Xikchiuakan ijkon kemej kichiujkej tanauatianij: Amós
1. ¿Keniuj uelis techyolchikauas ineskayo Amós?
1 ¿Kemansa tikonnemiliani ke amo ueli tiontanojnotsa porin amo semi teyi tikonpia oso porin amo tikonselij se ueyi nemachtil? Komo ijkon, ineskayo Amós uelis mitsonyolchikauas. Yejua katka sayoj se ichkatajpixkej uan seki tonalmej itech xiuit kichiuaya okseki taman tekit, sayoj ke Jiova kimakak se tatiochiualis: maj kiteixmatiltiani se tanauatil tein motelnekia (Amós 1:1; 7:14, 15). Uan axkan Jiova no kinmaka nejon tatiochiualis akin yolyemankej (1 Cor. 1:27-29). ¿Keniuj no uelis techpaleuis ineskayo Amós itech totanojnotsalis?
2. ¿Toni techpaleuis maj amo timosenkauakan keman techixnamikiskej itech tanojnotsalis?
2 Amo mosenkauak maski kiixnamikiaj. Keman Amós kiteixmatiltij tanauatil itech majtakti uejueyi kalyetouanij tein pouiaj Israel, Amasías, se inintiopixkauj akin kiueyichiuayaj kuakuejkonemej, kiiluij maj youi uan maj amo kinkuejmolojto, ta yejuan kipiayajya inintaneltokalis (Amós 7:12, 13). Uan kemej kinekia maj tekiuaj Jeroboán kitakaualtiani Amós, Amasías kikejkepak tein kijtojka tanauatijkej (Amós 7:7-11). Sayoj ke Amós amo teyi kimoujtij. Itech nejin tonalmej, seki taneltokanij kitemouaj ininnepaleuil tekiuanij uan kintajyouiltiaj itekitikauan Dios. Sayoj ke Jiova techyekiluia ke nion teyi tein ika techixnamikiskej uelis senkis techijtakos (Is. 54:17).
3. ¿Toni ome taman poui itech tanauatil tein axkan tikteixmatiltiaj?
3 Kiteixmatiltij itatsakuiltilis Dios uan tatiochiualismej tein onkaskia satepan. Maski Amós kiteixmatiltij tatsakuiltilis tein kipanoskiaj majtakti uejueyi kalyetouanij tein pouiaj Israel, itamiampa amatajkuilol tein kijkuiloj uan kipia itokay, moajsi tein Dios motenkaujka keman kijtoj ke kipaleuiskia uan kitatiochiuiskia ixolal (Amós 9:13-15). Tejuan no tikteixmatiltiaj “tonal de ueyi tatsakuiltilis” tein Dios kiualkuis, uan nejin sayoj se taman tein poui itech kuali tanauatilmej ika iTekiuajyo Dios tein moneki tikteixmatiltiskej (2 Ped. 3:7; Mat. 24:14). Keman Jiova kinixpolos akin amo yolkualmej itech Armagedón, nejin taltikpak uelis mochiuasya se xochital (Sal. 37:34).
4. ¿Toni techpaleuia maj tikyekmatikan ke uelis tikchiuaskej itanejnekilis Jiova?
4 Kemej tikteixmatiltiaj iTekiuajyo Dios maski techixnamikij, tein melauj kichiua maj ouij techkisa tikchiuaskej tein timotenkaujkej iuan Jiova uan tikchiuaskej itanejnekilis (Juan 15:19). Maski ijkon, tikyekmatij ke yejuatsin kisentokas techpaleuijtos maj tikchiuakan itanejnekilis, ijkon kemej kichiuak iuan Amós (2 Cor. 3:5).