Maj kuali tikuikan revistas tein amo yankuixtok kiskej
Revistas amo tapaleuiskej komo sayoj tikinsentiliaj oso tikintamotaj, yejua ika moneki tiktemoskej keniuj uelis tikmoyauaskej. Sayoj se amaix uelis tapaleuis maj aksa kineki momachtis tein kijtoua Biblia uan kiolinis maj kiueyichiua itokay Jiova (Rom. 10:13, 14). Nikan moijtoua keniuj uelis tikuiskej revistas tein amo yankuixtok kiskej.
Keman titanojnotsatij itech xolalmej kampa amo semi motanojnotsa, uelis tikauaskej se amaix itech kalmej kampa amo yetokej, sayoj ke kampa amo kiitaskej akin ompa panouaj.
Keman titanojnotsaj kemej kampa moketsaj teposmej, uelis tikintajtaniskej akin ompa mochixtokej ox kiuelitaskiaj kiixtajtoltiskej teisa uan maj tikinnextilikan seki revistas uan ijkon uelis kiixpejpenaskej tein yejuan kiuelitaskej.
Keman tiyaskej itech tapajtiloyan oso okseko tein moajsi itech xolal kampa titanojnotsaj kemej nechikol, uelis tikauaskej seki revistas kampa mochiaj. Komo tikitaj akin tajpia ompa, uelis tikiluiskej ox techkaua maj tikauakan revistas. Uan komo ompa moajsijya seki revistas, maj amo tikauakan okseki.
Ijkuak timomachtiskej uan ijkon oksepa tikinkalpanotiuij akin kuali techkakkej, maj tiknemilikan toni okachi kiyoltilanas sejse taltikpaknenkej akin iuan titajtouaj. ¿Kipia konemej? ¿Kiuelita paxalotiuj kansaika? ¿Kipaktia tatojtokas? Maj tikitakan itech seki revistas tein amo yankuixtok kiskej ox moajsi se tamachtilis tein kipaleuis uan tein uelis tikuikiliskej.
Keman oksepa titajtoskej iuan akin kineki kimatis okachi, satepan keman miak metsti amo tikajsiaj ichan, uelis tiknextiliskej seki revistas tein amo tikauilijkej.