Kampa monankilia netajtanilmej
◼ Achto ke kijtoskej ke se tanojnotskej uelisya moauis, ¿keniuj moneki kinextis ke kiita nechikolmej uan tanojnotsalis?
Se taman tein aksa kiixpejpena kichiuas uan okachi moneki, yejua keman kiixtalia moauis. Yejua ika, achto ke tayekananij kijtoskej ke uelisya moauis, taltikpaknenkej moneki kiajsikamatis tein Dios kichia maj kichiua. Uan no, moneki moitas ke yekmelauj kineki monejnemiltis kemej Dios kiyolpaktia.
Akin tikchiuaj kemej Cristo techyolmajxitiaj maj nochipa timonechikokan, yejua ika akin kineki moauis moneki nochipa monechikos (Heb. 10:24, 25). Uan no moneki tanankilis itech nechikolmej. Uan no, xa moijkuilojya itech Escuela tein Techmachtia iTekiyo Dios, maski nejin amo se taman tein motelneki kichiuas uan ijkon uelis moauis.
Kemej akin tikchiuaj kemej Cristo moneki tikteixmatiltiskej kuali tanauatilmej uan tikinpaleuiskej taltikpakneminij maj no kiueyichiuakan Dios, se tanojnotskej akin kineki moauis moneki tanojnotsas mejmetstika (Mat. 24:14; 28:19, 20). ¿Kanachi metsti moneki tekititos kemej tanojnotskej achto ke moauis? Moneki tekititos seki metstiya uan ijkon kinextis ke kineki tapaleuis ika nochi iyolo itech tanojnotsalis mejmetstika (Sal. 78:37). Sayoj ke amo no moneki maj pano tel miak metsti; xa sayoj seki metsti. ¿Uan kanachi hora moneki tanojnotsas itech se metsti? Amo ixyetok kanachi. Tayekananij moneki kuali taixejekoskej uan kiitaskej keniuj moajsi sejse tanojnotskej (Luc. 21:1-4).
Tayekananij, oso tapaleuianij, itech nechikolmej kampa amo onkakej miakej tayekananij, akin monechikoskej iuan akin kineki moauis moneki kielnamikiskej ke taltikpakneminij tatamamej, uan moneki kuali taixejekoskej keman kiitaskej ox kichiujtok nochi tein moneki uan ijkon uelis moauis. Akin kineki moauis moneki kinextis ke yekmelauj kineki mochiuas itaixpantijkauj Jiova, uan ke kitasojkamati tatiochiualis tein tikpiaj keman timosentiliaj iniuan akin pouij itech inechikol Dios uan keman titanojnotsaj. Tayekananij kimatij ke yejua ayamo tel kuali taixejekoua oso kitekitiltia Biblia kemej se tanojnotskej akin uejkaujya moauij. Komo tayekananij kinemiliaj ke akin kineki moauis amo kichiujtok nochi tein Jiova tajtani, moneki kiiluiskej ika nejmachkayot keyej ayamo uelis moauis uan kiitaskej maj kiseli nepaleuil tein moneki.