¿Keniuj uelis tiknextiskej yolyemanilis kemej Joel keman titanojnotsaskej?
1 ¿Akoni katka tanauatijkej Joel? Itech amatajkuilol tein ijkon motokaytia, sayoj kimelauak ke katka “ikoneuj Petuel” (Joel 1:1). Nejin tanauatijkej yolyemanik ika tajtoj itanauatil Jiova, amo tekit tein yejua kichiuaya. Uan no yejua tikchiuaj tejuan keman titanojnotsaj: amo tiktemouaj maj techueyitalikan, ta tiktemouaj maj taltikpakneminij kikakikan Jiova uan iTajtoltsin (1 Cor. 9:16; 2 Cor. 3:5). ¡Uan semi teyolchikaua tanauatil tein tikteixmatiltiaj! Maj tikitakan seki taman tein kipia tanauatil tein Joel kiteixmatiltij, tein techyolchikaua uan kichiua maj tikpiakan nechialis.
2. Kemej itonal Jiova amo uejka yetok, ¿toni moneki tikchiuaskej?
2 “Itonal Jiova amo uejka yetok.” (Joel 1:15.) Maski nejin tajtolmej moijkuilojkej ajsitokya tres mil xiujmej, senkis mochiujtok itech totonaluan. Okachi onkak kuejmolmej itech taltikpak, uan kampa titanojnotsaj techkejkelouaj uan amo kinekij techkakiskej. Nejin kinextia ke tinentokejya itech itamian tonalmej (2 Tim. 3:1-5; 2 Ped. 3:3, 4). Kemej amo uejkaua ixpoliuis tein amo kuali, moneki tiktayekanaltiskej tanojnotsalis itech tonemilis (2 Ped. 3:11, 12).
3. Axkan ke okachi amo uejka yetok ueyi tajyouilis, ¿keyej motelneki maj tiksentokakan titanojnotsakan?
3 “Jiova yeski se nepaleuil itech ixolal.” (Joel 3:16.) Nejin tajkuilol no kijtoua ke “iluikak uan taltikpak [...] motsetseloskej”, uan kijtosneki tatsakuiltilis tein Jiova kiualkuis itech ueyi tajyouilis. ¡Semi techyolseuia tikmatiskej ke Jiova kinmakixtis itekitikauan akin amo kikauaj! (Rev. 7:9, 14.) Komo tiksentokaj titanojnotsaj uan tikitaj keniuj Jiova techpaleuia uan techyolchikaua, techpaleuis maj tikpiakan takuaujtamatilis uan maj titaxikokan. Nejin kualneskayomej techpaleuis maj timakisakan keman ejkos ueyi tajyouilis.
4. ¿Keyej uelis tiyolpakiskej uan tikixnamikiskej ika takuaujtamatilis tein ualas satepan?
4 Maski sekin kijtouaj ke semi amo kuali tein kiteixmatiltij Joel, tein melauj techmatiltia ke akin pouij itech ixolal Dios momakixtiskej (Joel 2:32). Yejua ika, maj tikixnamikikan ika takuaujtamatilis tein ualas satepan, maj tikteixmatiltikan ika nochi toyolo kuali tanauatilmej ika iTekiuajyo Dios uan maj tikselikan tayoleualis tein moajsi itech Joel 2:23, tein kijtoua: “Xiyolpakikan itech Jiova nanmoDios”.